काठमाडौ : काठमाडौंमा जारी केपी ओली कप फुटबल प्रतियोगिता हेर्न फिफा विश्वकप विजेता इटालीका गोलकिपर जियानलुजी बफोन नेपाल आइपुगेका छन् ।
विश्वकै उत्कृष्ट गोलकिपरमध्ये एक बफोन केपी ओली कप फुटबल प्रतियोगिताको हेर्न आइतबार नेपाल आइपुगेका हुन् ।
प्रतियोगिताका आयोजक राष्ट्रिय युवा संघ नेपालका अध्यक्ष क्षितिज थेवेसहितले बफोनलाई त्रिभुवन विमानस्थलमा स्वागत गरेका छन् । केपी ओली कपको तेस्रो संस्करण गत आतबारदेखि जारी छ । यसको फाइनल खेल सोमबार दशरथ रंगशालामा हुनेछ । प्रतियोगिताको फाइनल खेल बफोनले दशरथ रंगशालामा हेर्नेछन् ।
बफोनअघि ब्राजिलका स्टार फुटबलर रोनाल्डिन्हो र रोबर्टो कार्लोसलाई ल्याउने प्रस्ताव भएको थियो । तर उनीहरू नआउने भएपछि बफोनलाई ल्याइएको हो ।
बफोन नेपाल टेक्नेमा विश्व फुटबलकै ठूला नाममध्ये एक भएका छन् । सन् २००६ को फिफा विश्वकप जितेका बफोनले कीर्तिमानी १७६ अन्तर्राष्ट्रिय खेल खेलेका छन् । उनी सर्वाधिक अन्तर्राष्ट्रिय खेल खेल्ने गोलकिपर हुन् । उनले इटलीका लागि ८० खेलमा कप्तानी गरेका थिए ।
बफोनले सन् १९९८ देखि २०१४ सम्म लगातार ५ विश्वकप खेलेका थिए । केपी ओलीकपको तेस्रो संस्करणमा दुई विदेशी ९ टोलीले प्रतिस्पर्धा गरेका छन् ।
