रुकुम पूर्व : रुकुम पूर्वको पुथा उत्तरगंगा गाउँपालिकाको उपाध्यक्षमा नेकपा माओवादी केन्द्रकी नरपुरा बुढा विजयी भएकि छन् । आइतबार भएको उपनिर्वाचनमा एमाले-कांग्रेस गठबन्धनबाट उम्मेद्वार बनेकी केशकुमारी तुलाचनलाई फराकिलो मतान्तरले पछि पार्दै बुढा विजयी भएकी हुन् ।
बुढाले ३ हजार ६२७ मत ल्याउँदा गठबन्धनबाट कांग्रेसको चुनाव चिह्नमा लडेकी एमालेकी केशकुमारी तुलाचनले २ हजार १२८ मतमा ल्याइन् । बुढाले गठबन्धनलाई १ हजार ४९९ मतान्तरले पराजित गरेकी हुन् ।
यस्तै पुथा उत्तरगंगा गाउँपालिकाको २ नम्बर वडामा भने नेकपा माओवादी केन्द्रका जगत घर्ती यसअघि नै निर्विरोध निर्वाचित भएका थिए । पुथा उत्तरगंगा गाउँपालिका उपाध्यक्ष भूपेन्द्रा बुढा र २ नम्बर वडाध्यक्ष जस बहादुर शिर्पालीको गाडी दुर्घटनामा परी मृत्यु भएपछि उपनिर्वाचन भएको हो ।
