दिवाकर अधिकारी/मध्यान्ह
काठमाडौं : नेपाली कांग्रेसले उपप्रधान तथा गृहमन्त्री रवि लामिछानेमाथि उठाएको प्रश्नलाई निरन्तरता दिने भएको छ । तर, कुन रुपमा उठाउने भन्ने निचोडमा पुगेको छैन ।
नेपाली कांग्रेसकी सचेतक शुशिला थिङ आफूहरुले संसदमा उठाएको सहकारीको रकम हिनामिना, बचतकर्ताको समस्या र सहकारी ठगी प्रकरणमा गृहमन्त्री लामिछाने आरोपित रहेको विषय तथ्य रहेको दाबी गर्छिन् ।
‘कुनै पनि तथ्यसहित उठेको विषय संसदको अधिवेनशन अन्त्य हुँदैमा सकिँदैन । बरु सदन नहुँदा सडकमा उठ्छ र अर्को अधिवेशनमा थप सशक्त भएर प्रस्तुत हुन पाउँछ’ उनले भनिन् ।
गृहमन्त्रीमाथिको प्रश्नलाई अगाडि बढाउने रणनीतिका सम्बन्धमा छलफल गर्न र त्यसलाई संसदमा दर्ज गराउन कांग्रेसले संसदीय दलको बैठक बोलाएको छ । आइतबार संसद अधिवेशन अन्त्य हुँदैछ । त्यसअगाडि आइतबार बिहान ११ बजे प्रतिनिधि सभाको बैठक बोलाइएको छ । उक्त बैठकमा सहभागी हुनु अगाडि नै गृहमन्त्रीमाथिको प्रश्नलाई अगाडि बढाउने रणनीति प्रष्ट गर्न संसदीय दलको बैठक बोलाइएको हो ।
कांग्रेसले संसदीय दलको बैठक बिहान ८ बजे बोलाएको छ । त्यसभन्दा अगाडि पार्टीको धारणा लिन कांग्रेसले संसदीय दलको कार्यसमितिको बैठक राखेको छ । आइतबार बिहान साढे ७ बजे संसदीय दल कार्यसमितिको बैठक बस्नेछ ।
संसदीय दलको कार्यसमिति र संसदीय दलको बैठक पछि रविविरुद्धको मुद्दामा रणनीति प्रष्ट हुने र त्यसआधारमा प्रतिनिधि सभाको बैठकमा सहभागी हुने कांग्रेसको तयारी छ ।
कांग्रेसले सहकारी अनियमिततामा उपप्रधान तथा गृहमन्त्री रवि लामिछानेको संलग्नताबारे छानबिन गर्न संसदीय समिति गठनको माग गर्दै आएको छ ।
बचतकर्ताको ८० करोडभन्दा बढी रकम अपचालन गरेर जीबी राई र उनको समूहले ग्यालेक्सी टीभी चलाएको कांग्रेसको आरोप छ । त्यो टीभीमा स्थापनाकालदेखि २०७७ असारसम्म रवि लामिछाने कार्यकारी निर्देशक थिए । टीभी छाड्ने क्रममा उनले १ लाख ८० हजार थान शेयर १ करोड ८० लाख जीबी राईलाई बेचेको लिखित कागज कम्पनी रजिस्टारको कार्यालयमा बुझाएका छन् ।
गृहमन्त्री रविले भने आफूले रकम नलिएको, रकम लगानी नगरी पाएको शेयर ट्रान्सफर गर्न मात्र कागज गरेको दाबी गर्दै आएका छन् । ६ चैतको प्रतिनिधि सभा बैठकमा प्रधानमन्त्री प्रचण्डले सहकारीको रकम हिनामिनामा रवि लामिछाने संलग्न नरहेको प्रहरी ब्रिफिङ रहेको बताएका थिए ।
