अर्घाखाँची : विज्ञापन बोर्डका अध्यक्ष लक्ष्मण हुमागाईंले पछिल्लो समय बोर्ड स्थापना पश्चात विज्ञापन सम्बन्धी नीति, नियमहरुको कामलाई व्यवस्थित गरेको बताएका छन् ।
विभिन्न जिल्लाहरुमा बोर्डले गरेको काम कारबाहीका बारेमा प्रतिक्रिया लिने क्रममा अर्घाखाँची आइपुगेका हुमागाईंले जिल्ला हुलाक कार्यालयका कर्मचारी र पत्रकारहरुसँगको छलफल गर्दै बोर्ड आएपछि नेपालका पत्रकारहरुलाई सहज भयो वा भएन ?, सहजीकरणको लागि के गर्न सकिन्छ ?, भन्ने उद्देश्यले विभिन्न जिल्लाहरुमा अनुगमनमा निस्किएको बताए ।
हुमागाईंले बोर्डले हालसम्म विज्ञापनको व्यवस्था, विज्ञापन बजार बढाउने व्यवस्था, विद्युतीय माध्यमहरुको भुक्तानी सम्बन्धी प्रक्रिया सुरु र सरकारको विज्ञापन एकद्वार प्रणाली गर्ने जस्ता कामहरु गरिरहेको बताए ।
अर्घाखाँचीका पत्रकार, पत्रकार महासंघका पदाधिकारी, जिल्ला हुलाक कार्यालय अर्घाखाँचीका कार्यालय प्रमुखले जिल्लामा विज्ञापनमा देखिएको समस्या र पत्रकारहरुको समस्याका बारेमा जानकारी गराएका थिए ।
पत्रकारहरुले स्थानीय स्तरमा हुने विज्ञापनहरु बाहिर लैजाने व्यवस्थालाई बोर्डले रोक्न नीति बनाउनुपर्नेमा जोड दिएका थिए ।
हाल जिल्लामा स्थानीय सरकारहरुले उपलब्ध गराउने विज्ञापनहरु मूल्य तोकेर दिने गरेकाले विज्ञापन एजेन्सी, सञ्चार माध्यम निकै समस्यामा परेको, स्थानीय मिडियाहरु आर्थिक स्रोतबाट बञ्चित बनेको जस्ता समस्याहरु उठाइएको थियो ।
हुमागाईंले विज्ञापनको दर रेट तोक्ने अधिकार कुनै पनि सरकारलाई नभएको भन्दै रेट अनुसारको मूल्य सरकारी कार्यालयले तिर्नुपर्ने बताए ।
उनले भने, ‘अर्घाखाँचीमा नौलो अभ्यास रहेछ । अब यो मूल्य तोक्ने काम सम्बन्धित सञ्चार माध्यमको हो । अब यस्तो कुराको अन्त्य गर्न पत्रकार महासंघले भूमिका खेल्नुपर्छ ।’
जिल्लामा सरकारी कर्मचारी, कार्यालय र स्थानीय सरकारहरुसँग अत्याधिक विज्ञापनहरु भएपनि जिल्ला बाहिर ठूलो मिडियाहरुमै पठाउने चलखेल भएको पत्रकारहरुले गुनासो गरेका थिए । बोर्डले स्थानीय सरकारको सबै विज्ञापनहरु स्थानीय मिडियाहरुलाई नै उपलब्ध गराउने नीति बनाएकाले अब कसैले जिल्ला बाहिर विज्ञापन दिन नहुने हुमागाईंले बताए ।
बोर्डका अध्यक्ष हुमागाईंसहित बोर्डका कर्मचारी प्रकाश अधिकारी, लक्ष्मीप्रसाद न्यौपानेले पत्रकारका गुनासाहरु सुनेका थिए ।
कार्यक्रममा नेपाल पत्रकार महासंघ लुम्बिनी प्रदेश सदस्य हिम जिसी लेकाली, महासंघ अर्घाखाँचीका पूर्वअध्यक्ष शोभाखर पन्थी, पूर्व उपाध्यक्ष वीरेन्द्र केसी, जिल्ला उपाध्यक्ष रुद्रमणी भुसाल, सचिव लक्ष्मण घिमिरे, जिल्ला हुलाक कार्यालय अर्घाखाँचीका प्रमुख मदन भट्टराई लगायतले जिज्ञासा राखेका थिए ।
