दमाम, साउदी अरेबिया : साउदी अरेबियाको पूर्वी प्रान्तस्थित दमाममा आयोजित दुईदिने विशेष राहदानी नवीकरण तथा वितरण शिविर सफलतापूर्वक सम्पन्न भएको छ । 

रियादस्थित नेपाली दूतावासको आयोजना र गैरआवासीय नेपाली संघ (एनआरएनए) साउदीको समन्वयमा शुक्रबार र शनिबार आयोजित शिविरमा १ हजार ५ सय ५७ जनाले राहदानी नवीकरणका लागि फारम भरेका थिए भने ४ सय १० जनालाई नयाँ राहदानी वितरण गरिएको थियो ।

दमाम, जुबेल, अलहासा, खोबर, कतिफ लगायतका विभिन्न स्थानबाट आएका नेपाली श्रमिकहरूले यस शिविरबाट लाभ लिएका छन् । शिविरले विशेषगरी नेपाली श्रमिकहरूको कामकाजमा पर्न सक्ने असरलाई न्यूनीकरण गर्दै सहजता प्रदान गरेको छ ।

एनआरएनए साउदी अरेबियाको समन्वयमा विभिन्न संघ-संस्था, स्वयंसेवक र स्थानीय नेपाली समुदायले शिविरलाई सफल बनाउन सक्रिय भूमिका निर्वाह गरेका थिए । साप्ताहिक बिदाको समयमा आयोजना गरिएकाले सेवाग्राहीहरूको व्यापक सहभागिता रहेको थियो ।

राहदानी वितरण कार्यक्रमले साउदी अरेबियामा कार्यरत नेपाली श्रमिकहरूको प्रशासनिक प्रक्रियालाई सहज बनाउँदै उनीहरूको समय र श्रम बचत गर्न महत्त्वपूर्ण योगदान पुर्‍याएको छ । विशेषगरी पूर्वी क्षेत्रका श्रमिकहरूको माग र आवश्यकतालाई सम्बोधन गर्न आयोजित यो शिविरले सकारात्मक प्रभाव पार्न सफल भएको छ ।

सेवाग्राहीहरूले यस्ता कार्यक्रमलाई निरन्तरता दिन नेपाली दूतावास र सम्बन्धित निकायलाई आग्रह गरेका छन् । यस्ता पहलहरूले श्रमिकहरूको समस्या समाधान गर्दै उनीहरूको जीवनस्तरमा सुधार ल्याउन सहयोग पुर्‍याउने विश्वास व्यक्त गरिएको छ । पूर्वी क्षेत्रका नेपाली श्रमिकको मागलाई ध्यानमा राख्दै दूतावासले आगामी जनवरी २४ र २५ मा जुबेलमा शिविर राख्ने भएको छ ।