काठमाडौं : दोस्रो एनसीएमटी अन्तर कलेज फुटसल प्रतियोगिता–२०२५ सम्पन्न भएको छ । काठमाडौंको सामाखुसीमा रहेको नेशनल कलेज अफ म्यानेजमेन्ट एन्ड टेक्निकल साइन्स प्रा.लि. (एनसीएमटी कलेज)को आयोजनामा भएको प्रतियोगिता फागुन ९ र १० गते भएको थियो ।
प्रतियोगिताको उपाधि एआईटीएम कलेजल ललितपुरले जितेको छ । यस्तै प्रतियोगितामा टेक्सस कलेज, चाबहिल दोस्रो हुँदा सरस्वती मल्टीपल क्याम्पस, ठमेल तेस्रो भएको छ । फाइनल खेलमा टेक्ससलाई २-१ गोल अन्तरले हराउँदै एआईटीएमले उपाधि जितेको हो ।
१४ वटा कलेजले भाग लिएको प्रतियोगिताका सबै खेल गोंगबुस्थित मनाङ मर्स्याङ्दी फुटसलमा भएको थियो । प्रतियोगिताको पहिलो दोस्रो र तेस्रो स्थान हासिल गर्ने कलेजहरुले क्रमशः २५, १५ र ५ हजार नगदसहित मेडल र ट्रफी प्राप्त गरे ।
प्रतियोगिताको उत्कृष्ट गोलरक्षकको उपाधि एआईटीएम कलेजका अनिल केसीले प्राप्त गरे भने मस्ट भ्यालुएबल खेलाडीको उपाथि सरस्वती बहुमुखी क्याम्पसका सुशान्त भण्डारीले हात पारे ।
नेपाली राष्ट्रिय फुटबल टिमका कप्तान किरण चेम्जोङको प्रमुख आतिथ्यतामा फाइनल खेल भएको थियो । कप्तान चेम्जोङले विजेता टिम तथा खेलाडीहरूलाई पुरस्कार तथा प्रमाणपत्र वितरण गरेका थिए ।
एनसीएमटीका भाइस प्रिन्सिपल विकास विडारीले कलेजले विद्यार्थीलाई पढाइसँगै विद्यार्थीको वृत्ति विकास र खेल विकासका लागि यस्ता प्रतियोगिता महत्वपूर्ण हुने बताए ।
