दोहा कतार : नेपाली सांगीतिक आकाशका लागि अनुपम उपहार हुन् म्याग्दीका सम्भोज मल्ल । उनका सिर्जनाले नेपाली संगीतको बजारमा तरङ्ग ल्याउने गरेको छ । करिब डेढ दशक अगाडि उनले बजारमा ल्याएको 'गोरी सुनारे' गीतले पप गीतको दुनियाँमा नयाँ मोड ल्याएको थियो । फरक आवाज र शैलीका धनी मल्लले त्यसपछि 'गोरी सुना रे २' पनि ल्याए ।
मल्लले ४ वर्ष पहिले 'उकाली' गीत सार्वजनिक गरे । करोड क्लब नजिक रहेको 'उकाली' पछि उनी 'तिम्रो काख मेरो निदाउने सिरानी' पप गीत लिएर आएका छन् । म्याग्दी जिल्लाको निस्कोटमा बडादसैंको अवसरमा आयोजित मेलामा मल्लले यही गीत गाए । जहाँ एक फ्यानले उनको भिडियो सामाजिक सञ्जाल टिकटमा राखिदिए र भाइरल भयो । जुन गीत मल्लले केही समय अगाडि अडियो रिलिज गरिसकेका थिए । उक्त मेलाको क्लिप भाइरल भएर अडियो सुन्ने दर्शक लाखौं पुगेपछि उनले अफिसियल म्युजिक भिडियो बनाएर आफ्नै च्यानलमार्फत सार्वजनिक गरेका छन् ।
मंगलबार साँझ सार्वजनिक भएको भिडियो प्रेमको कथामा घुमेको छ । सुशीला थापा र मल्ल आफैंले अभिनय गरेको भिडियोको कथाको अन्त्यलाई सस्पेन्स राख्दै अर्को भाग धोखामा खोल्ने तयारीमा निर्देशक र गायक रहेका छन् । सुन्दर प्रेम कहानी बोकेको गीतको भिडियोलाई सान थापाले निर्देशन गरेका हुन् । शब्द संगीत र गायकी सबै मल्लको रहेको गीतको भिडियोलाई दिनेश पराजुलीले खिचेका हुन् । विवेक सुनारले सम्पादन गरेको भिडियोमा रङ सुप्रिम पराजुलीले भरेका छन् ।
