काठमाडौं : पोर्चुगलका कप्तान तथा विश्व फुटबलका चर्चित खेलाडी क्रिस्टियानो रोनाल्डोले अन्तर्राष्ट्रिय फुटबलबाट सन्न्यास लिने घोषणा गरेका छन् । ४१ वर्षीय रोनाल्डोले आफ्नो देशका लागि २३ वर्ष लामो अन्तर्राष्ट्रिय खेल जीवनको अन्त्य गर्ने निर्णय सार्वजनिक गरेका हुन् ।

रोनाल्डोले सामाजिक सञ्जाल इन्स्टाग्राममा भिडियो सन्देश जारी गर्दै पोर्चुगलको राष्ट्रिय टोलीको सात नम्बर जर्सी अब नयाँ पुस्तालाई सुम्पिने समय आएको बताएका छन् ।

‘पोर्चुगलका जनताका लागि अब राष्ट्रिय टोलीको सात नम्बर जर्सी फिर्ता गर्ने दिन आएको छ । यो जर्सी कहिल्यै मेरो मात्रै थिएन । तर २३ वर्षसम्म यसलाई लगाउने, यसको रक्षा गर्ने र विश्वभरका मैदानमा प्रतिनिधित्व गर्ने अवसर र जिम्मेवारी पाएँ,’ उनले भनेका छन् ।

उनले अन्तर्राष्ट्रिय फुटबलबाट अलग हुने निर्णय सहज नभएको पनि बताएका छन् । ‘यो सजिलो निर्णय थिएन । किनकि केही निर्णय दिमागले मात्रै होइन, मनले पनि लिनुपर्छ,’ रोनाल्डोले भनेका छन् ।

सन् २००३ को अगस्टमा पोर्चुगलको राष्ट्रिय टोलीबाट डेब्यु गरेका रोनाल्डोले आफ्नो अन्तर्राष्ट्रिय करिअरमा कीर्तिमानी २३४ खेल खेलेका छन् । उनले देशका लागि १४६ गोल गरेका छन् । अन्तर्राष्ट्रिय फुटबलमा सर्वाधिक खेल खेल्ने र सर्वाधिक गोल गर्ने दुवै कीर्तिमान उनकै नाममा छन् ।

रोनाल्डोको नेतृत्वमा पोर्चुगलले सन् २०१६ मा पहिलोपटक युरोपियन च्याम्पियनसिपको उपाधि जितेको थियो । त्यस्तै, सन् २०१९ मा यूईएफए नेसन्स लिगको उपाधिसमेत हात पारेको थियो ।

गत महिना डेनमार्कविरुद्धको नेसन्स लिग खेलमा सुरुआती टोलीमा नराखिने जानकारी पाएपछि रोनाल्डोले पोर्चुगलको प्रशिक्षण शिविर छाडेका थिए ।

‘सन् २००३ को अगस्टमा सुरु भएको र मेरो जीवन नै परिवर्तन गरेको यात्रा आज समाप्त भएको छ,’ उनले आफ्नो सन्देशमा भनेका छन् ।

रोनाल्डोको सन्न्यास घोषणासँगै अन्तर्राष्ट्रिय फुटबलमा उनको २३ वर्ष लामो ऐतिहासिक यात्रामा पूर्णविराम लागेको छ ।