प्रधानमन्त्रीको जवाफमा चित्त नबुझाएको कांग्रेसले त्यसयता संसदीय समिति बनाएर छानबिन गर्नुपर्ने अडान लिँदै आएको छ । यो समस्याको निरुपण नहुँदै सरकारले अधिवेशन अन्त्यका लागि सिफारिस गरेको हो ।
आफूहरुले उठाएको मुद्दा निरुपण नहुँदै अधिवेशन अन्त्यको सिफारिस भएपछि कांग्रेसले विपक्षी दलहरुले संसदमा उठाउँदै आएका माग छल्न सरकारले अधिवेशन नै अन्त्यका लागि राष्ट्रपतिसमक्ष सिफारिस गरेको टिप्पणी गरेको हो ।
शुक्रबार बसेको मन्त्रिपरिषदको बैठकले अधिवेशन अन्त्यका लागि राष्ट्रपति समक्ष सिफारिस गर्ने निर्णय गरेको थियो । सरकारले यस्तो निर्णय लिनु अगाडि प्रमुख प्रतिपक्षी दलसँग पर्याप्त छलफल र परामर्श नगरेको कांग्रेसकी सचेतक थिङ्ले बताइन् ।
‘चालू अधिवेशन अन्त्य गर्ने समय हुँदै थियो । वैशाख पहिलो सातासम्म चलाउन सकिन्थ्यो । तर, सरकारले संसदीय छानबिनको माग छल्न संसद अधिवेशन अन्त्यको सिफारिस गरेको हाम्रो बुझाइ छ’ उनले भनेकी छन् ।
आफूहरुको माग सम्बोधन नभइ संसद अधिवेशन अन्त्य गरेर सरकारले समस्यालाई पन्छाउन खोजेको कांग्रेसले टिप्पणी छ ।
अर्को अधिवेशनमा समेत यो विषय उठ्न सक्ने र यसका लागि पार्टीले उपयुक्त निर्णय लिने कांग्रेस सचेतक थिङ बताउँछिन् । उनी भन्छिन्, ‘केही समयभित्रै सरकारले बजेट अधिवेशन बोलाउनैपर्छ बोलाउला । त्यसबेला परिस्थिति अनुसार कांग्रेसले आफ्नो व्यवहार प्रस्तुत गर्छ ।’
काठमाडौं : नेकपा एमालेका अध्यक्ष एवम् पूर्वप्रधानमन्त्री केपी शर्मा ओलीले नयाँ वर्ष २०८१ नेपाली समाजलाई निराशा, भ्रम र अविश्वासबाट मुक्त गरी विश्वास जगाउने वर्षका रूपमा स्थापित गर्नुपर्ने बताएका छन् ।
प्रवासी नेपाली मञ्च (ओएनएफ) अन्तर्राष्ट्रिय कमिटीद्वारा नयाँ वर्ष २०८१ का अवसरमा आयोजित शुभकामना आदानप्रदान कार्यक्रमलाई भर्चुअलरुपमा सम्बोधन गर्दै अध्यक्ष ओलीले नयाँ वर्षलाई देश बन्दैन भन्ने भ्रमबाट मुक्त बर्ष बनाउनुपर्ने बताएका हुन् ।
‘म बनाउँछु मेरो देश’ भन्ने विश्वास जगाउने वर्षका रूपमा २०८१ लाई स्थापित गर्नुपर्नेमा जोड दिँदै अध्यक्ष ओलीले कुनै पनि देश अरु कसैले नभई आफैँले बनाउनुपर्ने धारणा राखे । ‘नेपाल अरु कसैले आएर बनाइदिँदैन, हामी नेपाली आफैंले बनाउने हो । यो दह्रो आत्मविश्वास हामी सबैमा हुनुपर्छ । विशेष गरी युवामा यो हुनुपर्छ’, उनले भने ।
