सुशील सुवेदी/मध्यान्ह
सिन्धुपाल्चोक : महिला आत्मनिर्भरता केन्द्रको २८ औँ वार्षिक साधारणसभा बुधबार मेलम्चीमा सम्पन्न भएको छ । कार्यक्रममा बागमती प्रदेशका सांसद इन्द्रमाया गुरुङले संस्थालाई शुभकामना दिएकी छन् । उनले सबै जनाको सल्लाह र सुझावलाई समेट्दै अगाडि बढ्ने हो भने अझै प्रगती गर्न सक्ने बताइन् । गुरुङले ठूला चुनौती पार गर्दै अहिले यो अवस्थासम्म आएको भन्दै संस्थाले अझै समुदायको मन जित्दै अगाडि बढ्नुपर्नेमा जोड दिइन् ।
उनले विगतमा धेरै जनाले त्याग गरेर संस्था बलियो भएको स्मरण गरिन् । कार्यक्रममा मेलम्ची नगरपालिकाका उपप्रमुख एवम् महिला आत्मनिर्भरता केन्द्रका संस्थापक अध्यक्ष भगवती नेपालले संस्थाले अन्तर्राष्ट्रिय महिला आन्दोलन हिस्सा ओगट्नुपर्ने बताउँदै अझैपनि सानो ठाउँमा खुम्चिएको बताइन् ।
उनले संस्थाले अझै सक्रिय भएर लाग्न पर्ने अवस्था आएको बताइन् । उपप्रमुख नेपालले ३ वटै सरकारसँग समन्वय गरेर काम गर्न पर्ने भन्दै प्रत्यक्ष रुपमा लागत साझेदारीतामा स्थानीय सरकार ,प्रदेश सरकार र केन्द्र सरकारसँग काम गर्न सुझाब दिइन् ।
उनले अहिलेको समुदायको आवस्यकताको आधारमा कार्यक्रम बनाउनुपर्ने भन्दै कार्यक्रम निर्माण गरिरहँदा सरसल्लाह र छलफल गरेर मात्र बनाउन सुझाव दिइन् । कार्यक्रममा महिला आत्मनिर्भरता केन्द्रका अध्यक्ष डोल्मा तामाङले सञ्चालक समितिले दिएको सुझाबलाई आत्मसात गर्दै अगाडि बढ्ने प्रतिबद्धता जनाइन् ।
उनले भेलाबाट आएको सुझावलाई सिकाइको रुपमा लिएर अगाडि बढ्ने प्रतिबद्धता व्यक्त गरिन । अध्यक्ष तामाङले अगामी ३ महिनाभित्र संस्थाको आफ्नै भवनबाट काम शुरु गर्ने र सुरक्षित गृहलाई समेत सार्ने जानकारी दिइन् । उनले ३ वटै सरकारसँग समन्वय गरेरै मात्र काम भएको भन्दै यो बिचमा कोभिड–१९ ले गर्दा धेरै काम गर्न नसकिएको प्रष्ट्याउँदै आगामी दिनमा काम गर्ने बताइन् ।
कार्यक्रममा मेलम्ची नगरपालिका वडा नम्बर ११ का वडा अध्यक्ष रुद्र प्रसाद दुलालले महिलाको हक र अधिकारको लागि लामो समय देखि संर्घष गरेर आएको भन्दै संस्थाको कामको प्रशंसा गरेका थिए । उनले विशेष गरि शैक्षिक गतिविधिमा सक्रिय रहेको भन्दै संस्थाले गर्दा धेरै गरिब जेहेन्दार विद्यार्थीहरुले पढ्न पाएको बताए ।
कार्यक्रममा संस्थाका व्यवस्थापक कृष्ण गुरुङले नीति अनुसार मात्र संस्था चल्ने गरेको हुनाले आज यो स्थानसम्म आइपुगेको बताउँदै महिला तथा, लक्षित बर्गको अधिकारका लागि काम गरिरहेको जानकारी दिए । विपद्को बेला संस्थाले समुदायसँग प्रत्यक्ष रहेर काम गरेको हुनाले समुदायले संस्थाप्रति विश्वास राखेको उनको भनाइ छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies