२०८१ चैत २१ गते बिहिवार / Apr 03 , 2025 , Thursday
२०८१ चैत २१ गते बिहिवार
Ads

कतारमा बृहत् इफ्तार कार्यक्रम सम्पन्न

draupadi film
तिलु शर्मा पौडेल
२०८१ फागुन २३ गते २१:४२
कतारमा बृहत् इफ्तार कार्यक्रम सम्पन्न

दोहा कतार : गैरआवासीय नेपाली संघ, राष्ट्रिय समन्वय परिषद् (एनआरएनए एनसीसी) कतारको समन्वयमा बृहत् इफ्तार कार्यक्रम सम्पन्न भएको छ ।शुक्रबार मुस्लिम धर्मावलम्बीको पवित्र महिना रमदानको अवसरमा फूलबारी रेस्टुरेन्टको हलमा एनसीसीसहित कतारमा स्थापित करिब ४ दर्जन संघसंस्थाको संयुक्त आयोजनामा शुभकामना आदानप्रदानसहित इफ्तार कार्यक्रम सम्पन्न भएको हो ।

कार्यक्रमको उद्घाटन कुरान तिलावात (मौलाना जनाव) बाट गरिएको थियो । इस्लाम धर्मावलम्बीहरूको सबैभन्दा पवित्र महिना रमदानको महत्वका बारेमा धर्मगुरुहरूले प्रकाश पारेका थिए । गुरुहरूले रमदानमा कठोर उपवास बस्ने, सामूहिक इफ्तार गर्ने, सामूहिक नमाज कल्याणका लागि अल्लाहसँग दुआ (प्रार्थना) गर्ने, मौन व्रत राखे पुण्य प्राप्त हुने बताए । रमदान भन्ने बित्तिकै केबल व्रत अनि रोजाका कुरा मात्र नभई सामाजिक, सांस्कृतिक, चालचलन र परापूर्वकालीन निरन्तरता तथा पवित्रताका अभ्यासहरूको समायोजन रहेको उनीहरूले बताएका थिए । कुरानका अनुसार रोजा राख्दा अप्रिय बोली बोल्ने, झुटो बोल्ने, हिंसा गर्ने, गैरसामाजिक कार्य गर्ने, अर्काको अपमान गर्ने र शारीरिक सम्पर्क गर्नेहरूलाई व्रतको फल नमिल्ने उल्लेख गरिएको उनीहरूले बताएका छन् । 

कार्यक्रममा कतारका लागि नेपाल सरकारका पर्यटनदूत राजेन्द्रकुमार शर्मा, एनआरएनए आइसीसीका उपाध्यक्ष राज रेग्मी, आयोजक संस्थाका अध्यक्ष, प्रतिनिधिसहित विभिन्न प्रदेश, सामुदायिक र जिल्ला संस्थाका प्रमुखहरू तथा प्रतिनिधिहरुको उपस्थितिसहित शुभकामना मन्तव्य राखेका थिए । कार्यक्रममा कतार भ्रमणमा रहेका तेक्वान्दो खेलाडी मोहमद उमर खानको विशेष आतिथ्यता रहेको थियो । 

नेपाली राजदूतावास कतारका राजदूत रमेशचन्द्र पौडेलको प्रमुख आतिथ्यता तथा एनसीसी कतारका अध्यक्ष रमेश भट्टको अध्यक्षतामा इफ्तार कार्यक्रम सम्पन्न भएको हो । आफ्नो शुभकामना मन्तव्य राख्दै प्रमुख अतिथि पौडेलले एनआरएनए कतारले कतारमा स्थापित संघ-संस्थाहरूको नेतृत्व गर्दे भाइचाराको सम्बन्ध बनाइराखेकोमा खुसी व्यक्त गर्दै रमदानको शुभकामनासहित एनसीसीले आगामी दिनमा पनि यस्ता कार्यक्रमलाई निरन्तरता दिनुपर्ने बताए ।

कार्यक्रममा उपस्थितलाई एनसीसी कतारका प्रथम उपाध्यक्ष कृष्ण पन्थीले स्वागत मन्तव्यद्वारा स्वागत गरेका थिए । महासचिव रविन मगरले सहजीकरण गरेको कार्यक्रमको समापन गर्दै सभाध्यक्ष भट्टले संयुक्त कार्यक्रममा जोडिने संघसंस्था, मौलाना तथा गुरुहरूलाई आभार व्यक्त गरेका थिए । अरबिक भाषाबाट लिइएको रमदान शब्दको अर्थ अत्यन्त गर्मी, तातेको जमिन, खाना तथा पानीको दुःख भएको समय भन्ने बुझाउँछ ।

रोजा पुस्तक विमोचन

प्रोफेसर मैलाना मोहम्मद रमजान अलि मियाँद्वारा लिखित ४१औं पुस्तक 'रोजा'को प्रि-विमोचन गरिएको छ । उक्त पुस्तक कार्यक्रमका प्रमुख अतिथि, सभाध्यक्षसहित कार्यक्रमका विशिष्ट व्यक्तित्वहरूले विमोचन गरेका थिए । उक्त पुस्तकमा रोजाको परिचय, इतिहास र महत्वबारे प्रकाश पारिएको छ । २ सय बढी पृष्ठ रहेको उक्त पुस्तकले रोजासम्बन्धी महत्त्वपूर्ण विषयहरू उजागर गरेको लेखक मियाँले बताए । पुस्तक रोजा उपवास र व्रतसँग पनि सम्बन्धित रहेको हुँदा इस्लाम धर्मावलम्बीबाहेक आम पाठकका लागि पनि पठनीय रहेको छ ।

ADV

सम्बन्धित खबर

Advertise