काठमाडौं ः सर्वोच्च अदालतमा विभिन्न संवैधानिक निकायका पदाधिकारी नियुक्तिविरुद्धको रिटको सुनुवाइ हेर्दैहेर्दैमा गएको छ ।
वरिष्ठ अधिवक्ता श्रीहरि अर्याल, शम्भु थापा, डा. भीमार्जुन आचार्य, चन्द्रकान्त ज्ञवाली, राजुप्रसाद चापागाईँ, पुनदेवी महर्जन, मोहना अन्सारीलगायत ७ जनाले बुधबार रिट निवेदकका तर्फबाट बहस गरेका थिए ।
अर्को पेसी चैत ६ लाई तोकिएको रिट निवेदक अधिवक्ता ओमप्रकाश अर्यालले जानकारी दिए ।
यसअघि ३० माघमा निवेदक अर्याल र उनका तर्फबाट वरिष्ठ अधिवक्ता डा. चन्द्रकान्त ज्ञवालीले बहस गरेका थिए । उक्त दिन पनि सुनुवाइ नसकिएपछि ‘हेर्दाहेर्दै’मा राखिएको थियो ।
निवेदकका तर्फबाट २४ जना कानुन व्यवसायीले वकालतनामा लेखाएका छन् । त्यस्तै सरकारका तर्फबाट महान्यायाधिवक्ता रमेश बडालसहित १० जना बहसका लागि तयार पारिएको छ ।
अघिल्लो कार्यकालमा प्रधानमन्त्री केपी शर्मा ओलीले संवैधानिक आयोगहरूमा ५२ जनालाई गरेको नियुक्ति गैरकानुनी रहेको भन्दै बदर गर्न निवेदकले माग गर्दैै रिट दर्ता गराएका छन् ।
१ पुस २०७७ मा वरिष्ठ अधिवक्ता ओमप्रकाश अर्यालले ५२ जनाकै नियुक्ति गैरकानुनी भन्दै बदर गर्न माग गरेर रिट दायर गरेका थिए । त्यसपछि उनीसहितले थप १४ वटा निवेदन दर्ता गरेका थिए ।
