लमजुङ : लमजुङ सदरमुकाम बेंसीसहरमा आगामी पुस १२ गतेदेखि ३२औं त्रिवेणी कप फुटबल प्रतियोगिता आयोजना हुने भएको छ ।
आयोजक त्रिवेणी युवा क्लबले गत शनिबार पत्रकार सम्मेलन गर्दै बेंसीसहरको सहजीस्थित त्रिवेणी रंगशालामा प्रतियोगिता सञ्चालन हुने जानकारी दिएको छ । आयोजक त्रिवेणी युवा क्लव बेंसीसहरले प्रथम पुरस्कार राशि १२ लाख रुपैयाँ, त्रिवेणी कप, स्वर्णपदक र प्रमाणपत्र रहने जनाएको छ । प्रतियोगिता ९ दिनसम्म सञ्चालन हुने छ ।
आयोजक त्रिवेणी युवा क्लबका अध्यक्ष राजकुमार घिमिरेले गत वर्ष प्रथम पुरस्कार राशि ८ लाख रुपैयाँ रहेकोमा यस वर्ष बढाएर १२ लाख रुपैयाँ पुर्याइएको जानकारी दिए । दोस्रो पुरस्कार ६ लाख रुपैयाँ रहेको र पुरस्कारमा करकट्टी हुने उनले बताए ।
आयोजकका अनुसार प्रतियोगितामा सेमिफाइनलमा पुगेर पराजित हुने २ टिमलाई २–२ लाख रुपैयाँ दिइने छ । अनुशासित टिमलाई ट्रफी र प्रमाणपत्र तथा सर्वोत्कृष्ट खेलाडी र सर्वाधिक गोलकर्तालाई २५–२५ हजार रुपैयाँ, स्वर्णपदक र प्रमाणपत्र प्रदान गरिने आयोजकको भनाइ छ ।
प्रतियोगितामा टिमका लागि प्रवेश शुल्क नलाग्ने आयोजकले जानकारी दिएको छ । क्वार्टरफाइनलबाट आमन्त्रित टिमसमेत सहभागी हुनेछन् । यसमा विभागीयसमेतको नेपालका ‘ए’ डिभिजनका टिमहरु सहभागी हुनेछन् । आमन्त्रित टिम व्यवस्थापनमा मात्रै २० लाख रुपैयाँ खर्च हुने अनुमान गरिएको छ । प्रतियोगितामा कुल ८४ लाख ९० हजार रुपैयाँ खर्च हुने आयोजकको अनुमान रहेको छ ।
क्लबका अध्यक्ष राजकुमार घिमिरेको अध्यक्षतामा भएको पत्रकार भेटघाट कार्यक्रममा पूर्वअध्यक्ष लोकेन्द्र गुरुङ, सिजन श्रेष्ठ, उपाध्यक्ष खुशीजङ गुरुङ र टेकजङ गुरुङ, कोषाध्यक्ष प्रकाश घले, नेपाल पत्रकार महासंघ लमजुङ शाखा उपाध्यक्ष अनुज अधिकारीलगायतको उपस्थिति थियो । क्लबका सचिव प्रविन वाग्लेले कार्यक्रम सञ्चालन गरेका थिए ।
