रौतहट : रौतहट निर्वाचन क्षेत्र नम्बर २ मा सम्पन्न मतदान प्रक्रियामा व्यापक धाँधली र अनियमितता भएको आरोप लगाउँदै किरणकुमार साहले आठ वटा मतदान केन्द्रमा पुनः मतदान गराउन माग गरेका छन् । नेपाली कम्युनिष्ट पार्टीका उम्मेदवार साहले बिहीबार मुख्य निर्वाचन अधिकृतको कार्यालयमा औपचारिक निवेदन दर्ता गराउँदै ती केन्द्रको मतदान बदर गरी नयाँ मिति तोक्न आग्रह गरेका हुन् ।

साहद्वारा दर्ता गरिएको निवेदनमा निर्वाचनको निष्पक्षतामाथि गम्भीर प्रश्न उठाइएको छ । विशेषगरी परोहा नगरपालिका र राजपुर नगरपालिका का विभिन्न वडामा सत्ता र शक्तिको दुरुपयोग भएको दाबी गरिएको छ ।

उनका अनुसार केही केन्द्रमा नेपाली कांग्रेसका कार्यकर्ताले मतदान केन्द्र नियन्त्रणमा लिई सर्वसाधारण मतदातालाई प्रवेश गर्न नदिएको, अनुपस्थित मतदाताको नाममा जबरजस्ती मत खसालिएको तथा मतपेटिकामा एकमुष्ठ मत हालिएको आरोप छ ।

त्यसैगरी, विपक्षी उम्मेदवारका प्रतिनिधिमाथि कुटपिट गरी मतदान केन्द्रबाट बाहिर निकालिएको र मतदातालाई त्रसित पारिएको पनि निवेदनमा उल्लेख गरिएको छ । सुरक्षाकर्मीको उपस्थितिका बाबजुद अराजक समूहले मतदान प्रक्रियामा हस्तक्षेप गरेको साहको दाबी छ ।

उम्मेदवार साहले निष्पक्ष छानबिन नभएसम्म र धाँधली भएका आठ केन्द्रमा पुनः मतदानको मिति घोषणा नगरेसम्म आफू र आफ्नो समूह मतगणनामा सहभागी नहुने स्पष्ट पारेका छन् ।

“लोकतन्त्रमा स्वच्छ र निष्पक्ष निर्वाचन हुनुपर्छ । यहाँ शक्तिको आडमा बुथ कब्जा गरिएको छ । जबसम्म ती आठ केन्द्रमा पुनः मतदान हुँदैन, हामी मतगणना स्वीकार गर्दैनौँ,” साहले बताएका छन् ।

मुख्य निर्वाचन अधिकृतको कार्यालयले निवेदन प्राप्त भएको पुष्टि गर्दै विषयबारे निर्वाचन आयोगलाई जानकारी गराइने जनाएको छ । प्राप्त प्रमाण र तथ्यका आधारमा आवश्यक निर्णय लिइने कार्यालयको भनाइ छ ।

यसबीच, क्षेत्रभर सुरक्षा व्यवस्था कडा पारिएको छ । अन्य मतदान केन्द्रका मतपेटिकाहरू कडा सुरक्षा घेराभित्र राखिएको प्रशासनले जनाएको छ ।

घटनापछि रौतहटका केही स्थानमा तनावपूर्ण अवस्था सिर्जना भएको छ । कुनै पनि अप्रिय घटना हुन नदिन ठूलो संख्यामा नेपाल प्रहरी र सशस्त्र प्रहरी बल परिचालन गरिएको छ ।

स्थानीय मतदाताहरूले भने राज्यले निष्पक्ष छानबिन गरी वास्तविक जनमतको सम्मान गर्नुपर्ने माग गरेका छन् ।