काठमाडौं : बलिउड अभिनेत्री तथा आइटम गर्ल नोरा फतेही नेपाल आउने भएकी छन् । ३ जेठ अर्थात् १७ मे २०२५ मा हायात ग्राउन्ड, बौद्ध टुसालमा आयोजना हुने ‘नोरा फतेही लाइभ इन नेपाल’मा नेपाली दर्शकहरूलाई नचाउन नोरा नेपाल आउन लागेकी हुन् ।
वल्र्डवाइड फिल्म्स नेटवर्क प्रा. लि.को आयोजनामा हुने कार्यक्रम शिक्षाबाट बञ्चित बालबालिकाहरूका क्षेत्रमा काम गर्दै आएको ह्युमन रेस्पेक्ट नेपालको सहयोगार्थ आयोजना हुने छ भने मनु मिडिया प्रा. लि.ले इभेन्ट व्यवस्थापन हेर्ने छ ।
नेपालमा आयोजना हुँदै आएका इन्टरनेसनल आर्टिस्टहरूको शोबीच ‘नोरा फतेही लाइभ इन नेपाल’ अझ उत्कृष्ट हुने दाबी गर्छन् इभेन्ट म्यानेजर मनीष कार्की । यसका लागि मुम्बईबाट नोरासहित २० बढी कोरस डान्सरहरू प्रस्तुतिका लागि नेपाल आउने छन् ।
पूर्ण मनोरञ्जनसहितको कार्यक्रम हेर्न नेपालीसँगै सीमावर्ती क्षेत्रका भारतीय दर्शकहरूसमेत आउने विश्वास आयोजक संस्थाले राखेको छ । यहाँ दर्शकहरूले नृत्य र संगीतको भरपूर मजा लिन सक्ने छन् ।
फिल्म निर्माण र सामाजिक काममा लाग्दै आएका आयोजक संस्थाका अध्यक्ष देव मगरका अनुसार नोरा फतेही लाइभ इन नेपालमा चर्चित नेपाली कलाकारहरूको पनि प्रस्तुति रहने छ ।
आयोजक संस्थाले टिकटको मूल्य २ हजार, ४ हजार, ७ हजार र १६ हजार रुपैयाँ तय गरिएको जनाएको छ । नोराले बलिउडमा ‘दिलबर दिलबर’, ‘कुसु कुसु’, ‘ओ साकी साकी’, ‘नाच मेरी रानी नाच’ सुपरडुपर हिट गीतहरूमा काम गरेकी छन् ।
.jpeg)