अध्यक्ष ओलीले समृद्ध नेपाल निर्माणको अभियानमा बाधा खडा गर्ने तत्वहरूले तीनवटा गलत भाष्य निर्माण गरिरहेको उल्लेख गर्दै सतर्क रहन सबै नेपालीलाई आह्वान गरे । उनले नेपाल बन्दैन भन्ने कुरा शतप्रतिशत झुटो रहेको पनि बताए ।
अध्यक्ष ओलीले भने, ‘पुराना सबै पार्टी खराब हुन् भन्ने कुरा, जन्मसिद्ध श्रेष्ठता कायम गर्ने कुरा र नेपाल बन्दैन, कसैले बनाउन सक्दैन भन्ने कुरा अहिले अफवाहका रूपमा फैलाइएको छ, यी तीनै कुरा गलत हुन् ।’
उनले अहिले जबर्जस्त रूपमा अफवाह फैलाएर गलत भाष्य निर्माण गर्न खोजिएको र त्यसबाट जनतामा निराशा ल्याउने प्रयत्न भइरहेको बताए ।
नयाँ सत्ता समीकरण बनेसँगै मुलुक सही बाटोमा आएको र अब राष्ट्रिय हित तथा विकासको गति तीव्र ढङ्गले अघि बढ्ने अध्यक्ष ओलीको भनाइ थियो । विगतमा एमाले नेतृत्वको सरकार ढालेर कांग्रेस नेतृत्वको गठबन्धन बनेपछि मुलुकले निकै ठूलो क्षति बेहोर्नुपरेको भन्दै उनले देशका लागि नयाँ सत्ता समीकरण बनाउनुपरेको दाबी गरे ।
‘नयाँ समीकरणसँगै परिस्थिति फेरिएको हुँदा अब राष्ट्रिय हितलाई केन्द्र भागमा राखेर हाम्रो सार्वभौमसत्ता, स्वतन्त्रता र राष्ट्रिय अखण्डतालाई साँचो अर्थमा प्रयोग गर्दै हामी सुशासन र विकासको गतिलाई अघि बढाउने, जनताको जीवनस्तर सहज बनाउने काममा जुटेका छौं’, अध्यक्ष ओलीले भने ।
दिवाकर अधिकारी/मध्यान्ह
काठमाडौं : नागरिक उन्मुक्ति पार्टी (नाउपा) भित्रको विवाद मिलेको छ । नेपाली कांग्रेस नेतृत्वको गठबन्धनलाई साथ दिनुपर्ने पक्षमा अडान लिँदै आएका नाउपाका संस्थापक रेशम चौधरी बदलिएका छन् ।
नेकपा एमाले र नेकपा माओवादी केन्द्र सम्मिलित नयाँ गठबन्धनमा सहभागी भएर सुदूरपश्चिम प्रदेश सरकारको नेतृत्व लिने नाउपाकी अध्यक्ष रञ्जिता श्रेष्ठको लाइनमा संस्थापक रेशम सहमत भएका हुन् । यो सँगै नाउपा भित्रको विवाद मिलेको छ ।
तर, मुख्यमन्त्री कसलाई बनाउने भनी अर्को विवाद शुरु भएको छ । रेशम पक्षधर र रञ्जिता पक्षधरबीच कसले मुख्यमन्त्री लिने भन्नेमा नेताहरु विभाजित छन् ।
शुक्रबार बिहान घनश्याम चौधरीको अध्यक्षतामा रेशम चौधरी पक्षका चार जना सांसदहरुको बैठक बसेको थियो । उक्त बैठकले रेशम चौधरीको पक्षबाट लक्ष्मणकिशोर चौधरीलाई मुख्यमन्त्रीका रूपमा अघि सार्ने निर्णय गरेको छ ।
तर, रञ्जिता पक्षबाट कैलाश चौधरी मुख्यमन्त्रीको आकांक्षी छन् । अध्यक्ष रञ्जिताले कैलाश चौधरीलाई मुख्यमन्त्री बनाउन फरक निर्णय लिन पहलकदमी गर्ने रेशम पक्षधर सांसद घनश्याम चौधरीलाई निलम्बन गरिदिएकी छन् । पार्टी अध्यक्ष रञ्जिता श्रेष्ठले शुक्रबार प्रदेश सभामुख भीमबहादुर भण्डारीलाई पत्र पठाउँदै चौधरीलाई पार्टीबाट ३ महिना निलम्बन गरिएको जानकारी दिएकी छन् ।
