बुटवल : बुटवलमा आगामी माघमा कृषि मेला हुने भएको छ । बुटवल उद्योग वाणिज्य संघ, रुपन्देहीको आयोजनामा यहि माघमा कृषि मेला गर्न लागिएको हो । सोमबार बसेको कार्यसमिति बैठकले आगामी माघ १४ देखि १८ गतेसम्म बुटवलको प्रदर्शनीस्थल ‘बुटवल मण्डप’मा कृषि मेला गर्ने निर्णय गरिएको संघका महासचिव मुक्तिप्रसाद अधिकारीले जानकारी दिए ।
बुटवल उद्योग वाणिज्य संघ, रुपन्देहीले कृषि क्षेत्रको विकास र प्रवद्र्धनका लागि संघले २०६२ सालदेखि गर्दै आएको विशिष्टिकृत कृषि मेला गर्दै आएको छ । संघका अध्यक्ष हरिप्रसाद अर्यालको अध्यक्षतामा बसेको कार्यसमिति बैठकले आगामी माघमा आयोजना गर्न लागिएको कृषि मेलालाई नमुना कृषि मेलाका रुपमा आयोजना गर्ने निर्णय गरिएको हो । नेपालमा परम्परागत रुपमा हुँदै आएको कृषि प्रणाली पछिल्लो समयमा व्यवसायिक रुपमा सुरुवात भएको र यसलाई अझै कसरी वैज्ञानिक बनाउन सकिन्छ र कसरी प्रतिस्पर्धी क्षमताको विकास गर्न सकिन्छ भन्ने कुरामा विशेष ध्यान दिइने अध्यक्ष अर्यालले बताए ।
उनका अनुसार कृषि प्रणालीको विकास र प्रवर्धनका लागि किसान, सेवा प्रदायक संस्थाहरू, उपभोक्ता र सरकारबीचको तारतम्य मिल्न आवश्यक छ । ‘मेलामा यी चार संयन्त्रको तारतम्य कसरी मिलाउन सकिन्छ भन्ने कुराको समेत खोजी हुनेछ’, उनले भने । त्यसैगरी कृषिजन्य उत्पादनहरूको प्रदर्शनी, बिक्रि वितरण, कृषि प्रविधि, औजार तथा उपकरणको प्रदर्शनी तथा विक्रि वितरण, किसान, उपभोक्ता, सेवा प्रदायक संस्थाहरू र सरकारबीच अन्तरक्रिया लगायतका कार्यक्रम गरिने छ ।
