नेपाली चलचित्र क्षेत्रमा चर्चामा आइरहेने नायिकाका रुपमा परिचित नाम हो शुभेच्छा थापा । नेपाली चलचित्र क्षेत्रमा बोल्ड नायिकाको रुपमा चिनिने शुभेच्छाले अभिनयसँगै चलचित्र निर्माणमा पनि आफूलाई संलग्न गराउँदै आएकी छन् । आफ्नै निर्माणमा आधा दर्जनभन्दा बढी चलचित्र निर्माण गरिसकेकी उनी चलचित्र ‘लक्ष्मी रानी’ मार्फत निर्देशकका रुपमा पनि दर्शकमाझ आफ्नो छुट्टै छाप छोड्न सफल भइन् । चलचित्र जुनसुकै भूमिकामा पनि सशक्तरुपमा प्रस्तुत हुने उनी बोल्ड सिन तथा पारिवारिक चलचित्रमा पनि उत्तिकै आफ्नो अभिनय कला पस्किन सफल छिन् ।
नेपाली चलचित्र क्षेत्रकी लोकप्रिय र व्यस्त नायिका थापाले ‘मिस नेपाल’, ‘विन्दास ३’, ‘प्रहार’, ‘म को हुँ’, ‘टाइगर द रियल हिरो’ जस्ता चर्चित चलचित्रमा अभिनय गरिसकेकी छन् । उनले ४० वटा जति चलचित्रमा नायिकाको भूमिका निर्वाह गरिसकेकी छन् । सानैदेखि रंगमञ्चबाट आफ्नो कलाकारिता यात्रा शुरु गरेकी नायिका थापाले पाँच दर्जनभन्दा बढी म्युजिक भिडियोमासमेत अभिनय कला पस्किएकी छन् । नेपाली चलचित्र क्षेत्रमा नायिका, निर्माता तथा लेखकको रुपमा दर्शकमाझ आफ्नो अलग्गै पहिचान बनाउन सफल शुभेच्छा थापासँग मध्यान्ह राष्ट्रिय दैनिकका लागि कमला अधिकारीले गरेको कुराकानीको संक्षिप्त अंश–
पछिल्लो समय के मा व्यस्त हुनुहुन्छ ?
विगत नौ महिनादेखि तपाईं हामी सबै कोरोना कहरमा छौं । अन्य क्षेत्र केही सहज भए पनि कला क्षेत्र भने अझै पनि बन्द कै अवस्थामा छन् । फेरि पनि केही म्युजिक भिडियो, केही सिरियलका कामहरू फाट्टफुट्ट रुपमा भएका छन् । म आफूलाई पनि त्यसैमा संलग्न गराउँदै आएकी छु । केही नयाँ चलचित्रको कुरा पनि भइरहेको छ । यसको काममा पनि व्यस्त छु । कोरोना कहरमा अप्ठायारोमा पर्नुभएकाका लागि सक्दो सहयोगको हात पनि बढाएँ । स्वास्थ्य सामग्री वितरणदेखि राहत वितरण तथा भोका पेटलाई खाना खुवाउने कार्यमा सक्रिय राखें आफूलाई । सहयोगी आत्मनिर्भर अनाथ आश्रमलाई एक वर्षसम्म १० जना बालबालिकालाई पढ्ने खर्च र खाद्यान्न राहत सामग्री पनि प्रदान गरें । यस्ता कार्य गर्दा छुट्टै सुखानुभुती हुने गर्दछ । आफ्ना केही व्यक्तिगत कामहरू, केही समाजिक कार्यहरू यस्तै यस्तैमा बितिरहेको छ पछिल्लो समय ।
कला क्षेत्रमा कसरी आउनुभयो ?
कला क्षेत्रमा सानैदेखि लागेकी हुँ म । मेरो आमा गीत संगीत र चलचित्रलाई असाध्यै माया गर्नुहुन्थ्यो । मेरो आमाको प्रेरणाले नै म यो क्षेत्रमा आएँ ।
पहिलो के थियो ?
मेरो कलाकारिताको सुरुवात रंगमञ्चबाट भएको हो । बद्री अधिकारीको टेलिशृंखला ‘सहयात्री’बाट मेरो औपचारिकरुपमा कलाकारिता क्षेत्रमा प्रवेश भएको हो । मैले नायिकाको भूमिकामा अभिनय गरेको पहिलो चलचित्र ‘ध्रुव’ हो ।
थुप्रै चलचिमा अभिनय गर्नुभयो, लेखन कार्यतिर लाग्नुभएको छ भने चलचित्र निर्देशन पनि गर्नुभयो, निर्देशन गर्ने सोच कसरी आयो ?
सानैदेखि कला क्षेत्रमा रहेपनि चलचित्र ‘धुर्व तारा’ मार्फत रजतपटमा प्रवेश गरेकी म करिब डेढ दशकपछि चलचित्र ‘लक्ष्मी रानी’ मार्फत निर्देशकमा पाइला चालेकी हँु । लामो समयसम्म यो क्षेत्रमा रहेकी म आफैँ अझ राम्रो निर्देशन किन नगर्ने भनेरे लागें । तपाईंले भने जस्तै चलचित्र लेखनमा पनि आफूलाई संलग्न गराएकी छु ।
एक्सन कट कतिको गाह्रो रहेछ ?
आफ्नो काम हो, त्यस्तो गाह्रो लाग्दैन मलाई । आफ्नो पेशा हो, काम हो, पूजा हो । शुरुका दिनहरुमा अलिक अप्ठायारो लाग्थ्यो तर काम गर्दै जाँदा सिकिन्छ, सिक्दै जाने कुरा हो ।
तपाईं नायिका, निर्माता कि निर्देशक ?
म २०६२ सालदेखि यो क्षेत्रमा छु । मैले धेरै सिरियल, म्युजिकि भिडियो र चलचित्रमा अभिनय गरेकी छु । आफ्नै व्यानरको चलचित्र को हुँ म, मिस नेपाल मखमलीलगायतमा नायिका र निर्माता भएर रहेँ । यस हिसाबले म नायिका र निर्मात दुवै भन्नुपर्ला । फेरि निर्देशन तर्फ पनि आफूलाई अघि बढाएको हिसावले निर्देशक पनि भन्नुपर्ला । समग्रमा म एउटा कलाकार हुँ ।
लामो समयदेखि यो क्षेत्र हुनुहुन्छ । यो क्षेत्रका समस्याहरु के–के छन् जस्तो लाग्छ ?
हरेक क्षेत्रमा समस्या हुने गर्छन् । त्यसलाई समाधान गरेर अघि बढनु पर्ने हुन्छ । अरु क्षेत्रमा जस्तै यो क्षेत्रमा पनि धेरै समस्याहरु छन् । हाम्रो चलचित्रको सानो बजार छ । यो क्षेत्रलाई व्यवस्थित बनाउनु पर्ने छ । यसलाई व्यवस्थित बनाउनेतर्फ राज्यले ध्यान पुर्याउनु पर्छ । यही क्षेत्रमा काम गर्ने पक्षहरू संवेदनशील हुन जरुरी छ ।
यो क्षेत्रलाई व्यवस्थित बनाउन के गर्नुपर्ला ?
सर्वप्रथम यो क्षेत्र आर्थिक रुपले सवल हुनुपर्छ । कलाकारहरूले उचित पारिश्रमिक पाउनुपर्छ । यो क्षेत्र आर्थिकरुपले सवल हुनको लागि चलचित्र क्षेत्र उद्योगका रुपमा आउनुपर्छ ।
सिनेमा क्षेत्र हल्लै हल्लाले चलेको भन्छन् नि ?
चलचित्र क्षेत्र मनोरञ्जनको क्षेत्र हो । यो ग्ल्यामरको क्षेत्र हो । अन्य क्षेत्रका भन्दा यस क्षेत्रमा भए गरेका कुराहरुले अलिक धेरै चर्चा पाउँछन् ।
तपाईका आगामी योजना के छ ?
