एजेन्सी : भारतका पूर्वप्रधानमन्त्री मनमोहन सिंहको निधन भएको छ । ९२ वर्षीय सिंहको स्वास्थ्य बिग्रिएपछि बिहीबार साँझ दिल्लीको अखिल भारतीय आयुर्विज्ञान संस्थान ( एम्स)मा भर्ना गरिएको थियो । उपचारका क्रममा उनको बिहीबार साँझ निधन भएको एम्सले जानकारी दिएको छ ।
घरमै बेहोस भएपछि उनलाई एम्सको इमर्जेन्सीमा ल्याइएको थियो, तर भारतीय समयअनुसार राति ९.५१ बजे उनको मृत्यु भएको अस्पतालले घोषणा गरेको थियो ।
सिंह भारतीय राष्ट्रिय कंग्रेसबाट २ पटक भारतको प्रधानमन्त्री भए । उनी सन् २००४ देखि २०१४ सम्म भारतको प्रधानमन्त्री थिए ।
उनी सन् १९९१–९६ सम्म भारतको अर्थमन्त्री थिए । त्यतिबेला पीवी नरसिंह राव देशको प्रधानमन्त्री थिए । नरसिंह रावलाई देशमा आर्थिक उदारीकरणका पिता मानिन्छ । मनमोहन सिंहले आफ्नो नीति कार्यान्वयनमा महत्वपूर्ण भूमिका खेलेका थिए ।
सिंहको निधनमा भारतका राष्ट्रपति तथा प्रधानमन्त्रीसहित शीर्ष नेताहरुले श्रद्धान्जली व्यक्त गरेका छन् ।
