काठमाडौं : नेपाल क्रिकेट संघ (क्यान)ले आयोजना गरेको पहिलो संस्करणको नेपाल प्रिमियर लिग (एनपीएल) शनिबारदेखि सुरु हुँदै छ । कीर्तिपुरस्थित त्रिवि क्रिकेट मैदानमा एनपीएलको भव्य शुभारम्भ हुँदै छ ।
उद्घाटन खेल विराटनगर किंग्स र जनकपुर बोल्ट्सबीच हुने छ । घरेलु क्रिकेटको सबैभन्दा ठूलो प्रतियोगिता एनपीएलमा ८ फ्रेन्चाइज टिम छन् ।
विराटनगर किंग्स, जनकपुर बोल्ट्स, चितवन राइनोज, काठमाडौं गुर्खाज, पोखरा एभेन्जर्स, कर्णाली याक्स, लुम्बिनी लायन्स र सुदूरपश्चिम रोयल्सले उपाधिका लागि प्रतिस्पर्धा गर्ने छन् ।
प्रतियोगितामा विश्वकपसहितका उच्चस्तरीय प्रतियोगिता खेलेका चर्चित स्वदेशी तथा विदेशी खेलाडी विभिन्न टिमबाट खेल्दै छन् । हरेक टिममा न्यूनतम ४ देखि अधिकतम ६ जनासम्म विदेशी खेलाडी छन् ।
१५ देशका ४० जना विदेशी खेलाडीहरू एनपीएलका लागि अनुबन्धित छन् । तीमध्ये ११ देशका २७ जना विदेशी खेलाडी नेपाल आइसकेका छन् ।
घरेलु मैदानमा मात्र नभई अन्तर्राष्ट्रिय मैदानमा पनि तहल्का मच्चाउन सफल नेपाली खेलाडीसँगै विदेशी खेलाडीलाई अनुबन्ध गरेर टोलीहरू बलियो देखिने होडमा छन् ।
विदेशी खेलाडीको चर्चासँगै नेपाली खेलाडीको प्रदर्शन कस्तो रहला भन्ने जिज्ञासा क्रिकेट समर्थकहरूमा छ । क्यानले पहिलो पटक आयोजना गर्न लागेको एनपीएलका लागि आयोजक मात्र होइन, खेलाडी र समर्थक पनि निकै उत्साहित छन् ।
शनिबार हुने उद्घाटन खेलका लागि करिब १० हजार टिकट विक्री भइसकेको छ । उद्घाटन खेलका लागि भीआईपीतर्फ ६०० र साधारणतर्फ ९ हजार २०० टिकट विक्री भइसकेको छ ।
विदेशी खेलाडी
प्रतियोगितामा विश्वकपसहितका उच्चस्तरीय प्रतियोगिता खेलेका चर्चित स्वदेशी तथा विदेशी खेलाडी विभिन्न टिमबाट मैदानमा उत्रँदै छन् । हरेक टिममा न्यूनतम ४ देखि अधिकतम ६ जनासम्म विदेशी खेलाडी रहने जनाइएको छ ।
पोखरा एभेन्जर्सले ४ विदेशी खेलाडी अनुबन्ध गरेको छ । एनपीएलका लागि पोखराले १० करोड रुपैयाँ लगानी गरेको छ । पोखरा एभेन्जर्समा कुशल भुर्तेलको कप्तानी रहने छ ।
पोखराको टिममा सागर ढकाल, आकाश चन्द, किरणकुमार ठगुन्ना, नारायण जोशी, विपीन खत्री, दिलीप नाथ, त्रितराज दास, सुनाम गौतम, दिनेश खरेल, अमृत गुरुङ, आन्द्रेस गौस (अमेरिका), बास डे लिडे (नेदरल्यान्ड्स), म्याट क्रिचली (इंग्ल्यान्ड), रेमन राइफर (वेस्टइन्डिज), माइकल लिस्क (स्कटल्यान्ड), सुदीप आर्याल (आइकोनिक) खेलाडी छन् । पोखरा एभेन्जर्सले राजीव कुमारलाई प्रशिक्षक बनाएको छ ।
जनकपुर बोल्ट्समा आसिफ शेख मार्की खेलाडी तथा ललित राजवंशी, अनिलकुमार साह, रूपेश सिंह, किशोर महतो, आकाश त्रिपाठी, शुभ कङ्साकर, शेर मल्ल, हेमन्त धामी, अरनिकोप्रसाद यादव, तुलबहादुर थापामगर, जिमी निशम (न्युजिल्यान्ड), जोसुआ ट्रम्प (अमेरिका), सोएब मक्सुद (पाकिस्तान), मोहमद मोहसिन (पाकिस्तान), लाहिरु मिलन्था (अमेरिका) र प्रशिक्षक पुबुदु दासानायके छन् ।
