बर्दिया : बर्दियामा गैंडाको आक्रमणबाट एक जना पर्यटक पथ प्रदर्शक (गाइड)को ज्यान गएको छ । गैंडाको आक्रमणबाट ठाकुरबाबा नगरपालिका वडा नं. ९ बस्ने अन्दाजी ३५ वर्षीय मनमोहन चौधरीको शुक्रबार बिहान मृत्यु भएको प्रहरीले जनाएको छ ।
अमेरिकी नागरिक एमसी लेन्डन शावान र शिव सामुदायिक वनका चौकीदार खिन्चु थारुसहित जंगल वाकमा निस्किएका उनलाई मधुवन नगरपालिका वडा नं. १ स्थित शिव सामुदायिक वनमा गैंडाले आक्रमण गरेको थियो ।
आक्रमणबाट उनको घटनास्थलमै ज्यान गएको र घाइते अमेरिकन नागरिक एमसी लेन्डन शावानको ठाकुरबाबा नगर अस्पताल भुरीगाउँमा उपचार भइरहेको जिल्ला प्रहरी कार्यालय बर्दियाले जनाएको छ ।
खिन्चु थारुको अवस्था सामान्य रहेको र घटनाबारे थप अनुसन्धान भइरहेको जिल्ला प्रहरी कार्यालयका प्रहरी नायव उपरीक्षक तुल्सीराम अर्यालले जानकारी दिए ।
