पोखरा : अनेसास गण्डकी प्रदेश समिति गठन भएको छ । साहित्यकार, गीतकार देवेन्द्र के.सी. 'देवु'को अध्यक्षतामा समिति गठन भएको हो ।
समितिमा दुर्गा न्यौपाने उपाध्यक्ष, असफल गौतम महासचिव, कल्याण पन्त सचिव, कृष्ण रानाभाट कोषाध्यक्ष, र सरस्वती शर्मा 'जिज्ञासु'लाई सदस्यको रूपमा चयन गरिएको छ ।
अनेसास नेपाल च्याप्टरको पहल र अनेसास केन्द्रीय समितिको सहमतिपछि यो प्रदेश समिति स्थापना गरिएको अध्यक्ष देवेन्द्र के.सी.ले बताए । अनेसास नेपाल च्याप्टरका अध्यक्ष राजेन्द्र के.सी.को अध्यक्षतामा भएको कार्यक्रममा प्रमुख अतिथि साहित्यकार तथा नेपाल नाट्य-संगीत प्रज्ञाप्रतिष्ठानका पूर्वकुलपति सरुभक्त श्रेष्ठ, विशेष अतिथि प्राज्ञ तथा वरिष्ठ लोक गायिका हरिदेवी कोइराला र अनेसास केन्द्रीय समितिका सदस्य रविन शर्मा, सुमन वर्षा, उपन्यासकार तथा पत्रकार बद्रीविनोद प्रतीकलगायत विशिष्ट व्यक्तित्वहरू उपस्थित थिए ।
सोही कार्यक्रममा देवेन्द्र के. सी. 'देवु'का हालै प्रकाशित २ कृतिहरू 'दृढ संकल्प' मुक्तकसंग्रह र 'देवु' गीति एल्बम विमोचनसमेत गरिएको थियो । साहित्यकार महेश्वर पन्तको गजल गायन पनि सोही अवसरमा सम्पन्न भएको थियो ।
