काठमाडौंः गायक तथा अभिनेता प्रकाश सपुतले आफ्नो डेव्यु निर्देशकिय चलचित्र ‘वसन्त’को पहिलो गीत दुई दिनअघि रिलिज गरेका थिए । चलचित्रको पहिलो गीत ‘साँझ पर्यो झमक्क’ रिलिज भएको २४ घण्टा पनि नपुग्दै युट्युबको ट्रेन्डिङमा उक्लिएको थियो । हाल यो गीत युट्युबको ट्रेन्डिङ अन्तर्गत म्युजिक सेक्सनको तेस्रो नम्बरमा छ । सार्वजनिक गीतले दर्शकमाझ चर्चा पाइरहेकाले युट्युब ट्रेन्डिङको शीर्ष स्थान तर्फ आफ्नो पाइला बढाइरहेको छ ।
गायक, अभिनेता तथा निर्देशक समेत रहेका सुपतले नै शब्द रचना र संगीत तयार पारेको गीतको अडियो र भिडियो दुवै पक्ष अब्बल रहेको प्रतिक्रिया पाइरहेको छ । गीतको कमेन्टबक्समा दीपक विश्वकर्मा नामका दर्शकले लेखेका छन्, ‘प्रकाश सपुतको यो कलालाई उच्च सम्मान छ । यो चलचित्र ‘वसन्त’ सुपरहिट बन्न सफल बनोस्, शुभकामना !’ यता अर्का दर्शक अनिलले लेखेका छन्, ‘म त प्रकाश सपुतको प्रतिभा र क्षमता देखेर अचम्मै पर्छु । भगवान छन भने र भगवानले मान्छे बनाउछन भने साच्चिकै फुर्सदमा धेरै समय खर्चेर बनाएको मान्छे जस्तो । आहा कति प्रतिभाशाली ।’
यस्तै अर्का दर्शक दीपक बस्नेतले लेखेका छन्, ‘हाम्रो पुरानो सव्यता संस्कृति जोगाउने अहिलेको एकमात्र पुरुष प्रकाश सपुत । तिमी साचिँकै सपुत हौं ।’ उनीसँगै गीतको कमेन्टबक्समा अर्का दर्शक हिमाल सागर हिङमाङ्गले लेखेका छन्, ‘बिस्तारै नयाँ पुस्ता यसैगरी नेपाली मौलिक लोक गीतहरुमा भिज्दै गइरहेको देखिन्छ यो सबै कथावस्तुको प्रभावले हो । जो प्रकाश दाईले आफ्ना प्रस्तुतीहरु मौलिकपन एकपछि अर्को गर्दै दिइरहनु भएको छ । चलचित्र ‘वसन्त’को सम्पूर्ण टिमलाई उच्च सफलताको कामना गर्दछु ।’
सार्वजनिक गीतमा गायनमा सपुतलाई पछिल्लो समयकी चर्चित गायिका शान्तिश्री परियारले साथ दिएकी छन् । चलचित्रमा प्रकाश सपुत, स्वस्तिमा खड्का, प्रभात पाल ठकुरी, श्री शिभान्सी, उर्मिला लाम्गादे र खड्क बहादुर पुन (खबपु), अनुप बराल, कमलमणी नेपाल, प्रकाश घिमिरे लगायतका कलाकारको पनि अभिनय रहेको छ । गलबन्दी प्रोडक्सनको प्रस्तुति रहने सोसल ड्रामा चलचित्रमा कथा, पटकथा र संगीत पनि सपुतले नै तयार पारेका हुन् ।
विपन्न विश्वकर्मा समुदायको छोराको लेखक बन्ने सपना र लक्ष्य हासिल गर्न उसले गर्ने संघर्षको कथा चलचित्रले भन्ने छ । चलचित्रको निर्मातामा मोहन विश्वकर्मा र बिन्दु बोहोरा तथा कार्यकारी निर्मातामा अनुरोध भट्टराई, नाना थकाली र विरेन्द्र नारायण श्रेष्ठ छन् । चलचित्रलाई सुसन प्रजापतिले खिचेका हुन् । काठमाडौं उपत्यकामा डिसिएन र मोफसलमा एफडी कम्पनीले चलचित्रलाई वितरण गर्नेछन् ।