नेपाली कला क्षेत्रमा नै पूर्णरुपमा सर्मिपत भएर लागेकी छु म । म यो क्षेत्र बाहेक अन्यतिर सोचेको छैन । केही नयाँ चलचित्रका काम अघि बढाउने सोचमा छु ।
यो क्षेत्रमा रहेर के पाए के गुमाए जस्तो लाग्छ ?
मैले मेरो रोजाईको क्षेत्र, मेरो प्यासनको क्षेत्रमा काम गर्ने मौका पाएँ, खुसी छु । लामो समयदेखि यो क्षेत्रमा रहेर आफूले सक्दो योगदान पुर्याउने कोशिसमा छु । यो क्षेत्रले मलाई नाम र दाम दुबै दिएको छ । दर्शकको अपार माया र साथ पाएकी छु । धेरै कुरा मैले यस क्षेत्रबाट पाएकी छु । सबैको माया पाएकी छु । अझै धेरै गर्न बाँकी छ यस क्षेत्रमा मैले । दर्शकमाझ अझ सशक्त चलचित्र पस्किन सकु यही कामना गर्दछु ।
नेपालका सेलिबे्रटीले ड्रेसअपमा ध्यान दिँदैनन् भन्नेलाई के भन्नु हुन्छ ?
सेलिब्रेटी भएपछि ड्रेसअपमा पनि ध्यान दिनुपर्छ । हामीकहाँ पनि कहिले कुन हिरोइनले के देखायो, कहिले कुन हिरोइनले के देखायो भनिन्छ । यस्तो हामीकहाँ मात्र होइन, बलिउड र हलिउडमा पनि यस्ता कुरा भइरहेका हुन्छन् । अरु भन्दा फरक देखिनका लागि फरक खालको ड्रेसअप आवश्यक नै हो । प्रत्येक नायिकालाई त्यसैले पनि यस्तो भएको हुनुपर्छ । प्रोग्राम वा विभिन्न फङ्सनमा जाँदा के गेटअप गर्ने भन्ने थाहा हुन्छ र बुझेको पनि हुन्छ । कतिपय कलाकारले बुझी–बुझी कन्टोभरसीमा आउन पनि जानी–जानी यस्तो गर्ने गर्छन् ।
कस्ता चलचित्रलाई दर्शकले साथ दिएको पाउनुहुन्छ ?
पछिल्लो समयमा नारीप्रधान चलचित्रहरू रmचाइएको छ हामीकहाँ । नायिकाहरूले बनाएका चलचित्रहरु चलेका छन् । चलचित्रको कथावस्तु राम्रो छ भने त्यो चलचित्र पक्कै पनि चल्छ ।
नेपाली चलचित्रको वर्तमान अवस्था कस्तो पाउनुहुन्छ ?
विगत भन्दा वर्तमान हाम्रो चलचित्रको अवस्था राम्रो पाउँछु म । चलचित्रका निर्देशक कलाकारहरू सबै यो क्षेत्रमा पछिल्लो समयमा पढेर बुझेर आएका छन् । दक्ष युवा पुस्ताको आगमनले पनि यो क्षेत्रको अवका दिनहरू राम्रो हुनेछन् भन्ने आशा गर्न सकिन्छ । चलचित्र संख्यात्मक हिसावमा धेरै नै बनिरहेका छन् तर यसको गुणत्मकपक्षलाई ध्यान दिनु जरुरी छ । चलचित्रक्षेत्र राज्यको पनि एक हिस्सा भएकोले राज्यले यस क्षेत्रलाई विशेष खालको योजना बनाई कार्यान्वयनमा जोड दिन जरुरी छ ।
अन्तमा ?
पक्कै पनि केही समय पछि यो कोरोना कहर समाप्त हुने छ । हामी नयाँ चलचित्र लिएर दर्शकमाझ आउने छौं । कलाकारहरूको लागि सम्पूर्ण सम्पत्ति भनेको दर्शक हुन् । त्यसैले दर्शकहरूलाई नेपाली चलचित्र हेरिदिन र माया गरिदिन आग्रह गर्छु ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies