काठमाडौं : नेपाली राष्ट्रिय पुरुष क्रिकेट टोलीले यो वर्ष जुनदेखि औपचारिक प्रतियोगिताका खेल्ने भएको छ ।
प्रतियोगिताअन्तर्गत नेपाली टोलीले यस वर्ष आइसिसी विश्वकप लिग–२ मा तीन वटा त्रिकोणात्मक एकदिसीय सिरिज खेल्नेछ । तीन वटामध्ये दुई सिरिज दोस्रो देशमा हुनेछ भने एक सिरिज नेपालमा आयोजना हुनेछ ।
यस्तै सन् २०२५ मै नेपालले आइसिसी विश्वकप क्रिकेट २०२६ अन्तर्गतको एसिया छनोट खेल्ने तय छ । लिग–२ को अघि वा पछि नेपालले सम्बन्धित देशसँग टी–२० सिरिज पनि खेल्नेछ । त्यसैले नेपालले सन् २०२५ मा तीन वटा एकदिवसीय सिरिज र चार वटा टी–२० सिरिज गरी सात सिरिज खेल्ने पक्का छ ।
त्यसबाहेक अहिलेसम्म नेपालले खेल्ने औपचारिक प्रतियोगिता तय भएका छैनन् । यद्यपी नेपालले दोस्रो देशसँग समन्वयमा एकदिवसीय र टी–२० सिरिज खेल्न सक्नेछ ।
सन् २०२५ को पहिलो सिरिजको रुपमा नेपालले विश्वकप लिग–२ मा नेदरल्यान्ड्स र स्कटल्यान्डबीच प्रतिसपर्धा गर्नेछ । यो सिरिज मे महिनामा स्कटल्यान्डमा हुने तय भएको थियो । तर स्कटल्यान्डले सिरिज जुन २ देखि गर्ने तयारी गरेको छ ।
स्कटल्यान्डमा सिरिज खेलेपछि नेपालले युएईमा लिग–२ को अर्को सिरिज खेल्नेछ । युएईमा हुने सिरिजमा घरेलु टोलीसहित नेपाल र अमेरिकाले प्रतिस्पर्धा गर्नेछन् । यो सिरिज अक्टोबरमा हुनेछ । यो वर्षको लिग–२ को अन्तिम सिरिज नेपालले घरेलु मैदानमा खेल्ने छ । नोभेम्बरमा नेपालमा हुने लिग–२ खेल्न ओमान र युएई आउनेछन् ।
अक्टोबरमै आइसिसी टी–२० विश्वकप एसिया छनोट हुनेछ । ओमानमा हुने बताइएको विश्वकप छनोटमा नेपालसहित १० देशले भाग लिनेछन् । १० मध्ये ३ टोली सन् २०२६ मा भारत र श्रीलंकामा हुने टी–२० मा छनोट हुनेछन् ।
अक्टोबरमा लिग–२ को सिरिज र विश्वकप छनोट हुने भएकाले खेल तालिकामा केही हेरफेर भने हुन सक्नेछ ।
