सुभेन्द्र दास/मध्यान्ह
लहान : सिरहा जिल्लाको गोलबजार नगरपालिकाले जिल्लामै पहिलोपटक खेलग्राम निर्माण थालेको छ । नगरले २ नम्बर वडास्थित गुरुधाममा ५२ बिघा क्षेत्रफलमा खेलग्राम बनाउन लागेको हो ।
७ बिघा जग्गामा दक्षिण र उत्तरतिर दुईवटा प्यारापिट निर्माण गरिएको छ । यस वर्ष पूर्वाञ्चल खेलकुद विकास समितिको ३१ लाख रुपैयाँ लगानीमा प्यारापिट बनाइएको हो । त्यसै गरी दक्षिणतिरबाट प्रदेश सरकारको ६५ लाख रुपैयाँ लागत र नगरपालिकको १५ लाख रुपैयाँ साझेदारीमा प्यारापिट बनाइँदै छ ।
यस वर्ष ६५ लाख रुपैयाँमध्ये ३४ लाख रुपैयाँ निकासा भएको नगरपालिकाका खेलकुद प्रशिक्षक कसम लामाले मध्यान्ह राष्ट्रिय दैनिकलाई बताए । ‘एक स्थानीय तह एक खेलग्राम’ योजनाअन्तर्गत काम थालिएको नगरपालिकाले जनाएको छ ।
त्यसैगरी ९० लाख रुपैयाँ लागतमा गोलबजार नगरपालिका–४ मा कभर्डहल निर्माण गरिएको छ । नगर प्रमुख देवनाथ साहले जिल्लामै खेलक्षेत्रमा उदाहरणीय बन्न ५२ बिघा क्षेत्रफलमा क्रिकेट मैदान, स्विमिङ पुल, भलिबल कोर्ट निर्माण गर्न गुरुयोजना बनाइएको मध्यान्हलाई जानकारी दिए ।
‘जिल्लामै स्टेडियम छैन,’ उनले भने, ‘खेलकुदको विकासका लागि गुरुयोजना बनाएर अघि बढेका छौं ।’ नगरपालिकाका अनुसार एकै थलोमा सबै खेल खेलाउन मिल्ने गरी पूर्वाधार बनाउन लागिएको हो ।नगर प्रमुख साहको खेल क्षेत्र प्रतिको प्रोत्साहनले जिल्ला मै खेलाडी र खेलप्रेमीहरुमा उत्साह बढाएको छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies