काठमाडौं : राष्ट्रिय स्वतन्त्र पार्टी (रास्वपा) को राष्ट्रिय भेलामा जुटेको छ । पार्टी गतिविधि ठप्पप्राय भएको गूनासोकाबीच संघीय राजधानी काठमाडौंको प्रज्ञा भवनमा सुरु भएको रास्वपाको राष्ट्रिय भेलामा सहभागी उक्त पार्टीका नेता÷कार्यकर्ता उत्साही देखिन्थे । राष्ट्रिय भेला बुधवारसम्म चल्नेछ । 

पहिलो दिन राष्ट्रिय भेलाको उद्घाटन समारोहलाई सम्बोधन गर्दै सभापति रवि लामिछानेले दुईतिहाइको बहुमत नल्याउँदासम्म रास्वपा बनाउने अभियानमा निरन्तर जोडिरहन आह्वान गरे । 

नेताहरूका अनुसार राष्ट्रिय भेलामा देशभरबाट एक हजार ५०० बढी प्रतिनिधि सहभागी हुने तय गरिएको थियो । समग्र रुपमा एक हजार ६ सय सहभागी हुने भनिएतानि दुई हजार दुई सय बढी सहभागी भएको उक्त पार्टीका नेताहरू बताउँछन् ।

सहकारीसम्बन्धी संसदीय विशेष छानबिन समितिको प्रतिवेदन सार्वजनिक भएको र त्यसले पार्टीका सभापतिलाई दोषी करार नगरेको भनेर उक्त पार्टीका नेता÷कार्यकर्ताले खुसीयाली प्रकट गरेका छन् । कतिपयले अब लामिछानेलाई प्रधानमन्त्रीका रुपमा समेत प्रस्तुत गरेका छन् । 

उद्घाटन कार्यक्रमलाई सम्बोधन गर्दै सभापति लामिछानेले आफूलाई लाञ्छाम लाउनेहरूले प्रमाण दिन नसकेको बताए । ‘हिजो मात्रै प्रतिवेदन संसदमा पेश भएको छ । थाहा भयो प्रमाण भनेको कस्तो हुन्छ भन्ने कुरा, अब सहकारीको कुरा त सकियो । विषय सहकारीबाट गोखा मिडियातिर जान्छ’ उनले भने । 

सभापति लामिछानेले आफूले पार्टीको नामदेखि सहकारी प्रकरणसम्म लडिरहनुपरेको उल्लेख गर्दै पार्टी नेता कार्यकर्तालाई पनि जस्तोसुकै परिस्थितिमा दृढतापूर्वक लडिरहन आग्रह गरे । 

‘हामी र हाम्रो पार्टीमाथि निरन्तर प्रहार भइरहने छ ।  यस्ता आक्रमण तथा प्रहार सामना गर्न तयार रहौँ । रास्वपा जित्न र हार्नका लागि नभइ परिवर्तन र प्रेरणाका लागि राजनीतिमा होमिएको हो । हामी लड्यौँ भने आफ्नै गोडामा अल्झिएर लड्ने हो अरुले लडाउन सक्ने छैन’ उनले भने ।

उनले इलाममा संगठन र रणनीति बनाउन नसक्दा आफूहरू हारेको स्वीकार्दै आगामी २०८४ सालको निर्वाचनमा बहुमत ल्याउने गरी क्रियाशील हुन नेता कार्यकर्तालाई आग्रह गरे । 

मंगलबार भेलामा विभिन्न प्रतिवेदन र प्रस्ताव प्रस्तुत भएका छन् । सबै प्रदेशले रिपोर्टिङ गरको छ । आर्थिक, अनुशासन र संसदीय मामिलासँग सम्बन्धित प्रतिवेदनसमेत पेस भएको छ । विधान संशोधन, नीति–विचार, मूल्य–मान्यता, क्यान्डिडेट क्लब र लिडरसिप एकेडेमीबारेका प्रस्ताव समेत प्रस्तुत भएका छन् । 

बुधबार प्रस्तुत सबै प्रतिवेदन र प्रस्तावउपर समूहगत छलफल हुनेछ । बुधबार नै प्रश्नोत्तर हुनेछ । प्रश्नोत्तरका लागि तीन घण्टा समय छुट्याइएको छ । 
मंगलबार नै कार्यवाहक महामन्त्री एवम् संगठन विभाग प्रमुख कविन्द्र बुर्लाकोटीले सांगठनिक प्रतिवेदन पेस गरे । बुधबार सभापति रवि लामिछानेको राजनीतिक प्रतिवेदन पेस गर्नेछन् । त्यसपछि भेलाले पार्टीको राष्ट्रिय अभियान घोषणा तथा प्रथम महाधिवेशनको मिति तय गर्नेछ ।