अध्यक्ष श्रेष्ठको हस्ताक्षरमा जारी भएको पत्रमा प्रदेश सभा सदस्य चौधरीलाई पार्टीका विभिन्न विषयमा छलफल गर्न पटक–पटक बोलाउँदा पनि सहभागी नभएको र स्पष्टिकरण पनि चित्तबुझ्दो नभएकोले निलम्बन गरिएको उल्लेख छ ।
सुदूरपश्चिम प्रदेशमा नाउपाका ७ सांसद थिए । इन्दिरा गिरीलाई पार्टीले फिर्ता बोलाएपछि अहिले ६ जना छन् ।
चार सांसद कांग्रेस नेतृत्वको काम चलाऊ सरकारमा सहभागी छन् । घनश्याम चौधरी आर्थिक मामिला, खुसीराम चौधरी उद्योग पर्यटन वन तथा वातावरण मन्त्री हुन् भने लक्ष्मण किशोर चौधरी सामाजिक र रामेश्वर चौधरी भूमि व्यक्ति कृषि तथा सहकारी मन्त्री हुन् । कांग्रेस सरकारमा सहभागी नभएका दुई सांसद कैलाश चौधरी र टिका थापा उक्त सहमतिमा सहभागी थिएनन् ।
कांग्रेस नेतृत्वको सरकारमा सहभागी नभएका कैलाश चौधरीलाई मुख्यमन्त्री बनाउने नाउपाकी अध्यक्ष रञ्जिताको चाहना छ । रन्जिता श्रेष्ठले यसअघि नै संसदीय दलको नेताको जिम्मेवारीबाट घनश्याम चौधरीलाई हटाएर उक्त जिम्मेवारी कैलाश चौधरीलाई तोकेकी थिइन् । शुक्रबार घनश्याम चौधरीलाई निलम्बन नै गरेकी हुन् ।
सुदूरपश्चिममा सरकार गठनका लागि प्रदेश प्रमुख नजिर मियाँले आगामी वैशाख २ गते बेलुकी ५ बजेसम्म दाबी पेश गर्न आह्वान गरेका छन् । प्रदेश सरकारको नेतृत्व पाउने भएपछि सत्ता गठबन्धनबाटै सरकारमा सहभागी हुने विषयमा नाउपा एक मत भएको छ भने मुख्यमन्त्रीको विषयमा किचलो सुरु भएको छ ।
काठमाडौं : प्रधानमन्त्री पुष्पकमल दाहाल ‘प्रचण्ड’ र नेकपा(एमाले)का अध्यक्ष केपी शर्मा ओलीबीच मुलुकको पछिल्लो समसामयिक राजनीतिक विषयमा छलफल भएको छ ।
प्रधानमन्त्री तथा मन्त्रिपरिषद् कार्यालयमा आज भएको भेटमा समसामयिक राजनीतिक विषयमा अलावा सङ्घीय संसद्को अधिवेशनलगायतका विषयमा छलफल भएको जनाइएको छ ।
सिंहदरबारमा सञ्चारकर्मीहरुसँग संक्षिप्त कुराकानी गर्दै अध्यक्ष ओलीले प्रमुख प्रतिपक्षी दल नेपाली कांग्रेसका कारण प्रतिनिधिसभाको बैठक चल्न नसकेको बताए ।
सरकारले विजनेश नै नपाएर अधिवेशन अन्त्य गर्ने तयारी गरेको हो ? भन्ने सञ्चारकर्मीको जिज्ञासामा उनले भने, “कांग्रेसले चल्न नदिएर हो ।”
काठमाडौं : नागरिक उन्मुक्ति पार्टी (नाउपा)की अध्यक्ष रञ्जिता श्रेष्ठले सुदूरपश्चिम प्रदेशका सांसद तथा मन्त्री घनश्याम चौधरीलाई पार्टीबाट निलम्बन गरेकी छन् ।
पार्टी अध्यक्ष श्रेष्ठले शुक्रबार प्रदेश सभामुख भीमबहादुर भण्डारीलाई पत्र पठाउँदै चौधरीलाई पार्टीबाट ३ महिना निलम्बन गरिएको जानकारी गराएकी हुन् ।
पार्टीको चैत १४, १५ र २५ गतेको बैठकमा उपस्थित नभएको भन्दै चौधरीलाई पार्टीबाट निलम्बन गरिएको हो । चौधरीलाई पार्टीका विभिन्न विषयमा छलफल गर्न पटक-पटक बोलाउँदा पनि सहभागी नभएको र स्पष्टीकरण पनि चित्तबुझ्दो नभएकोले निलम्बन गरिएको उल्लेख छ ।
पत्रमा भनिएको छ, ‘घनश्याम चौधरीलाई पार्टीले अति महत्वपूर्ण र गम्भीर विषयमा छलफल गरी निर्णय गर्नुपर्ने भनी पटक-पटक बोलाइएकोमा पार्टीलाई नै निराश गर्ने गरी बैठकमा उपस्थित नभएको र निजले अध्यक्ष रञ्जिता श्रेष्ठलाई सम्बोधन गरी पठाइएको स्पष्टीकरण पत्र चितबुझ्दो नभएकाले, नागरिक उन्मुक्ति पार्टीको अन्तरिम विधान २०७८ धारा १७ (क) को २, ४ र ५ बमोजिम कार्यगरेकोले पार्टीको केन्द्रीय कमिटिको मिति चैत ३० गतेको निर्णय बमोजिम निजलाई तीन महिनाको लागि निलम्बन गरिएको व्यहोरा जानकारी गराउँदछु ।’
दिवाकर अधिकारी/मध्यान्ह
काठमाडौं : पछिल्लो समय नेपाली कांग्रेसका नेता डा.शेखर कोइराला नेकपा एमालेसँगको सहकार्यमा जोड दिइरहेका छन् । बिहीबार घोराहीमा आयोजित कांग्रेस दाङको दोस्रो जिल्ला सम्मेलनलाई सम्बोधन गर्दै नेता कोइरालाले संसदमा रहेका पहिलो र दोस्रो दल मिल्नुपर्ने बताए ।
‘मैले देश बचाउनकै लागि संसदमा रहेका पहिलो र दोस्रो दल मिल्नुपर्छ भनेर भन्दै आएको हुँ’ कोइरालाले एमाले र कांग्रेसबीच सहकार्यको आवश्यकतामा जोड दिँदै भने, ‘छिटोभन्दा छिटो दुई ठुला दल एक ठाउँमा उभिएर देशलाई निकास दिऊँ ।’
माओवादी केन्द्रसँगको सत्तासमीकरणमा हुँदा देखि नै एमाले र कांग्रेसबीचको सहकार्यको वकालत गरिरहेका उनी आफ्नो पार्टीसँग माओवादीले सत्ता समीकरण तोडेपछि थप रुष्ट छन् । सत्ता समीकरणमा माओवादीसँगै रहेकै बेला एमालेको साथ लिएर कोशी प्रदेशमा कांग्रेस नेतृत्वमा सरकार बनाएका डा.शेखर कोइराला पुष्पकमल दाहाल प्रचण्डलाई सत्ताच्युत गर्न चाहन्छन् । यसका लागि एमालेसँग मिलेर संघदेखि प्रदेश सबैतिर सरकार बनाउनुपर्ने उनको मत सार्वजनिक हुँदै आएको छ ।
पार्टी नेतृत्वका लागि निरन्तर प्रयास गरिरहेका कांग्रेस नेता डा. शेखर कोइराला अन्तर पार्टी संवादमा छन् । पार्टीमा आफू हावी हुँदै गर्दा एमालेसँग मिलेर माओवादीलाई सत्ताच्युत गर्ने उनको चाहना छिपेको छैन ।
कांग्रेसको महाधिवेशन समयमै भए २०८३ सालमा हुन्छ । पार्टी नेतृत्वमा आफू पुग्न उनले महाधिवेशन केन्द्रित गतिविधि गर्दै आएका छन् । गत महाधिवेशनमा शेरबहादुर देउवासँग सभापतिमा पराजित भएका उनी आफ्नो मत अनुसारको भाग पार्टीसत्ता र राज्य सत्तामा लिन सफल देखिन्छन् । विस्तारै पार्टीमा सभापति देउवालाई गलाएर नेतृत्व लिने र आफू नेतृत्वमा पुग्दै गर्दा माओवादीलाई सत्ताच्युत गर्ने कोइरालाको चाहना रहेको नेताहरु बताउँछन् ।
नेताहरुका अनुसार कोइराला तत्कालका लागि एमालेसँग मिलेर अगाडि बढ्न चाहन्छन् । यसो गर्दा २०८४ को चुनावमा माओवादी कतै नमिल्ने र एक्ला एक्लै चुनाव हुने अवस्था बन्दा माओवादी खुम्चने र दुई ठूला पार्टीहरु मात्रै मुलुकमा रहने डा.कोइरालाको बुझाइरहेको छ।
सार्वजनिक रुपमा पनि उनले कांग्रेसले एक्लै चुनाव लड्ने र बहुमत ल्याउने वातावरण बनाउने दाबी गर्दै आएका छन् । सभापतिमा दाबी गर्दै आएका कोइरालाले पार्टीका नेता÷कार्यकर्तालाई एक्लै चुनाव लडेर बहुमत ल्याउन सक्ने अवस्थामा नपुर्याएसम्म आफ्नो यात्रा नरोकिने समेत बताउने गरेका छन् ।
ओबराज शाही/मध्यान्ह
हुम्ला : नेकपा एमाले हुम्लाको दशौं अधिवेशन बिहीबारबाट शुरु भएको छ । एक दिन पछि सरेको अधिवेशन बिहीबार पनि ढिलै गरी शुरु भएको थियो ।
अधिवेशनमा प्रमुख अतिथि एमाले सचिव एवं कर्णाली प्रदेश इन्चार्ज लेखनाथ भट्ट आउने कार्यक्रम रहेको भएपनि उनी हवाइ सेवा अवरुद्ध भएका कारण आउन सकेनन् । उनी नआएपछि स्थायी कमिटी सदस्य गोरखबहादुर बोगटीको प्रमुख अतिथिमा अधिवेशनको उद्घाटन गरिएको छ ।
अधिवेशन सिमकोट बजारमा बाजागाजासहितको ¥याली निकालेर जिल्ला समन्वय समितिमा पुगेर सभामा परिणत भएको थियो । एमाले कावा अध्यक्ष डबल रावतको अध्यक्षतामा शुरु भएको कार्यक्रममा स्थायी कमिटी सदस्य गोर्खबहादुर बोगटी, हुम्ला जिल्ला इन्चार्ज नेरेन्द्र शाही, कर्णाली प्रदेश कमिटी सचिवालय सदस्य रुपा शाही, प्रदेश कमिटी सदस्य, मंगल लामा, नवराज महतारा, जिल्ला समन्वय समितिका पूर्व उपप्रमुख खगेन्द्र कार्की लगायतले शुभकामना मन्तव्य राखेका थिए ।
अधिवेशनमा एमाले केन्द्रीय सदस्य दल रावल, दल फडेरा र छक्क बहादुर लामा हवाई सेवा अवरुद्धका कारण आउन पाएनन् । एमाले जिल्ला अधिवेशनका लागि २ सय ९८ जना प्रतिनिधिले दशौं जिल्ला अधिवेशनमा प्रतिनिधित्व गर्ने भएका छन् । अधिवेशनले नयाँ नेतृत्व समेत चयन गर्ने भएको कारण अझैँ त्यसको टुंगो लागेको छैन ।
हालसम्म एमाले हुम्लाको नेतृत्वका लागि वर्तमान कावा अध्यक्ष डबल रावत, पूर्व उपाध्यक्ष ज्ञानी बुमी आकांक्षी देखिएका छन् । यस्तै गोबिन्द बहादुर शाही पनि आकांक्षी देखिन्छन् । अधिवेशनको शुक्रबार बन्द सत्र शुरु हुने एमाले हुम्लाले जनाए छ ।
सुर्य प्रसाद भुसाल/मध्यान्ह
दाङ : नेपाली कांग्रेसका नेता डा.शेखर कोइरालाले अहिले मुलुक दुर्घटनाको संघारमा पुगेकाले पार्टीभन्दा माथि उठेर आफूले देश बचाउने अभियान शुरु गरेको बताएका छन् ।
नेपाली कांग्रेस दाङको दोस्रो जिल्ला सम्मेलनलाई सम्बोधन गर्दै नेता कोइरालाले देश बचाउनका लागि संसदमा रहेका पहिलो र दोस्रो दल मिल्नुपर्ने बताए । राजनीतिक दलहरूले देश पहिलो भन्ने कुरालाई प्राथमिकतामा नराखेसम्म राष्ट्र नबन्ने भन्दै उनले छिटोभन्दा छिटो दुई ठूला दल एक ठाउँमा उभिएर देशलाई निकास दिनुपर्ने भनाइ राखे ।
राजनीतिक दलहरूले राष्ट्रभन्दा पदलाई प्राथमिकतामा राखेकै कारण जनतामा निराशा छाएकाले ठूला दलहरु मिल्नु बाहेक अन्य विकल्प नभएको कोइरालाले बताए ।
नेता कोइरालाले कांग्रेसलाई एक्लै चुनाव लडेर बहुमत ल्याउन सक्ने अवस्थामा नपुर्याएसम्म आफ्नो यात्रा नरोकिने बताउँदै कांग्रेस अब सबै दलहरुसँग छलफल गर्न तयार रहेको बताए । कोइराला बुधबारदेखि लुम्बिनी प्रदेशका विभिन्न जिल्लाको भ्रमणमा छन् ।
काठमाडौं : नेपाली कांग्रेसका महामन्त्री तथा पूर्वस्वास्थ्यमन्त्री गगनकुमार थापाले चिकित्सा शिक्षा सम्बन्धी जाँचबुझ आयोगको प्रतिवेदन कार्यान्वयन गर्न शिक्षा मन्त्रीलाई आफूले सघाउने बताएका छन् ।
शिक्षामन्त्री सुमना श्रेष्ठले प्रतिवेदन सार्वजनिक गरिदिएकोप्रति धन्यवाद ज्ञापन गर्दै उनले प्रतिवेदन कार्यान्वयन हुनेमा विश्वास पनि व्यक्त गरेका छन् । पूर्व स्वास्थ्यमन्त्री थापाले प्रतिवेदनमा उल्लेख गरिएका कतिपय सुझाव कार्यान्वयनमा आएको र कतिपय सुझाव अझै पनि कार्यान्वयनमा आउन बाँकी नै रहेकाले तत्काल कार्यान्वयन गर्नुपर्नेमा जोड दिए ।
सामाजिक सञ्जालहरूबाट प्रतिक्रिया दिँदै उनले दोषीलाई कुनै पनि बहानामा उम्किन नदिन पनि अनुरोध गरेका छन् ।
महामन्त्री थापाले लेखेका छन्,‘चिकित्सा शिक्षा सम्बन्धी जाँचबुझ आयोगको प्रतिवेदन सार्वजनिक गर्ने कार्यका लागि शिक्षा मन्त्रीज्यूलाई धन्यवाद !’
