दोहा, कतार : सामाजिक सञ्जाल टिकटकमा चर्चित नाम हो अशोक पौडेल । नेपाली गीतसंगीतलाई टिकटकमार्फत विश्वभर पुर्‍याउन पुलको काम गर्ने फलेवास नगरपालिका वडा नम्बर ७ पर्वतका पौडेल पछिल्लो समय अभिनयमा सक्रिय भएर लागेका छन् । करिब एक दर्जन म्युजिक भिडियोमा काम गरिसकेका र पढाइमा मास्टर डिग्री पास गरेका पौडेलले अभिनय गरेको नयाँ म्युजिक भिडियो 'ज्यानै फालिदिन्छु' अहिले चर्चामा छ । 

सामाजिक सञ्जालमा निकै चर्चामा रहेको गीतले केटीको चिनामा अनिष्टको खोट भएपछि विवाह हुन नसकेर विरक्तमा परेका प्रेमील जोडी एक अर्का बिना बाच्न नसक्ने कथा गीतले बोकेको छ । विवाह हुँदैन भन्ने ज्योतिषी नै पिट्न पछि नपर्ने प्रेमी पौडेलको पागलपनको पछि एकोहोरो भएर प्रेम गरेकी प्रेमिकाको भूमिकामा निरुता शाहीले अभिनय गरेकी छन् । शाही र पौडेलसँगै गीतको भिडियोमा प्रभात रिमाल, प्रभात तिवारी र मिना तामाङको अभिनय पनि देख्न सकिन्छ ।

वियोगान्त प्रेमको कथामा बनेको गीतमा देवी घर्ती र पुरन विरहीको आवाज छ भने सागर रेग्मी र अलिशा तामाङले शब्द कोरेका हुन् । सागर रेग्मीले संगीत सिर्जना गरेको गीतमा अनमोल बस्नेतले संगीत संयोजन गरेका छन् । भिडियोको कथा सिर्जन बरालले लेखेका हुन् भने निर्देशन पनि बरालकै रहेको छ । रेसम दर्लामीले खिचेको भिडियोलाई अमृत चापागाईंले सम्पादन गरेका हुन् भने सम्मिया इन्टरटेन्मेन्ट युट्युब च्यानलबाट गीत बजारमा आएको छ ।