बझाङ : नेकपा एमालेका केन्द्रीय सदस्य तथा युवा नेता ऐन महरले बझाङको छविसपाथिभेरा गाउँपालिका–१ परिङ्गालमा गएको पहिरोको अवलोकन गरेका छन् । भदौ १२ गते राति गएको पहिरो पीडित करन गिरिको परिवारलाई भेटेर उनले आर्थिक सहयोग समेत गरेका छन् ।
पहिरोले छबिसपाथिभेरा गाउँपालिका–१ परिङ्गाल मालुझाडका गिरी सुतेकै अवस्थामा सेती नदीमा खसेका थिए । महरसँग कुरा गर्दै गिरिले पहिरोले टहरासँगै खाद्यान्न, लत्ताकपडा, नगद पैसा र बालबालिकाका स्कुलका प्रमाणपत्र बगाएको बताए । नेता महरले ५ हजार रूपैयाँ आर्थिक सहयोग गर्दै थप राहतको लागि सम्बन्धित निकायमा पहल गर्ने बताए ।
महरले भने,‘ढिलो गरेर भेटघाट गर्न आयो भनेर नसोच्नुहोला् । काम विशेषले जिल्ला बाहिर भएर हो । दुखद घटना भयो, यसमा मेरो ध्यानाकर्षण भएको छ । सम्बन्धित निकायमा राहतको लागि मेरो तर्फबाट हुने पहल गर्नेछु ।’
