गैंडाकोट : पूर्वी नवलपरासीको गैंडाकोट नगरपालिकाले विभिन्न पूर्वाधार विकास, कृषि प्रवद्र्धन, स्वास्थ्य सुधार र प्रविधिमैत्री सेवा प्रवाहलाई मुख्य प्राथमिकता दिएर काम गरेपछि नेपालको उत्कृष्ट नगरपालिका बन्दै पुरस्कृत भएको छ । नगरपालिकामा केही समय पहिला प्रमुख प्रशासकीय अधिकृत झविन्द्र खनाल आएसँगै योजनाबद्ध विकास निर्माणका कामहरूमार्फत् समृद्ध गैंडाकोट नगरपालिका  निर्माण गर्ने लक्ष्य पूरा हुँदै गएको जनप्रतिनिधिहरू बताउँछन् ।

नगरपालिकाले अहिले कृषि तथा पशुपालन उद्यमशीलतालाई पहिलो प्राथमिकतामा राखेर बेरोजगारी समस्या समधानका लागि नयाँ योजनाहरू अगाडि बढाउँदै आएको छ । ‘हाम्रो मुख्य उद्देश्य स्थानीय कृषकहरूको उत्पादनलाई बजारसँग जोड्ने हो, किसानको क्षमता अभिवृद्धि गर्नुका साथै नगरपालिकाको आम्दानी वृद्धि गर्नु रहेको छ । यसका लागि नगरपालिकाले कृषकलाई अनुदान र सहजीकरण प्रदान गर्दै आएको छ,’ प्रमुख प्रशासकीय अधिकृत खनालले बताए ।

नगरपालिकाभित्रका मुख्य सडकहरूमध्ये धेरै सडक कालोपत्रे भइसकेको र केही हुने क्रममा रहेका छन् भने सहायक मार्गका सडकहरूको स्तरोन्नति कार्य भइरहेको प्रमुख प्रशासकीय अधिकृत खनालले जानकारी दिए । सडकको अवस्था सुधार हुँदा नागरिकको दैनिकी सहज बन्दै गएको खनालको भनाइ छ । ‘आगामी दिनमा अझै सडक नेटवर्कलाई मजबुत बनाउने योजना राखेका छौं,’ खनालले मध्यान्हसँग भने । ग्रामीण नागरिक आवास सुरक्षामा पनि नगरपालिकाले महत्वपूर्ण पहल गरेको छ ।

नगरपालिकाले आधारभूत स्वास्थ्य सेवा र सुरक्षित मातृत्वलाई पहिलो प्राथमिकतामा राखेको छ भने सुद्ध खानेपानी आपूर्ति विस्तार गर्न विशेष ध्यान दिएको छ । सिँचाइ विस्तार गर्दै कृषकको कुलोमा समयमै पानी आपूर्ति गर्ने कार्यक्रमलाई पनि नगरपालिकाले प्राथमिकतामा राखेको छ । ‘स्वच्छ खानेपानी र भरपर्दो सिँचाइ सुविधाका माध्यमबाट नागरिकको आधारभूत आवश्यकता पूरा गर्नुका साथै आर्थिक उपार्जनमा टेवा पु¥याउने लक्ष्य राखिएको प्रशासकीय अधिकृत खनालले बताए ।

नगरपालिकाले कोल्डस्टोर निर्माण गरी किसानले उत्पादन गरेका कृषि उपहजलाई सुरक्षित गरेको छ  । जसले कृषिजन्य उत्पादनको भण्डारण र बजारीकरणमा मद्दत पुर्‍याएको छ ।

सेवा प्रवाहलाई प्रविधिमैत्री बनाउने र पारदर्शिता तथा जवाफदेहिता बढाउने नीति मा नगरपालिका अडिग रहेको खनाल बताउँछन् । ‘हामीले डिजिटल सेवा प्रवाहमा ध्यान दिएका छौं । नागरिकले सहजरूपमा आफ्ना सेवाहरू प्राप्त गर्न सकुन् भन्ने हाम्रो लक्ष्य हो । यसका लागि प्रविधिको उच्चतम प्रयोग भइरहेको छ,’ प्रमुख प्रशासकीय अधिकृत खनालले भने ।

नगरपालिकाले  गुनासो र सुझावहरूको व्यवस्थापनमा पनि लचिलो र समावेशी दृष्टिकोण राखेको छ । खनालका अनुसार भविष्यमा कृषि, पर्यटन र सहकारी क्षेत्रलाई मुख्य आर्थिक मेरुदण्ड बनाउने लक्ष्य राखिएको छ । उनले संघ, प्रदेश र स्थानीय सरकारको नीति तथा मार्गदर्शनलाई आधार मान्दै पारदर्शिता, जवाफदेहिता र प्रभावकारी प्रशासनिक व्यवस्थापनलाई प्राथमिकता दिएको बताए ।