बझाङ : वर्षाका कारण विद्युत सेवा अवरुद्ध हुँदा बझाङका स्थानीयहरू तीन दिनदेखि अन्धकारमा बस्न बाध्य भएका छन् । भदौ २६ गतेबाट परेको अविरल वर्षाले राष्ट्रिय प्रशारण लाइनमा समस्या आएपछि जिल्लाको विद्युत सेवा पूर्णरुपमा अवरुद्ध भएको नेपाल विद्युत प्राधिकरण बझाङ वितरण केन्द्रका कर्मचारी राम कुँवरले बताए ।
तीन दिनदेखि विद्युत अवरुद्ध हुँदा स्थानीयको दैनिक जनजीवनका साथै व्यापार व्यवसाय र सरकारी कामकाज समेत प्रभावित भएको छ ।
विद्युत नहुँदा मोबाइल समेत चार्ज गर्न नपाएर स्थानीयको सञ्चार सम्पर्क टुटेको छ भने बन्द व्यापारदेखि लिएर कार्यालय र घरायसी कामकाज समेत समस्या आएको जयपृथ्वी नगरपालिका –१० चैनपुरमा व्यापार व्यवसाय गर्दै आएको मान बहादुर धामीले बताए । २६ गते रातिबाट बिजुली नआउँदा होटल, मासु पसल र दुग्ध व्यवसाय गर्नेलाई मर्का परेको छ । यस्तै, दुग्धजन्य पदार्थ पनि भण्डारण गर्न समस्या भएका कारण खेर फाल्नु परेको सदरमुकाम चैनपुरमा डेरी सञ्चालन गरिरहेका लोकेन्द्र खड्काले बताए ।
यस्तै विद्युत अवरुद्ध भएका कारण यहाँका रेडियो, ग्रिल उद्योग, कुटानी पिसानीमिल, फर्निचर उद्योग, बेकरी उद्योगको काम ठप्प भएको छ । जयपृथ्वी एफएम नेटवर्कका सञ्चालक प्रताप ओलीले बिजुली नहुँदा रेडियो बन्द गरेर बस्नु पस्नुपर्ने बाध्यता रहेको बताए ।
बुधबार राति जयपृथ्वी नगरपालिकाको तमैल नजिक आएको पहिरोले पोलमा क्षति पुर्याएपछि विद्युत सेवा अवरुद्ध भएको थियो । त्यो समस्या समाधान गर्नु अगावै बैतडीको भालुमारेमा दुई वटा पोल ढलेको र शनिबार तमैलमा पनि फेरि समस्या आएका कारण लामो समय विद्युत सेवा अवरुद्ध भएको नेपाल विद्युत प्राधिकरणको बझाङ वितरण केन्द्रका कर्मचारी राम कुँवरले जानकारी दिए ।
