कपिलवस्तु : नवनियुक्त प्रधानमन्त्री केपी शर्मा ओलीले २२ सदस्यीय मन्त्रिपरिषद् गठन गरेका छन् । पद तथा गोपनीयताको शपथ लिएकै दिन प्रधानमन्त्री ओलीले मन्त्रिपरिषद् गठन गरेका हुन् ।
२२ सदस्यीय मन्त्रिपरिषद्मा लुम्बिनी प्रदेशबाट दुई जना मन्त्री भएका छन् । लुम्बिनीबाट विष्णुप्रसाद पौडेल उपप्रधान तथा अर्थमन्त्री भएका छन् । रूपन्देही क्षेत्रनम्बर २ बाट निर्वाचित भएका उनी बुटवलका बासीन्दा पनि हुन् ।
नेकपा एमालेका केन्द्रीय उपाध्यक्ष समेत रहेका पौडेल एमालेभित्र ओलीका विश्वास पात्र तथा प्रभावशाली मानिन्छन् । उनी योसँगै अर्थ मन्त्रालयमा पाँचौं पटक मन्त्री बनेका हुन् ।
सोमबार अर्थ मन्त्रालय पुगेर पदभार ग्रहण गर्दै मन्त्री पौडेलले स्थायी सरकार गठन भएसँगै मुलुकको अर्थतन्त्रमा देखिएका समस्या समाधान हुँदै जाने विश्वास व्यक्त गरेका छन् । सरकारको साेच र दृष्टिकोण कार्यान्वयन गर्न बजेट बाधक नबन्ने समेत उनले बताए । यदि बाधा देखियो भने कसरी फुकाउने भनेर कानूनी र संवैधानिक व्यवस्थाका आधारमा संशोधन प्रक्रियामा जाने उनको भनाइ छ । उनले शेयर बजार अर्थतन्त्रको ऐनाका रूपमा रहेकाले यो क्षेत्र सन्तुलित ढंगले अघि बढोस् भन्ने चाहना रहेको बताए । पौडेलले विकास वित्तका क्षेत्र पहिचानका लागि अध्ययन गरिनेसम्बन्धी पहिलो निर्णयमा हस्ताक्षर गरे ।
यस्तै बलराम अधिकारी पनि नेकपा एमालेबाट भूमि व्यवस्था, सहकारी तथा गरीबी निवारणमन्त्री बनेका छन् । कपिलवस्तु १ बाट निर्वाचित अधिकार बाणगंगा नगरपालिका–८, चप्परगाउँ, कपिलवस्तुका हुन् ।
२०३४ सालदेखि विद्यार्थी राजनीति शुरु गरेका उनी २०३८ सालमा कास्कीमा विद्यार्थी र पार्टी राजनीति, २०४३ सालमा कपिलवस्तुमा बसाइँ सरेपछि अधिकारीकै नेतृत्वमा नेकपा माले पार्टी सम्पर्क कमिटी गठन, २०४७ सालमा एमाले गठन भएपछि जिल्ला सचिवालय सदस्य र संगठन विभाग प्रमुख, २०५५ सालदेखि १५ वर्षसम्म पार्टीको प्रमुखका रूपमा सचिव र पार्टी अध्यक्षात्मक प्रणालीमा गएपछि अध्यक्ष, एमाले लुम्बिनी प्रदेश समितिको कार्यालय सचिव भइ दुई वर्ष काम गरेको अनुभव उनमा छ ।
अहिले उनी एमालेका केन्द्रीय सदस्य र कपिलवस्तु इन्चार्ज रहेका छन् । २०५६ सालको संसदीय निर्वाचनमा क्षेत्र नं. ३ र २०६४ मा क्षेत्र नं. १ बाट संविधान सभा सदस्यमा प्रतिस्पर्धा गरेका थिए । दुवै निर्वाचनमा पराजित भएका उनी २०७० मा क्षेत्र नं. १ बाट संविधान सभा सदस्यमा विजयी भएका थिए । साढे चार दशकभन्दा लामो राजनीतिको अनवरत यात्रामा रहेका अधिकारी राजनीतिमा अनुभवी नेताका रूपमा चिनिन्छन् । राजनीतिक आन्दोलनका क्रममा उनी चार पटक प्रहरी हिरासतमासमेत परेका थिए । उनी दोस्रो पटक भूमि व्यवस्था, सहकारी तथा गरीबी निवारणमन्त्री बनेका हुन् ।
