मझुवागढी रणजितमान राई खेल मैदानको डिपिआर सम्पन्न
सन्तोश पौडेल/मध्यान्ह
खोटाङ : खोटाङको दिक्तेल रुपाकोट मझुवागढी नगरपालिका–५ लफ्याङमा निर्माणाधीन मझुवागढी रणजितमान राई खेलमैदानको डिपिआर सम्पन्न भएको छ । आरसिसी कन्सल्ट प्रा.लि.ले तयार पारेको डिपिआर २० करोड ९९ लाख ७० हजार २ सय ९३ रुपैयाँ लागतमा १२० मिटर लम्बाई र ८० मिटर चौडाइको फूटबल खेलमैदान सप्पन्न हुने भएको छ ।
रातका समयमा पनि खेल्न सकिने साथै खेलमैदानमा ४० हजार जना अट्ने गरि बन्ने खेलमैदानमा विद्युतको व्यावस्था, बस कार तथा मोटरसाइकल पार्किङस्थल, गेस्ट रुम, चेन्जिङ रुमसहितको घर सामान्य तथा भिआईपी शौचालय, पिउनेपानी रहने गरी बनाइएको संरचना निर्माण गर्ने गरी उक्त खेलमैदानको डिपिआर तयार पारिएको वडाअध्यक्ष निर्मल राईले बताए । खेल मैदान निर्माणका लागि स्थानीय बासिन्दाले १८ रोपनीभन्दा बढी जग्गा नि स्शुल्क दिएका हुन् । उक्त खेलमैदान लफ्याङको छिवामा बन्ने भएको हो ।
वि.स. २०६७ जेठ ७ गते शिलान्यास भएको खेलमैदानमा वडा कार्यालयको रु १२ लाख ७० हजारको खर्चमा सो खेलमैदान शिलान्यास गरिएको थियो । खेलमैदान निर्माणको अधिकांश सम्याउने काम सम्पन्न भएको र बाँकी काम पूरा गर्नका लागि स्थानीय राजेन्द्र राईको अध्यक्षतामा सात सदस्यीय आर्थिक सङ्कलन सहयोग समिति गठन गरिएको राईले बताएका छन् ।
खेलमैदानको बाँकी काम पूरा गर्नका लागि आवश्यक रकम जुटाउन भन्दै आर्थिक सङ्कलन सहयोग समितिले वि.सं. २०७६ असोज ९ गते १ नम्बर प्रदेशका मुख्यमन्त्री शेरधन राईसँग गुनासो राखेको थियो । मुख्यमन्त्री राईले खेलमैदान निर्माणका लागि आवश्यक सहयोग गर्ने प्रतिवद्धता जनाएका छन् ।
लफ्याङ वडा कार्यालयको आग्रहमा स्थानीय पञ्चसेर राईले नौ रोपनी, सर्वजित राईले पाँच र हर्कराज राईले तीन रोपनी जग्गा वडाको नाममा निःशुल्क पास गरिदिएका हुन् । निःशुल्क जग्गा उपलब्ध भएपछि खेलमैदान निर्माण शुरु गरिएको हो । खेलमैदानका लागि चन्दा सङ्कलन गरि दाताको सहयोगमा निर्माण शुरु गरिएको थियो । खेलमैदानका लागि स्थानीय बालाचन्द्र राईले सात रोपनी जग्गा निःशुल्क प्रदान गरेका हुन् ।
निःशुल्क जग्गा उपलब्ध गराएका जग्गदाताकै बाजे रणजितमान राईको नामबाट खेलमैदानको नामाकरण गरिएको निर्माण उपभोक्ता समितिका अध्यक्ष पञ्चशेर राईले बताए । छिवामा अन्तर्राष्ट्रिय मापदण्ड अनुसारको खेलमैदान निर्माण हुने भएपछि स्थानीय बालिन्दा हर्षित भएका छन् ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies