कपिलवस्तु : कपिलवस्तु जिल्लाका विभिन्न नगरपालिका र गाउँपालिकाहरूमा झोलाछाप स्वास्थ्यकर्मीहरूको संख्या बढ्दै गएको छ । यसले खासगरी अशिक्षित र गरिब किसान–मजदूरहरूको स्वास्थ्यमा गम्भीर जोखिम निम्त्याएको देखिन्छ । नेपाल सरकारले मान्यता नदिएका औषधिहरू प्रयोग गरेर रोगीहरूको स्वास्थ्यमा खेलवाड गर्ने, उनीहरूलाई थप जोखिममा पार्दै पैसा असुल्ने कार्य झोलाछाप स्वास्थ्यकर्मीहरूद्वारा भइरहेको छ ।

सिमावर्ती क्षेत्र भएकाले भारतबाट अनाधिकृत औषधि भित्र्याएर खुला रूपमा बिक्री–वितरण भइरहेको छ । जिल्ला र पालिका स्तरका अनुगमनकारी निकायहरू यस्ता कार्यहरू रोक्न चुप बसेका छन् । यसले गर्दा स्थानीय जनतामा असन्तोष र चिन्ता थपिएको छ ।

कथित स्वास्थ्य क्लिनिकहरू र प्राथमिक उपचार केन्द्रहरूले बिना अनुमति र बिना प्रमाणित स्वास्थ्यकर्मीहरूद्वारा सञ्चालित हुँदा, जनताको ज्यान जोखिममा परेको छ । साथै, १८ महिने स्वास्थ्य तालिम प्राप्त कर्मीहरूले समेत गैरकानूनी रूपमा अत्यधिक मात्रामा उच्च श्रेणीका एन्टिबायोटिक औषधिहरू वितरण गरिरहेका छन् । 

कपिलवस्तु जिल्लाका अधिकांश मेडिकल स्टोरहरू फार्मासिस्टविहीन अवस्थामा सञ्चालन भइरहेका छन् । नेपाल सरकारले बिक्री–वितरणमा रोक लगाएका औषधिहरू सजिलै पाइन्छ । यसले औषधिको मापदण्ड र गुणस्तरप्रति गम्भीर लापरवाही देखाएको छ ।

स्वास्थ्यसेवालाई गुणस्तरयुक्त तथा विश्वसनीय बनाउनलाई कडा अनुगमनः जिल्ला र पालिकास्तरमा नियमित रूपमा औषधि र स्वास्थ्य सेवाको अनुगमन गर्न आवश्यक छ ।

सचेतना कार्यक्रम स्थानीय जनतालाई सही स्वास्थ्य सेवा प्राप्त गर्ने तरिकाबारे सचेतना दिनुपर्छ । कानूनी कारबाहीः झोलाछाप स्वास्थ्यकर्मी र गैरकानूनी औषधि वितरणमा संलग्नहरूलाई कानूनी दायरामा ल्याउन कडा कदम चालिनुपर्छ ।

सरकारले सिमावर्ती क्षेत्रमा गुणस्तरीय र सहज स्वास्थ्य सेवा उपलब्ध गराउन ध्यान दिनुपर्छ भन्ने स्वास्थ्य विज्ञहरुले बताउँछन् । यस विषयमा स्थानीय र सम्बन्धित निकायहरूको सक्रियता जरुरी देखिन्छ । जनताको स्वास्थ्यमा खेलवाड गर्ने कार्य तत्काल रोक्न आवश्यक छ ।