यस्तै, विराटनगर किंग्समा सन्दीप लामिछानेको कप्तानी रहेको छ । विराटनगरमा लोकेश बम, प्रतिश जी. सी., बसिर अहमद, राजेश पुलामी मगर, जितेन्द्रकुमार मुखिया, अनिल खरेल, दीपक बोहरा, सुभाष भण्डारी, नरेन भट्ट, मुनाल गुरुङ, अकिब इल्यास (ओमान), मार्टिन गप्टिल (न्युजिल्यान्ड), निकोलास किर्टन (क्यानाडा), क्रिस सोल (स्कटल्यान्ड), इस्मल आलम (अफगानिस्तान) छन् भने प्रशिक्षक केभिन ओ ब्राइन छन् ।
लुम्बिनी लायन्समा नेपालका कप्तान रोहितकुमार पौडेल मार्की खेलाडी छन् । उनका साथै सूर्य तामाङ, विवेक यादव, सन्दीप जोरा, आशुतोष घिरैया, तिलकराज भण्डारी, दुर्गेश गुप्ता, अर्जुन साउद, दिनेश अधिकारी, अभिषेश गौतम, विकाश अग्री, बेन कटिङ (अस्ट्रेलिया), उन्मुक्त चन्द (अमेरिका), टम मुर्स (इंग्ल्यान्ड), रेमन सिमन्ड्स (वेस्टइन्डिज), सादबिन जफर (क्यानाडा), आरिफ शान (आइकोनिक) छन् । प्रशिक्षक नन्दन फाडनिस छन् ।
चितवन राइनोजमा कुशल मल्ल मार्की खेलाडी रहेका छन् । रिजन ढकाल, कमलसिंह ऐरी, शरद् भेषावकर, विपीन रावल, सन्तोष कार्की, दीपेश श्रेष्ठ, अमरसिंह रटैला, दीपक बोहरा, रञ्जितकुमार, गौतम के. सी., रवि बोपारा (इंग्ल्यान्ड), मार्चन्ड डे लांग (दक्षिण अफ्रिका) (चोटले अनुपस्थित हुने), हसन इसाखिल (अफगानिस्तान), जान निकोल लोफ्टी इटन (नामिबिया), ल्युक मार्टिन बेनकेन्स्टाईन (इंग्ल्यान्ड), सलाहुद्दिन खान (आइकोनिक) खेलाडी तथा उमेश पटवाल प्रशिक्षक छन् ।
करण के. सी.को कप्तानीमा रहेको टिम काठमाडौंमा शाहब आलम, भीम सार्की, रसिद खान, शंकर राना, दीपेशप्रसाद कँडेल, सुमित महर्जन, कृष्ण कार्की, विवेक के. सी., प्रतीक श्रेष्ठ, राजु रिजाल, नेथन सोउटर (इंग्ल्यान्ड), स्टेफन इस्किनाजी (इंग्ल्यान्ड), ड्यान डौथवेट (इंग्ल्यान्ड), माइकल लेभिट (नेदरल्यान्ड्स), जेहार्ड एरासमस (नामिबिया), कृष कार्की (आइकोनिक) छन् । वसन्त शाही काठमाडौंका प्रशिक्षक छन् ।
दीपेन्द्रसिंह ऐरीको कप्तानी रहेको सुदूरपश्चिम रोयल्समा आरिफ शेख, अभिनाष बोहरा, विनोद भण्डारी, इशान पाण्डे, अर्जुन कुमाल, खडकबहादुर बोहरा, नरेश बुढाऐर, भोजराज भट्ट, अमित श्रेष्ठ, नरेन साउद, ब्रान्डन मक्मलेन (स्कटल्यान्ड), सेफ अली जेब (इंग्ल्यान्ड), स्कट कुगेलेइन (न्युजिल्यान्ड), रोहन मुस्तफा (यूएई), वसन्त खत्री (आइकोनिक) खेलाडी छन् ।
यसैगरी कर्णाली याक्समा सोमपाल कामी मार्की खेलाडी छन् । गुलशनकुमार झा, नन्दन यादव, मौसम ढकाल, अर्जुन घर्ती, देव खनाल, रीत गौतम, भुवन कार्की, दीपेन्द्र रावत, दीपक डुम्रे, युनिसविक्रमसिंह ठकुरी, शिखर धवन (भारत), हुनेस तलात (पाकिस्तान), बाबर हायत (हङकङ), चाडविक वाल्टन (वेस्टइन्डिज), जिसान मक्सुद (ओमान), विपीन शर्मा (आइकोनिक) तथा ज्ञानेन्द्र मल्ल प्रशिक्षक छन् ।
डिजिटल स्कोर बोर्ड
त्रिवि क्रिकेट मैदानमा पहिलो पटक डिजिटल स्कोर बोर्ड जडान गरिएको छ । अब खेलाडी टिम र समर्थकहरूलाई पनि त्रिवि मैदानमा ठूलो स्क्रिनमा खेलको स्कोर र अपडेटहरू हेर्न सहज हुने छ । यसअघि स्कोररले नै खेलको स्कोर अपडेट गर्दै आएकामा अब डिजिटल रूपमै स्कोर अपडेट हुने छ ।
फ्यान जोन र भीआईपी टिकट
यस पटक समर्थकहरूको सुविधालाई लक्षित गर्दै मैदानमा विभिन्न सुविधाहरू थप गरिएको छ ।
दर्शकहरूलाई यसअघिको जस्तो कठिन नहोस् भनेर फ्यान जोन छुट्याइएको छ । हरेक फ्यान जोनको फरक टिकट तोकिएको छ । दर्शकले जुन जोनको टिकट काट्ने छन्, त्यही जोनबाट भित्र पस्ने र बाहिरिने गर्नुपर्छ ।
यस्तै, हरेक जोनको बाहिर दर्शकहरूका लागि महिला र पुरुषका लागि अस्थायी शौचालको व्यवस्था गरिएको छ ।
अर्बौं लगानी
एनपीएलमा यस पटक लगानी धेरै भएको छ । फ्रेन्चाइज टिम किन्नकै लागि ३ करोड रुपैयाँसम्म खर्च भएको छ । पोखरा एभेन्जर्सले ३ करोड ५७ लाख रुपैयाँमा फ्रेन्चाइज किनेको थियो । यस्तै, कम खर्च गर्नेले पनि १ करोड रुपैयाँभन्दा माथि रकम फ्रेन्चाइज फि तिरेका छन् ।
यसबाहेक मार्की खेलाडीलाई २० लाख, खेलाडी अक्सनमा गरेको खर्च, विदेशी खेलाडीको खर्च र अन्य खर्च गरेर एक फ्रेन्चाइजले कम्तीमा ७ देखि १० करोड रुपैयाँसम्म खर्च गरेका छन् । ८ टिमले टिम लिन मात्र करिब १७ करोड रुपैयाँ क्यानलाई बुझाएका छन् ।
यसबाहेक एनपीएलको मुख्य प्रायोजकको रूपमा क्यानले सिद्धार्थ बैंकसँग ५ वर्षका लागि सम्झौता गरेको छ । सम्झौता रकम नखुलाइए पनि यो नेपाली खेलकुदमा अहिलेसम्म भएकोमध्ये सबैभन्दा ठूलो रकम भनेर क्यानले दाबी गरेको छ ।
एनपीएल ३ साता चल्ने भए पनि आर्थिक रूपमा १ अर्ब रुपैयाँभन्दा बढी कारोबार हुने छ ।
६२ लाखको कार
उत्कृष्ट नेपाली खेलाडीले ६२ लाख रुपैयाँको कार पाउने छन् । नेपाली क्रिकेट र खेलकुदको इतिहासमै उत्कृष्ट खेलाडीले पहिलो पटक कार पाउन लागेका हुन् ।
त्यसका लगि क्यानले ओमोडा एन्ड जेइकोसँग सम्झौता नै गरेको छ । सम्झौताअनुसार एनपीएलमा उत्कृष्ट हुने नेपाली खेलाडीले लिग सकिएपछि ६२ लाख रुपैयाँ बराबरको ओमोडा इ ५ कार प्राप्त गर्ने छन् ।
६ विदेशी कमेन्टेटर
एनपीएलका लागि ६ जना विदेशी कमेन्टेटर तोकिएका छन् ।
अमेरिकाका एन्ड्रयु लेनर्ड नेपाली क्रिकेटका चर्चित कमेन्टेटर हुन् । उनले नेपालका अधिकांश खेलहरूमा कमेन्ट्री गर्दै आएका छन् । एन्ड्रयुसहित एचडी अकरम्यान, ड्यारेन गौफ, श्रीधरण श्रीराम, मोनाली पटेल र मिखाइल वासवानीलाई क्यानले कमेन्ट्रीका लागि निम्त्याएको छ ।
सहभागी टोली : विराटनगर किंग्स, जनकपुर बोल्ट्स, चितवन राइनोज, काठमाडौं गुर्खाज, पोखरा एभेन्जर्स, लुम्बिनी लायन्स, कर्णाली याक्स र सुदूरपश्चिम रोयल्स
खेल हुने स्थान : कीर्तिपुरस्थित त्रिवि मैदान
नेपाली खेलाडी संख्या : ८ टोलीका १÷१ मार्की खेलाडी (८), अक्सनबाट १०÷१० खेलाडी (८०) र ट्यालेन्ट हन्टबाट १÷१ आइकोनिक खेलाडी (८), जम्मा : ९६ नेपाली खेलाडी
विदेशी खेलाडी : प्रत्येक टोलीमा कम्तीमा ४ र बढीमा ६ खेलाडी (४० खेलाडी आबद्ध, १ टोली ४ जना खेलाडी प्लेइङ– ११ मा राख्न पाउने प्रावधान)
नेपाली खेलाडीको पारिश्रमिक : मार्कीको २० लाख, अक्सनबाट छानिएका खेलाडीको बढीमा १५ र घटीमा २ लाख
विदेशी खेलाडीको पारिश्रमिक : कर्णालीका शिखर धवनको १ खेलको ३० हजार डलर, अधिकांश खेलाडीको पारिश्रमिक खुलाइएको छैन ।
