रुकुम पश्चिम : रुकुम पश्चिमको चौरजहारी नरपालिकामा मंसिर २६ गते कृषि मेला प्रदर्शनी हुने भएको छ । नगरपालिकाको आर्थिक वर्ष २०८२/०८३ को वार्षिक स्वीकृत कार्यक्रम अनुसार नगरपालिकास्तरीय कृषि मेला प्रदर्शनी हुने भएको हो । मेलामा उत्कृष्ट कुषकलाई पुरस्कारसहित सम्माान समेत गरिने नगरपालिका प्रमुख पुष्प वादीले जानकारी दिए ।
नगरपालिकाभित्रका कृषकहरूले आ–आफ्नो कृषि उत्पादन/उपजहरू प्रदर्शनी स्टलमा दर्ता गरी पुरस्कार जित्न सक्ने अवसर रहेकाले कृषि प्रदर्शनी मेलामा सहभागी हुन चौरजहारी नगरपालिकाका निमित्त प्रमुख प्रशासकीय अधिकृत शेरप्रसाद ढकालले कृषकहरूमा अनुरोध गरेका छन् ।
कृषि उपज संकलन तथा बिक्री केन्द्रको भवन रहेको वडा नम्बर ११ बसपार्क टाटामा कृषि प्रदर्शनी मेला आयोजना गरिने नगरपालिकाले जनाएको छ । कृषि प्रदर्शनी मेलामा कृषि उपजहरू खाद्यान्न बाली अन्तर्गत धान, मकै, गहुँ, मौसमी बेमौसमी तरकारी बालीहरू अन्तर्गत काउली, बन्दा, टमाटर, खुर्सानी, प्याज, फलफूल बालीअन्तर्गत सुन्तला, कागती, मौसम, किवी, केरा, भुईंकटहर, अमिलो आदि प्रदर्शनमा रहनेछन् । जसका लागि कृषकहरूले कम्तीमा १ किलो पारदर्शी प्लास्किकमा प्याकेजिङ बोटसहित हाँगासहितको फलहरू ल्याउनुपर्ने छ ।
त्यस्तै मसला बाली अन्तर्गत अदुवा, बेसार, अलैंची, कफी, उखु बोट र दलहन तथा तेलहन बाली अन्तर्गत सिमी, बोडी, भटमास, तिल, तोरी, रायो, मूलाकोबोटसहित वा कम्तीमा १ किलो प्याकेजिङ गरेर कृषकले प्रदर्शनी स्टलमा राख्नुपर्ने छ । सोही मध्यमबाट छनोट गरेर स्थान हासिल गर्ने कृषकलाई पुरस्कारसहित सम्मान गरिने नगरपालिकाले जनाएको छ ।
प्रदर्शनी मेलामा प्रथम आउने कृषकलाई नगद ३ हजार रुपैयाँसहित प्रमाणपत्र, दोस्रो स्थान प्राप्त गर्ने कृषकलाई नगद २ हजारसहित प्रमाणपत्र, तेस्रो स्थान प्राप्त गर्ने कृषकलाई १ हजार र सान्तवना हुने कृषकलाई ७ सय रुपैयाँसहित प्रमाणपत्रको व्यवस्था गरिएको चौरजहारी नगरपालिका रुकुम पश्चिमले जनाएको छ ।
.jpg)
