कपिलवस्तु : यूएई सरकारले बाढी, पहिरो र डुबान प्रभावित हर्दाैनाबासीलाई राहत उपलब्ध गराएको छ । नेपालका लागि यूएईका राजदूत अब्दुल्ला अल शम्सीले यूएई सरकारको तर्फबाट खाद्यान्न सामग्री राहत वितरण गरेका हुन् । 

नेकपा एमालेका केन्द्रीय सल्लाहकार तथा पूर्वमन्त्री समेत रहेका अकबाल अहमद शाहले दूतावासका राजदूत अब्दुल्ला अल शम्सी लगायत सम्बन्धित निकायसँगको समन्वयमा राहत वितरण गरिएको बताए । उनको अथक प्रयासले कपिलवस्तुको महाराजगञ्ज नगरपालिका– १० हर्दौना गाउँका नदी कटान र बाढी प्रभावित ३८ घर–परिवारलाई दुबई इमेरात रेड क्रिसेंटकोतर्फबाट राहत सामग्री वितरण गरिएको हो । 

यूएई सरकारले नेपालमा प्राकृतिक विपत्तिको समय वा अन्य समयमा समेत सहयोग गर्दै आएको छ । विपत्तिका बखत नेपाली जनतालाई यूएई सरकारले साथ र सहयोग गर्दै आएको छ । यूएई सरकार र नेपाल सरकारको मित्रता सदैव कायम रहोस् भन्ने कामनाका साथ यूएईका राजा शैख मोहम्मद बिन राशिद अलमकतुम तथा राजदूत अब्दुल्ला अल शम्सीलाई पूर्व मन्त्री अकबाल अहमद शाहले धन्यवाद व्यक्त गरे । कपिलवस्तुका नदी कटान तथा बाढी प्रभावित क्षेत्रमा थप राहत वितरण हुने पूर्वमन्त्री शाहले प्रतिबद्धता समेत जनाए ।

महाराजगञ्ज नगरपालिका–१० हर्दौनामा राहत वितरण कार्यको प्रशंसा गर्दै स्थानीय समाजसेवी माबुद खाँ तथा मेयर पद प्रत्याशी रामदास चौधरीले हर्दौना गाउँका नदी कटान रोक्नका लागि छिट्टै पहल गर्नुपर्नेमा जोड दिए । उनले समयमै ठोस पहल नभए पुरै गाउँ नै नदी कटानको उच्च जोखिममा रहेको बताए ।

राहत वितरणले पीडितलाई ठूलो सहयोग भएको भन्दै उनले प्रशंसा समेत गरे । पूर्वमन्त्री शाहको प्रयासमा यूएई सरकारले गरेको राहत वितरणले पीडित परिवारहरुलाई निकै सहयोग पुगेको भन्दै धन्यवाद समेत व्यक्त गरे ।