बर्दिया : ‎‎बर्दियाको बाँसगढीबाट ४४ हजार बढी नगदसहित जुवा खालबाट ६ जना पक्राउ परेका छन् ।

‎बाँसगढी  नगरपालिका वडा नम्बर ४ मगरपुरस्थित कृष्ण अधिकारीको कुखुरा फार्म रहेको घर कोठामा  छापा मारेर प्रहरीले कुखुरा फर्म मालिकसहित ६ जुवाडे पक्राउ गरेको जिल्ला प्रहरी कार्यालय बर्दियाका प्रहरी नायव उपरीक्षक ऋषिराम धर्ती मगरले जानकारी दिए ।

‎अवैध रुपमा जुवा खेलिरहेको भन्ने गोप्य सूचनाका आधारमा पुगेको प्रहरी टोलीले छापा मारेर ६ जना जुवाडेसहित ४४ हजार २९० रुपैयाँ नगद बरामद भएको प्रहरी नायव उपरीक्षक धर्ती मगरले बताए ।

‎तास खेली रहेको अवस्थामा जुवाको खालबाट पक्राउ पर्नेहरुमा बाँसगढी ४ का ३५ वर्षीय कृष्ण अधिकारी, ३७ वर्षीय श्याम महेश अधिकारी, ३५  वर्षीय टेक बहादुर राना, ३३ वर्षीय प्रकाश चौधरी, ३४ वर्षीय चेत बहादुर थारू र ३५ वर्षीय होम सिंह ठकुरी रहेका छन् ।

जुवा खालबाट लु. ९७ प ३०९ नम्बरको एउटा मोटर साइकल, १ सय १० पत्ता खेल्न प्रयोग भएको तास, ३ गड्डी(प्याकेट)नखोलेको तास, विभिन्न कम्पनीका मोबाइल ७ थान प्रहरीले बरामद गरेको छ । जुवाडेहरुलाई नियन्त्रणमा लिइ आवश्यक अनुसन्धान भइरहेको प्रहरीले जनाएको छ ।