काठमाडौं : फिफा विश्वकप विजेता इटालीका गोलकिपर जियानलुजी बफोन नेपाल आउने भएका छन् ।
इटलीका पूर्वकप्तान तथा विश्वकै उत्कृष्ट गोलकिपरमध्ये एक मानिने बफोन केपी ओली कप फुटबल प्रतियोगिताको अवसरमा पारेर नेपाल आउन लागेका हुन् । केपी ओली कपको आयोजक नेपाल युवा संघका अध्यक्ष क्षितिज थेवेले बफोन नेपाल आउने पक्का भएको पुष्टि गरेका छन् ।
केपी ओली कपको तेस्रो संस्करण ११ फागुनदेखि १९ गतेसम्म हुनेछ । त्यस प्रतियोगिताको फाइनल खेल हेर्न बफोन काठमाडौंमा आउने थेवेले जानकारी दिए । बफोनलाई १७ फागुन नेपाल ल्याउने तयारी छ । उनले दशरथ रंगशालमा फाइनल खेल अवलोकन गर्नेछन् ।
बफोनअघि ब्राजिलका स्टारहरू रोनाल्डिन्हो र रोबर्टो कार्लोस जस्ता खेलाडीहरूलाई ल्याउने प्रस्ताव गरे पनि उनीहरू नआउने भएपछि बफोनलाई ल्याउन लागिएको राष्ट्रिय युवा संघका सचिव निरोज पौडेलले जानकारी दिए ।
बफोन नेपाल आए उनी नेपालमा आउने विश्व फुटबलकै ठूला नाम हुनेछन् । सन् २००६ को फिफा विश्वकप जितेका बफोनले कीर्तिमानी १७६ अन्तर्राष्ट्रिय खेल खेलेका छन् । उनी सर्वाधिक अन्तर्राष्ट्रिय खेल खेल्ने गोलकिपर हुन् । उनले इटलीका लागि ८० खेलमा कप्तानी समेत गरेका थिए । बफोनले सन् १९९८ देखि २०१४ सम्म लगातार ५ विश्वकप खेलेका थिए ।
केपी ओलीकपको तेस्रो संस्करणमा २ विदेशी ९ टोलीले प्रतिस्पर्धा गर्नेछन् । जसमा क्वाटरफाइनलसम्मका खेलहरू सातदोबाटोस्थित एन्फा कम्प्लेक्स तथा सेमिफाइनल र फाइनल खेल दशरथ रंगशालमा हुनेछ ।
