दोहा, कतार : केही दिन पहिले एनआरएनए एनसीसी कतारको समन्वयमा कतारमा रहेका विभिन्न संघसंस्था प्रमुख तथा प्रतिनिधि, सामाजिक तथा बौद्धिक व्यक्तित्वहरुसँग अनलाइन पासपोर्ट स्लटका समस्या र निराकरणका उपायका बारेमा छलफल भएको थियो । उक्त छलफलमा दूतावासप्रति गरिएका शंका उपशंकाहरूको सूची बनाएर कार्यक्रमका सभापति तथा एनसीसी कतारका अध्यक्ष रमेश भट्टले शनिबार साँझ दूतावासको हलमा आयोजित एक कार्यक्रममा नेपाली दूतावास कतारका कार्यवाहक राजदूत कुमार राई र प्रथम सचिव कृष्ण कुमार सुवेदीसमक्ष पेस गरेका थिए । भट्टले सूची पेस गरेलगत्तै हलमा उपस्थितहरूले समेत विभिन्न शीर्षकमा आफ्ना गुनासा तथा सुझावहरू राखे ।

सूचिमा समावेश केही  आरोपको नेपाली दूतावासले खण्डन गरेको छ भने सुझावहरूलाई सकारात्मकरूपमा लिँदै धन्यवादसमेत ज्ञापन गरेको छ । विभिन्न आरोपप्रति आफ्ना र दूतावासका बाध्यात्मक परिस्थितिको चिरफार र जवाफ सुवेदीले दिए । उनले नेपाली दूतावास कतारले खोल्ने स्लट निष्पक्षरूपमा रहेको, तर पत्रमा उल्लेख भएझैं नभएको स्पष्ट पारे । दूतावासका कर्मचारीले पनि फाराम भर्न नसकेको बताउँदै नेपालीहरूले नै चर्को मूल्य तिरेर फाराम किन भरेको भन्दै सुवेदीले प्रतिप्रश्न गरे । हामीले नेपाली दूतावास र नेपालमा रहेको राहदानी विभागबाहेक अन्यलाई चिन्दैनौं र जान्दैनौं, दूतावासको कुनै पनि कर्मचारीले ट्याक्सी वाला, कन्सल्टेन्सी होस् या टाइपिङ सेन्टरमा गएर पैसा तिरेर फाराम भर्नुस् पनि नभनेको र तिनीहरूसँग चिनजान पनि नभएको हुँदा दूतावासमाथि लगाइएका आरोप गलत रहेको स्पष्ट पारे ।

स्लट खुल्ने बित्तिकै फाराम सकिन्छ, आफूहरुलाई दैनिक २२० पासपोर्टको फाराम मात्र भर्ने अनुमति भए पनि कतारबाट दैनिक ३५० को हाराहारीमा पासपोर्ट बनिरहेको स्मरण गराउँदै उनले प्रवासमा सबैभन्दा धेरै पासपोर्ट वितरण हुने देश कतार रहेको स्पष्ट पारे । सुवेदीले यो समस्या सन् २०२५ को डिसेम्बरसम्म रहने र त्यसपछि स्वतः कम हुने बताए । उनले समस्यामा परेर आएका श्रमिकको फाराम दूतावासका कर्मचारीले भरेर सहजीकरण गरिदिने गरेको स्मरण गर्दै दूतावासमा थप कर्मचारीको आवश्यकता महसुस गरी मन्त्रालय तथा विभागमा पत्राचार गरिसकिएको र विभागबाट छिट्टै घुम्ती टोली कतार आइ शिविर सचालन गर्नेतर्फ आफू विश्वस्त रहेको बताए ।

चर्को शुल्क लिएर पासपोर्टका फाराम भर्न नजान सुवेदीले आग्रह गर्दै त्यस्ता ठाउँमा नगए स्वतः ती धन्दा बन्द हुने र स्लट पनि सरलरूपमा पाइनेतर्फ सोच्न आग्रह गर्दै कम्प्युटरको आइपी एड्रेसको दुरुपयोग भयो कि भन्ने आशंकाप्रति उनले यो विषयमा दूतावासले राहदानी विभागसँग कुरा गर्ने तयारी गरेको बताए । पासपोर्टका कारण रोजगारी नगुमोस् भनेर दूतावास सचेत रहेको बताउँदै दूतावासका कर्मचारीको निष्ठाप्रति शंका नगर्न आग्रह गरे । पुलिस रिपोर्टसहित अन्य दर्तासहितका शुल्क महँगो रहेको स्वीकार गर्दै सुवेदीले त्यो सबै राजस्व रकम रहेको र उक्त रकम सिधै अर्थ मन्त्रालयमा रहेको सर्व–संचित कोषमा जम्मा हुने हुँदा दूतावासले केही गर्न नसके पनि एनसीसीमार्फत शुल्क घटाउनका लागि लिखित निवेदन प्राप्त भएमा सम्बन्धित निकायमा पहल गर्ने जानकारी दिए ।

