सुर्खेत : मध्यपश्चिम विश्वविद्यालयको तेस्रो दीक्षान्त समारोह सम्पन्न भएको छ । शुक्रबार विश्वविद्यालयको केन्द्रीय क्याम्पसमा कुलपति तथा प्रधानमन्त्री केपी शर्मा ओलीको सभाध्यक्ष र जवाहरलाल नेहरू विश्वविद्यालयका अग्रज प्राध्यापक तथा सिक्किम केन्द्रीय विश्वविद्यालयका संस्थापक उपकुलपति प्रा. डा. महेन्द्र पी लामाको प्रमुख आतिथ्यतामा दीक्षान्त समारोहको उद्घाटन गरिएको थियो ।
विश्वविद्यालयको तेस्रो दीक्षान्त समारोहमा विश्वविद्यालयमा संचालित संकाय र स्कूलहरुबाट स्नातक तहका विभिन्न शैक्षिक कार्यक्रममा सफलता प्राप्त गरेका २ हजार १ सय ८९ जना, स्नातकोत्तर तहका विभिन्न शैक्षिक कार्यक्रममा सफलता प्राप्त गरेका १ हजार ६ सय ३३ जना र व्यवस्थापन संकायको दर्षनाचार्य शोधकार्य सम्पूर्ण पुरा गरेका १९ जना गरी ३ हजार ८ सय ४१ जना विद्यार्थीहरु दीक्षित भएका छन् ।
दीक्षान्त समारोहमा बोल्दै प्रधानमत्री ओलीले सरकारले गुणस्तरीय शिक्षालाई प्रवद्र्धन गर्ने गरी काम गरेको बताए । ‘शिक्षा युगस्तरीय र गुणस्तरीय नभए मुलुक पछि पर्छ,’ उनले भने, ‘शिक्षा डिग्री प्राप्त गर्नु मात्र नभइ जीवनलाई सही दिशा दिने हुनुपर्छ ।’ दीक्षित भएका विद्यार्थीलाई आफ्नै देशमा नवीनतम काम गर्न पनि उनले सुझाव दिए ।
‘अपार प्राकृतिक स्रोत र सम्पदा, विविधतायुक्त सामाजिक, धार्मिक, सांस्कृतिक, प्राकृतिक सन्दर्भलाई ध्यानमा राखी आफ्नो अध्ययन, अध्यापन र अनुसन्धानलाई अघि बढाउन सके मात्र विश्वविद्यालय स्थापनाको औचित्य पुष्टि हुन्छ,’उनले भने, ‘मध्यपश्चिम विश्वविद्यालय अधिकतम विद्यार्थीको रोजाइको विश्वविद्यालय बन्दै जानेछ ।’
साथै कर्णाली खस सभ्यताको राजधानी समेत भएको र महाभारतको युद्धमा समेत कर्णाली बासीको महत्वपूर्ण भूमिका रहेको समेत बताए ।
विश्वविद्यालयले अहिले मानविकी र समाजशास्त्र, विज्ञान तथा प्रविधि, व्यवस्थापन, शिक्षा, कृषि, इन्जिनियरिङ, कानुन संकायमा स्नातक, स्नातकोत्तर र विद्यावारीधिका कार्यक्रमहरु सञ्चालन गरिरहेको छ । कुल ३ हजार बढी विद्यार्थी दीक्षित हुने समारोहमा ८ सय ८५ जनाले मात्रै समारोहमा सहभागी हुन आवेदन दिएका थिए ।
विश्वविद्यालय अन्तर्गत ७ वटा ग्राजुएट विद्यालय, १० आंगिक क्याम्पस ५२ शैक्षिक संस्थामा १० हजार बढी विद्यार्थी अध्ययनरत छन् ।
दीक्षान्त समारोहमा विश्वविद्यालयमा दीक्षित भएका विद्यार्थीहरुमध्ये उत्कृष्ट ३ जनालाई कुलपति पदक, ३ जनालाई उपकुलपति पदक र आंगिक क्याम्पसमा स्नातकोत्तर तहक उत्कृष्ट ३५ जनालाई प्रमाण पत्र र पदक समेत प्रदान गरिएको थियो ।
समारोहमा अवसरमा कुलपति ओली, प्रा.डा.लामा, प्रदेश प्रमुख यज्ञराज जोशी, कर्णाली प्रदेश सरकारका मुख्यमन्त्री तथा मन्त्रिपरिषदका सदस्यहरू, विश्वविद्यालयका उपकुलपतिसँगै विभिन्न संकायका प्रमुखसँगै दीक्षित विद्यार्थी र उनका अभिभावकहरुको उपस्थित रहेको थियो ।
कुलपति एवम् प्रधानमन्त्री ओलीले दीक्षान्त समारोहमा उपस्थित भइ शुक्रबार नै कर्णाली प्रदेश सभामा समेत सम्बोधन गरेका थिए । प्रदेश सभामा सम्बोधन गरेपछि प्रधानमन्त्री ओलीले कर्णाली प्रदेश रंगशालाको निरीक्षण समेत गरेका थिए ।
.jpg)
