काठमाडौं : अमेरिकी राष्ट्रपति डोनाल्ड ट्रम्पले ‘ट्रम्प गोल्ड कार्ड’ नामक नयाँ भिसा कार्यक्रम सुरु गरेका छन् ।
ट्रम्पले यो कार्यक्रम अन्तर्गत कार्ड खरिदका लागि ५० लाख अमेरिकी डलर अर्थात् ७० करोड नेपाली रुपैयाँमा खरिद गर्न सकिने जनाएका छन् ।
उक्त कार्डले अमेरिकामा बसोबास र काम गर्ने सुविधा प्रदान गर्ने तथा नागरिकता प्राप्त गर्न मार्ग खोल्ने बताइएको छ ।
ट्रम्पका अनुसार गोल्ड कार्ड बिक्री दुई हप्ताभित्र सुरु हुनेछ र लाखौं कार्ड बिक्री हुन सक्ने अनुमान गरिएको छ । यस्तै उनले यो कार्ड रुसी अर्बपतिहरुलाई पनि बिक्री गर्ने जनाएका छन् ।
ट्रम्पले यसलाई अमेरिकी नागरिकता प्राप्त गर्ने नयाँ मार्गको रूपमा प्रस्तुत गरेका छन्। उनले ‘ट्रम्प गोल्ड कार्ड’ लाई हालको ईबी-५ भिसा कार्यक्रमको विकल्प भनेका छन् ।
सन् १९९२ मा अमेरिकी कंग्रेसले ईबी–५ कार्यक्रम स्थापना गरेको थियो, जसअन्तर्गत कम्तीमा १ दशमलव ५ मिलियन डलर वा आर्थिक रूपमा कमजोर क्षेत्रका परियोजनामा ८ लाख डलर लगानी गर्ने विदेशी नागरिकले अमेरिकामा स्थायी बसोबास अनुमति (ग्रीन कार्ड) पाउने व्यवस्था छ ।
