डोल्पा : डोल्पाको ठुली भेरी नगरपालिकाले पहिलोपटक नगरबस सञ्चालन गरेको छ । सोमबार त्रिपुरासुन्दरी मन्दिरमा विशेष पुजापाठ गरेर  नगरबस सञ्चालनमा ल्याइएको हो । डोल्पामा स्थानीय सरकारले नगर वस सञ्चालन गर्ने पहिलो स्थानीय तह ठुली भेरी नगरपालिका बनेको छ ।

सडकको पहुँच पुगेसँगै जिल्लाका ८ वटा स्थानीय तह मध्य सवैभन्दा पहिलोपटक ठुली भेरी नगरपालिकाले नगरबस सञ्चालन गरेको हो । यो नगरबस हाल ठुली भेरी नगरपालिकाको दुनै-रुपगाड-कालागौडा-मतिपुर-डाँगीवाडा र जुफालसम्म चल्ने छ ।

ठुली भेरी नगरपालिकाभित्र अधिकांश बस्तीमा सडकको विस्तार भइसकेकोले नगरबासीलाई यातायातको सुविधा सुलभ हिसाबले दिन नगरबस सञ्चालनमा ल्याइएको ठुली भेरी नगरपालिकाका नगर प्रमुख सुवर्ण कुमार बुढाले बताए ।

नगर प्रमुख बुढाले भने 'नगरक्षेत्रका नगरबासीहरूलाई कार्यालयको काममा सदरमुकाम दुनै पुग्न घन्टौं लाग्ने र निजी गाडीको चर्को भाडाले मारमा परेको हुँदा सुलभ यातायातमा यात्रा गराउन नगर बस सञ्चालन गरेका छौं ।' रिजर्भ गर्न सबैको पहुँच पुग्दैन नगरपालिकाका नागरिकले सहज र सुलभ यात्रा गर्न पाउनुपर्छ महंगीको भारबाट नागरिकलाई छुटकारा दिन र घर आँगनबाटै सशुल्क यातायातको सुविधा दिन नगरबस किनेर संचालनमा ल्याएको नगर प्रमुख बुढाको दाबी छ ।

यी तोकिएका ठाँउबाट नागरिकले नगरपालिकाले तोकेको सस्तो भाडामा यातायात गर्न पाउनेछन् । अधिकतम दुई सयमा नगर बसमा नागरिकले यात्रा गर्न पाउने र सडकको थप व्यवस्थापनसँगै अन्य गाउँमा पनि नगर बसले सेवा दिने गरी काम गरिरहेको निमित्त प्रमुख प्रशासकीय अधिकृत डिल प्रसाद रोकायाले बताए । रोकायाले हाल डोल्पामा पहिलो पटक नगर बस सुरुवात गरिएकाले एकै पटक धेरै ठाउँमा सेवा दिन कठिन नै हुने र प्राविधिक कुरा मिलाएर सेवा थप विस्तार गरिने जानकारी दिए । यसबाट नगरपालिकाले आम्दानी पनि गर्ने र नागरिकले सहज सुलभ सेवा पनि पाउने अपेक्षा ठुली भेरी नगरपालिकाले गरेको छ ।