अहिले नेपालको राष्ट्रिय राजनीति अमेरिकी सहायता परियोजना मिलिनियम च्यालेन्ज कर्पोरेसन (एमसीसी) अनुमोदन गर्ने वा नगर्ने भन्नेमा ध्रुवीकरण भएको छ । यो ध्रुवीकरण कायमै रहँदा एमसीसीका उपाध्यक्ष फातिमा सुमार नेपाले नेपाल भ्रमण गरी शीर्ष नेतृत्वसँग भेटवार्ता समेत गरिन् । उनी नेतृत्वको टोलीले प्रधानमन्त्री शेरबहादुर देउवा, अर्थमन्त्री जनार्दन शर्मा, उर्जामन्त्री पम्फा भुसाल, प्रमुख विपक्षी दल नेकपा एमालेका अध्यक्ष केपी शर्मा ओली, सत्ता साझेदार दलहरु नेकपा माओवादी केन्द्रका अध्यक्ष पुष्पकमल दाहाल प्रचण्ड र नेकपा (एकीकृत समाजवादी) का अध्यक्ष माधवकुमार नेपाल लगायत नेताहरुसँग भेटवार्ता गरेको थियो । तर कुनैपनि नेताले एमसीसी पारित हुन्छ वा हुन्न भन्ने प्रष्ट पारेनन् । बरु, सुमार आफैले सकारात्मक बनेको प्रतिक्रिया दिइन् ।
बरु, प्रचण्ड र माधव नेपाल लगायत नेताहरुले नेपालको अहित हुनेगरी एमसीसी अनुमोदन नहुने सार्वजनिक अभिव्यक्ति दिएका छन् । एमाले अध्यक्ष एवम् पूर्वप्रधानमन्त्री ओलीले कुनै प्रष्ट निर्णय दिएनन् । सत्तारुढ दलहरुको निर्णय हेरेर निर्णय लिने ओलीको भनाइ थियो । नेपाल आउनासाथ ओलीलाई सुमारले पहिलो भेट दिएकी थिइन् । एमसीसी अनुमोदन गर्ने पक्षमा ओलीले यसअघि अगुवाइ गरेका थिए । तर साविकको नेपाल कम्युनिष्ट पार्टी (नेकपा) भित्रै सहमति जुटाउन सकेनन् । नेकपाको केन्द्रीय कमिटीले एमसीसी अध्ययन गर्न कार्यदल बनायो । कार्यदलले संशोधन सहित पारित गरिनुपर्ने निष्कर्ष निकाल्यो । कार्यदलको यो सुझाव पछि एमसीसी त अनुमोदन भएन, तर नेकपा विभाजित हुन पुग्यो ।
त्यसैबेला देखिको एमसीसीबारे भएको धु्रविकरण अहिले पनि कायमै छ । अर्थात् केही वर्ष यता राजनीतिक कायम धु्रबिकरणले स्थायी रुप लिन पुगेको छ । यो ध्रुवीकरणले सत्तारुढ दल काँग्रेसमा एकमत छैन । सभापति देउवा र संस्थापन इतर नेताहरु बीच मतभेद कायमै छ । देउवा, ओली, महन्थ ठाकुर, कमल थापाहरुको निकटता एकातिर देखिन्छ भने अर्कातिर फरक धु्रबिकरण कायम छ । यसरी बनेको राजनीतिक ध्रुवीकरण एमसीसीबारे मात्रै नभएर अन्य विषयवस्तुमा समेत कायम छ । प्रचण्ड, माधव नेपाल, उपेन्द्र यादवहरुकै पक्षमा काँग्रेसका संस्थापन इतर पक्षका नेताहरुको झुकाव बढी देखिन्छ । राजनीतिक ध्रुवीकरण बढ्दै जाँदा नेकपा र त्यसपछि एमाले विभाजित भइसकेको छ भने जनता समाजवादी पार्टी (जसपा) विभाजित बनेको छ । काँग्रेसभित्रको संकट झनै चुलिदो छ । यसको असर भने मुलुकमाथि परेको देखिन्छ । जसलाई रोक्दै विषयवस्तु, संविधान र नेपाली जनताको हितमा आधारित पक्षधरता जरुरी छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies