अर्घाखाँची : अर्घाखाँचीको सन्धिखर्क नगरपालिका जनताको सहजताको लागि योजना सम्झौता वडा तहमै पुगेर गर्ने व्यवस्था सुरु गरेको छ । धेरैजसो नगरपालिकामा वडाभरिका योजना सम्झौता कार्यालयमै हुने व्यवस्था रहे पनि सन्धिखर्कले विभिन्न वडामा समय तोकेर योजना सम्झौता गर्ने तयारी गरेको हो ।
योजना सम्झौताका लागि टाढाबाट नगरपालिका धाउनुपर्ने र झन्झटिलो प्रक्रियाका कारण नागरिकहरूले सास्ती खेप्दै आएको गुनासो आएपछि, विगतका वर्षदेखि नै नगरपालिकाका कर्मचारीहरूले बिदाको दिन पनि नछोडि वडामै पुगेर सम्झौता गर्दै आएको नगरप्रमुख कृष्णप्रसाद श्रेष्ठले जानकारी दिए ।
प्रमुख प्रशासकीय अधिकृत प्रमोद खनालका अनुसार सम्झौताका लागि आवश्यक कागजात वडामै तयारी अवस्थामा राख्ने र त्यसपछि नगरपालिका कार्यालयबाट कर्मचारी खटिएर बिनियोजित योजनाको सम्झौता गरिने गरिएको छ । वडामा पुगेर योजना सम्झौता गर्दा उपभोक्ता समितिहरूलाई सहज हुने उनको भनाइ छ ।
यसैक्रममा नगरपालिका योजना अधिकृत दिलिप केसीको नेतृत्वमा सन्धिखर्क–५ वाङलामा गएर उपभोक्ता समितिसँग नगरपालिकाले सञ्चालन गर्ने योजनाहरूको सम्झौता बिहीबार गरिएको प्रमुख प्रशासकीय अधिकृत खनालले जानकारी दिए ।
‘वडा पुग्नु भन्दा पहिला वडा सचिवमार्फत सबै कागजात तयारी गर्न भन्छौं। त्यसअनुसार योजना सम्झौता सजिलै हुन्छ,’ उनले भने । नगरपालिकामा आउजाउ गर्दा उपभोक्ताले खर्च र समय दुवै जाने गरेको समस्या वडा तहमै सम्झौता हुँदा हटेको र समितिहरू खुसी रहेको उनको भनाइ छ ।
नगरपालिकाले योजना सम्झौतासँगै उपभोक्ता समितिको नाममा वडा तहमै बैंक खाता खोलिदिने तयारी पनि गरेको छ । चालु आर्थिक वर्षमा सञ्चालन हुने सबै योजनाको सम्झौता र बैंक खाता खोल्ने काम वडामै पूरा गर्ने तयारी भइरहेको नगरप्रमुख श्रेष्ठले बताए ।
योजनाबारे वडामा पुगेपछि वास्तविक आवश्यकताबारे प्रत्यक्ष जानकारी पाइनु, जनप्रतिनिधि र कर्मचारीले स्थानको अवस्था बुझेर योजना अघि बढाउन सक्नु, दुवै कारणले यो प्रक्रिया प्रभावकारी भएको नगरपालिका कर्मचारीहरूको भनाइ छ ।
.jpg)
