दोहा कतार : रोल्पाली सेवा समाज कतारले आयोजना गरेको बाढी-पहिरो पीडित तथा मानव सेवा आश्रम सहयोगार्थ दशैं तिहार तथा छठ पर्व विशेष सांस्कृतिक कार्यक्रम शुक्रबार सनैयास्थित फूलबारी रेस्टुरेन्टको सभा हलमा सम्पन्न भएको छ । नेपालीहरूको महान पर्व विजयादशमी शुभ तिहार एवम् छठको अवसर पारेर आयोजित उक्त कार्यक्रम समाजका अध्यक्ष गोपाल डाँगीको सभापतित्व तथा गैरआवासीय नेपाली संघ, राष्ट्रिय समन्वय परिषद् कतारका अध्यक्ष रमेश भट्टको प्रमुख आतिथ्यतामा सम्पन्न भएको हो ।

कार्यक्रममा आफ्नो शुभकामना मन्तव्य राख्दै प्रमुख अतिथि भट्टले रोल्पाली सहित कतारमा रहेका सबै संघ संस्थाले समयको व्यवस्थापन गर्न नसकेको बताउँदै पटक पटक दोहोर्‍याएर र कार्यक्रमको अन्तिमसम्म पनि आसन ग्रहण गर्ने र गराउने पद्धतिलाई निर्मुल पार्न आग्रह गरे । भट्टले एनिसिसले एक पटक मात्र नाम लिने र बिचबिचमा आसन ग्रहण नगराउने गरेको स्मरण गराउँदै रोल्पा लीको डेढ घण्टा भन्दा लामो समय आसन ग्रहणमा सकिएको बताउँदै समयको महत्व बुझी सदुपयोग गर्न सुझाव दिए । एनसीसीले कतारमा रहेका सबै संघ संस्थाहरूसँग दिगो सम्बन्ध कायम गर्दै आएको स्मरण पछिल्लो समय राहदानी नवीकरणमा देखिएको समस्याको विषयलाई सहज बनाउन दूतावास सङ्ग समन्वय गर्दै राहदानी नवीकरणलाई निरन्तरता दिन आफूहरू सदैव तयार रहेको बताए ।

समाजका वरिष्ठ उपाध्यक्ष दुर्गा बहादुर खड्काले स्वागत मन्तव्य राखेका थिए । मानसिङ परियार, गुना मगर “निशु”, चित्रा के.सी, रेश्मी सेन्चुरी, अमृत परियार, ख्याम भट्टराई लगायतका कलाकारहरूले उपस्थित सम्पूर्णलाई प्रत्यक्ष गीत र कलाकार द्वय अनुष्कृती तामाङ र माया के.सीले नृत्यमार्फत कार्यक्रममा उपस्थितलाई स्वागत गरेका थिए । कार्यक्रम अवधिभर कतारमा रहेका कलाकार सुरेश बि.सी, पदम सेन्चुरी, दीपक बि.सी, सुमित्रा भट्टराई, अमृत परियार लगायतले आफ्ना साङ्गीतिक प्रस्तुतिहरू मार्फत मनोरञ्जन प्रदान गरेका थिए भने साहित्यकार द्वय शोभाराम ओली र पूर्ण कान्छा गुरुङले गजल तथा मुक्तक वाचन गरेका थिए ।

समाजका महासचिव केशर बहादुर खनाल र सचिव सुजाता डी.सीले मिलेर सहजीकरण गरेको कार्यक्रमको समापन गर्दै गर्दा सभापतिले मन अमिलो बनाए । दर्शकको मध्यम उपस्थिति देखिए पनि कतारमा रहेका चिरपरिचित सामाजिक तथा वैचारिक संघ संस्थाका प्रमुख, समाजसेवी, पत्रकार तथा बुद्धिजीवीहरूलाई निमन्त्रणा गर्दा पनि अनुपस्थिति रहेको प्रति उनले मन अमिलो बनाएका हुन् । कार्यक्रमको अन्तिममा सांगीतिक प्रस्तुति दिने कलाकारहरूलाई सम्मान गरिएको थियो ।