आयोग बन्ने तर प्रतिवेदन सार्वजनिक नहुने अनि कार्यान्वयन त हुँदै नहुने प्रवृत्तिमा बिचमा प्रतिवेदन सार्वजनिक गर्नु नै आफैंमा सकारात्मक रहेको उनको भनाइ छ । महामन्त्री थापाले प्रतिवेदनले उजागर गरेका सम्बन्धन, भर्ना, सिट, शुल्क लगायतका कतिपय विषयमा चिकित्सा शिक्षा ऐन नै बनेर आयोगमार्फत कार्यान्वयनको चरणमा रहेको र त्यसलाई थप प्रभावकारी बनाउनुपर्नेमा जोड दिएका छन् ।
‘प्रतिवेदनले आधार र कारण खुलाएरै जसजसलाई कारवाहीको सिफारिस गरेको छ, त्यो सिफारिस कार्यान्वयनको दिशामा अगाडि बढ्छ भन्ने विश्वास छ र यो सत्प्रयासमा हाम्रो साथ पनि रहने प्रतिबद्धता छ’ पूर्व स्वास्थ्य मन्त्री थापाले लेखेका छन् ।
विराटनगर : प्रधानमन्त्री पुष्पकमल दाहाल ‘प्रचण्ड’ले प्रतिनिधिसभामा देखिएको गत्यावरोध अन्त्य गर्नका लागि राजनीतिक तहमा संवाद शुरु भएको र चाँडै समाधान हुने बताएका छन् ।
विराटनगरमा आज पत्रकारसँग संक्षिप्त कुराकानी गर्दै प्रधानमन्त्री प्रचण्डले पछिल्लो गतिरोधको समाधान राजनीतिक संवादबाटै समाधान हुने र त्यसका लागि राजनीतिक तहमा संवाद थालिएको बताए ।
प्रधानमन्त्री प्रचण्डले सहकारीसँग सम्बन्धित समग्र विषयको अलगै र राष्ट्रिय स्वतन्त्र पार्टीका अध्यक्ष एवम् गृहमन्त्री रवि लामिछानेको विषय अलगै अध्ययन गरेर समस्याको समाधान गर्न सकिने विश्वास व्यक्त गरे ।
“अहिले रवि लामिछानेलाई नै केन्द्रमा राखेर समितिको माग गरिएको छ, त्यो मिल्ने कुरो छैन”, प्रधानमन्त्री प्रचण्डले भने, “मैले सदनमा जवाफ दिँदा अनुसन्धानकर्तादेखि सम्बन्धित निकायका प्रमुख र सम्बन्धित जिल्लाका अधिकारीसँग के हो यो ‘केस’ भनेर सोधेको थिएँ । उहाँहरूले यस ‘केस’ मा रविजीलाई अनुसन्धान गर्ने ठाउँ छैन भन्नुभयो, सोही आधारमा मैले बोलेको हुँ ।”
प्रतिपक्ष दलले सहकारी क्षेत्रमा देखिएको समस्या समाधान गर्नेभन्दा पनि गठबन्धन फेरिएपछि राजनीतिक मुद्दा बनाइएको उल्लेख गर्दै प्रधानमन्त्री प्रचण्डले भने, “पहिले हामीसँगै कांग्रेस सरकारमा थियो, त्यतिखेर यो मुद्दा सामान्य थियो, सरकारबाट निस्केपछि रविजीलाई केन्द्रमा राखेर समितिको माग गरिएको छ, यो राजनीतिक पूर्वाग्रहमा आधारित छ ।” उनले पछिल्लो राजनीतिक समीकरण भत्काउन गरिएको प्रयास सफल नहुने स्पष्ट पारे ।
प्रधानमन्त्री प्रचण्डले कांग्रेसले रवि लामिछानेलाई प्रधानमन्त्री प्रस्ताव गरेर अहिलेको सत्ता समीकरण रोक्ने कोसिस गरेको तर सफल नभएपछि सहकारीको विषय उठाएको आरोप लगाए ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies