अर्घाखाँची : जिल्ला प्रहरी कार्यालय अर्घाखाँची र पालि प्रहरी चौकी पाणिनीको संयुक्त आयोजनामा सार्वजनिक सुनुवाइ कार्यक्रम सम्पन्न भएको छ ।
समुदाय प्रहरी साझेदारी कार्यक्रम अन्तर्गत पाणिनी ७ पालिमा रहेको कमला माध्यमिक विद्यालय प्राङ्गणमा नागरिकसँग सार्वजनिक सुनुवाई कार्यक्रम सम्पन्न भएको हो ।
कार्यक्रममा गाउँपालिका ७ का जनप्रतिनिधिहरु, सामुदायिक सेवा केन्द्रका पदाधिकारीहरु, स्थानीय बुद्विजिवी स्थानीय राजनीतिक दल, समाजसेवीहरुको बाक्लो उपस्थिति रहेको थियो ।
कार्यक्रममा प्रहरी नायब उपरीक्षक (डीएसपी) चक्रबहादुर मल्लले आर्थिक वर्षमा जिल्ला प्रहरी कार्यालय अर्घाखाँचीले गरेका काम कारबाहीहरु, जनतासँग प्रहरीको सम्बन्ध, भावी योजना, प्रहरीले गर्नुपर्ने काममा कुनै गुनासा भए राख्न स्थानीय समक्ष अनुरोध गरेका थिए ।
डीएसपी मल्लले समुदायकै अगुवाईमा समाजलाई शान्त र सुरक्षित बनाउन आफू सदैव अग्रसर रहने बताउँदै जनताको सेवा प्रहरीले भरपर्दाे तरिकाले गर्ने र सबै नागरिकले सुरक्षित महशुस गर्ने गरी प्रहरी परिचालन गरिएको बताए ।
पालि क्षेत्रमा सीसीटीभी राखिनुपर्ने स्थानहरुको माग रहेकोले यस विषयमा सीसीटीभी यन्त्र जडान गरी निगरानी बढाइने मल्लले बताए ।
डीएसपी मल्लले सुरक्षित समाजका निम्ति समुदायबाट आफुले सामुदायिक गस्तिमा प्रहरीसँग समुदायको सहकार्य, घटनाको समयमै जानकारी, मदिराजन्य पदार्थको बिक्री वितरणमा निश्चित एरिया तोकिनुपर्ने र सडक अतिक्रमणमा रोक लगाउन समुदायको सहयोग उल्लेखनीय रहने बताए ।
कार्यक्रममा पाणिनी गाउँपालिका अर्घाखाँचीका शिक्षा शाखा प्रमुख तेज प्रसाद खनालले अपराधका सम्बन्धमा प्रहरी र समुदाय दुबैले ‘क्वीक अपरेशन’ गर्नुपर्ने र त्यसमा प्रहरीको बढी सक्रियता रहनुपर्ने बताए ।
खनालले सुरक्षित समाजका निम्ती सीसीटीभी जडान गर्ने दिशामा समेत सबैले चासो दिनुपर्ने र मदिरा नियन्त्रण गर्ने सवालमा आवश्यक योजना बनाइ अभियाननै चलाउनुपर्ने बताए ।
कार्यक्रममा नेपाल पत्रकार महासंघ अर्घाखाँचीका पूर्व अध्यक्ष असोक खनालले समुदाय प्रहरी साझेदारी अन्तर्गत गरिएको नागरिकसँग सार्वजनिक सुनुवाइ कार्यक्रम अत्यन्तै सराहनीय र अन्य कार्यक्रमभन्दा पृथक रहेको बताए ।
कार्यक्रममा पाणिनी गाउँपालपका वडा नम्बर ८ का अध्यक्ष रोमनाथ पाण्डेले सुरक्षित समाजको जिम्मेवारी प्रहरीको मात्रै नभइ सबै आम नागरिकको रहने बताए ।
समुदाय र प्रहरीसँगको सहकार्यमा काम गर्दै आइरहेको शान्त र सुरक्षित समाजका निमित्त प्रहरी र स्थानीय पदाधिकारीले मात्रै गरेर नहुने हुँदा सो विषयमा आम नागरिक पनि त्यतिकै सजक रहनुपर्ने स्थानीय इन्सु मियाले बताए ।
कार्यक्रममा ट्राफिक प्रहरी, नेपाल प्रहरीले गरिरहेका कामहरु तथा पालि प्रहरी चौकीले गरेका कामका बारेमा समीक्षा गरिएको थियो ।
