काठमाडौँ : यस वर्षको भाइटिकाको शुभसाइत कात्तिक २५ गते बुधबार बिहान ११ बजेर ७ मिनेटमा रहेको जनाइएको छ । नेपाल पञ्चांग निर्णायक विकास समितिका सदस्य लक्ष्मण पन्थीका अनुसार २०८३ सालको भाइटिकाका लागि उक्त समय शुभसाइत निर्धारण गरिएको हो ।
समितिका अनुसार यस वर्ष यमपञ्चक कात्तिक २० गते शुक्रबारदेखि सुरु हुनेछ । सो दिन धनत्रयोदशी (धन्तेरस) तथा यमदीपदान गरिनेछ । कात्तिक २१ गते शनिबार काग तिहार र धन्वन्तरि जयन्ती मनाइनेछ ।
कात्तिक २२ गते आइतबार नरक चतुर्दशी, कुकुर तिहार र लक्ष्मीपूजा परेको छ । कात्तिक २३ गते सोमबार गाईपूजा गरिनेछ भने कात्तिक २४ गते मंगलबार गोवर्धन पूजा, गोरुपूजा, बलिपूजा, हलितिहार तथा म्हपूजा मनाइनेछ । कात्तिक २४ गतेदेखि नेपाल संवत् ११४७ समेत प्रारम्भ हुनेछ ।
यमपञ्चकको अन्तिम दिन कात्तिक २५ गते बुधबार यमद्वितीया तथा भाइटिका मनाइनेछ । सो दिन दिदीबहिनीले दाजुभाइलाई टीका लगाई दीर्घायु, सुस्वास्थ्य र समृद्धिको कामना गर्ने परम्परा छ ।
समितिले भाइटिकाका अवसरमा दाजुभाइ पश्चिम फर्किएर र दिदीबहिनी पूर्व फर्किएर टीका लगाउनु उपयुक्त हुने जनाएको छ ।
.jpg)
