काठमाडौं : नेपाल अटोमोबाइल डिलर्स एशोसियसन (नाडा) का अध्यक्ष करण चौधरीको नेतृत्वमा गएको प्रतिनिधि मण्डलले भारतको राजधानी नयाँ दिल्लीमा द्विपक्षीय छलफल गरेको छ । नाडाको प्रतिनिधि मण्डलले व्यापार सम्बन्ध थप मजबुत बनाउनका लागि भारत सरकारका वाणिज्य विभागका सहसचिव विमल आनन्द र इन्जिनियरिङ एक्सपोर्ट प्रमोशन काउन्सिल अफ इण्डियाका (इइपिसी) राष्ट्रिय अध्यक्ष पंकज चड्डासँग छलफल गरेको हो ।
सो छलफलमा नेपाल र भारत बीचको व्यापार सम्झौतालाई विस्तार गर्ने र द्विपक्षीय आयात–निर्यातलाई सुदृढ बनाउनका लागि विभिन्न उपायहरूमा गहिरो विचारविमर्श भएको थियो । साथै, छलफलको क्रममा अटोमोबाइल कम्पोनेन्ट, अटोमोबाइल स्पेयर पाट्र्स र विद्युतीय सवारी साधनका व्यापारका अवसरहरूको अन्वेषण गर्नका लागि थप छलफल गर्न निर्णय गरिएको छ ।
चरणबद्ध रूपमा भएका यी छलफलको आगामी बैठकको मिति तय गरी भारतीय प्रतिनिधिहरूलाई नेपालमा निमन्त्रणा गर्न पनि सहमति भएको छ । भारतको नयाँ दिल्लीमा आयोजना भइरहेको भारत मोबिलिटी अटो प्रदर्शनीको अवसरमा नाडा केन्द्रीय कार्य समितिका पदाधिकारी र सदस्यहरूको एक प्रतिनिधिमण्डल भारत भ्रमणमा रहेको हो । यस कार्यक्रममा इन्जिनियरिङ एक्सपोर्ट प्रमोशन काउन्सिल अफ इण्डीयाका (इइपिसी) तर्फबाट पूर्व अध्यक्ष अरुण गारोडिया, सह निर्देशक पल्लवी साह र अन्य उच्च अधिकारीहरूको उपस्थिति थियो ।
त्यस्तै, नाडाको तर्फबाट निवर्तमान अध्यक्ष डा. ध्रुव थापा, वरिष्ठ उपाध्यक्ष आकाश गोल्छा, संस्थागत उपाध्यक्ष पुष्कर ओझा, उपाध्यक्ष राजनबाबु श्रेष्ठ, महासचिव सुरेन्द्रकुमार उप्रेती, सचिव बिक्रम सिंहानिया, कोषाध्यक्ष मिलनबाबु मल्ल र सहकोषाध्यक्ष पंकज अग्रवाल समेत उपस्थित थिए ।