सचेतना कार्यक्रमका लागि एनसीसी कतारसँग सहकार्य गरिरहेको र नेपाली महिलाहरूका लागि नेपाली महिला समाज कतारले त्यस्ता कार्यक्रमको आयोजना गरेमा दूतावासले सहकार्य गर्ने उनले बताए । दूतावासका कर्मचारीले श्रमिककै पैसाले तलब खाएको हुँदा श्रमिकको काम गर्न दूतावास र कर्मचारी सदैव तयार रहेको बताउँदै बैंकिङ प्रणालीबाट भुक्तानी लिन पटक–पटक पत्राचार गरिए पनि सरकारले अनुमति नदिएको स्पष्ट पारे । उनले पासपोर्ट फाराममा फरक देश राखेका केही पासपोर्ट फारामहरू फर्काइएकोसमेत खुलासा गरे ।

कार्यक्रमका प्रमुख अतिथि समेत रहेका कार्यवाहक राजदूत राईले विदेशमा रहेका ३८ वटा नियोगमध्ये कतारको नियोगले गत आर्थिक वर्षमा मात्र ५५ हजार पासपोर्ट नवीकरण गरेको बताउँदै राहदानी सेवामा त्रुटि कहीँ नरहेको स्पष्ट पारे । उनले सामाजिक सञ्जाल होस् या मिडियामा दूतावासविरुद्ध बोलेर राष्ट्रको उचाइ नबढ्ने बताए । उनले दूतावासका कमजोरी उपर आएका सुझावलाई आफूले सकारात्मकरूपमा लिएको बताउँदै सुधार्दै लैजाने बताए । राईले दूतावास बाहिर लाइनमा बस्नेहरूका लागि पिउने पानीको व्यवस्था र एटिएम मेसिन राख्ने बारेमा आवश्यक छलफल गरेर प्रक्रिया अगाडि बढाइने बताए । उनले नेपालीले नै आफ्नै दाजु भाइलाई पीडा दिएको स्मरण गर्दै त्यस्ता पीडा दिनेलाई हदैसम्मको कारबाही गरिने बताए ।

उनले संविधान दिवस मनाउँदै गर्दा केही राजनीतिक दलका नेताहरूको शैलीप्रति लक्षित गर्दै देशमा लोकतन्त्र राजनीतिक दलले मात्र ल्याएको जस्तो गर्न नमिल्ने र नेपाली नागरिक समाज तथा कर्मचारीहरूलाई भुल्न नहुने बताए । राईले कतारमा डेढ सय संस्था रहेको हुँदा कसलाई मन्तव्य दिने या नदिने भन्ने एक खालको समस्या, अर्कोतिर देशकै प्रधानमन्त्री कतार हुँदै अमेरिका जाँदै गर्दा स्वागत गर्न जानुपर्ने हुँदा गत सालकै तालिकाबमोजिम दिवस मनाउने तयारी दूतावासले गरेको स्पष्ट पारे ।

कतारमा मृत्यवरण गरेका मृतकको बीमाबापत प्राप्त हुने रकम निकासाका लागि श्रमिक अदालतमा मुद्दा लड्नुपर्ने र मुद्दा लडेबापत वकिलहरूले प्राप्त रकमको २० प्रतिशत आफ्नो सेवा शुल्क लिने गरिरहेको हुँदा नियोगले आफ्नै वकिल राख्न एनसीसी कतारका प्रथम उपाध्यक्ष कृष्ण पन्थीले राखेको सुझावको जवाफ दिँदै राईले नियोगले वकिलहरूको सेवा सुविधा उपलब्ध गराउन पनि नसकिने र अन्तर्राष्ट्रियरूपमा कानून व्यवसाय गर्न अनुमति प्राप्त अरबिक भाषामा ज्ञाता नेपाली वकिल कतारमा नरहेको हुँदा असम्भव देखिएको बताए ।

उनले कतारमा रहेको नेपाली समाजभित्र आक्षेप, आग्रह–पूर्वाग्रह, आरोप–प्रत्यारोप बढेको बताउँदै प्रेम, सदभाव, सहकार्य, समझदारी र सहअस्तित्व नेपाली समाजमा भेट्नु भनेको स्यालको सिङ खोज्नु जस्तै अवस्थामा पुगेको बताउँदै सामाजिक सञ्जालमा चरित्र हत्या हुने गरी अराजक प्रवृत्ति नदेखाउन आग्रह गरे । दूतावासका कर्मचारीले मिलेमतो गरे, पैसा खाए भन्ने मनमा छ भने हटाउन आग्रह गर्दै त्यस्ता भ्रमबाट मुक्त हुन राईले आग्रह गरे । उनले दूतावासलाई प्राप्त सुझावलाई गम्भीरतापूर्वक लिने प्रतिबद्धता व्यक्त गरे ।

एनसीसी कतारका सचिव सन्तोष क्षेत्रीले सहजीकरण गरेको कार्यक्रमको समापन गर्दै कार्यक्रमका सभापति भट्टले कार्यक्रमको समापनसँगै समस्या पनि न्यून हुँदै जाने विश्वास व्यक्त गरे ।