-प्रकाशकुमार शर्मा
भाग्यलक्ष्मीलाई आज हतारो थियो । उसको कथा संग्र्रह ‘विराट मन’ले यस वर्षको साहित्यतर्फको देशकै लब्ध प्रतिष्ठित पुरस्कार पाएको थियो र आज उक्त पुरस्कार एक भव्य कार्यक्रमकाबीच भाग्यलक्ष्मीलाई प्रदान गरिँदैथियो । आफ्नो सवारी चालकलाई ऊ हतारो लगाइरहेकी थिई तर शहरको विरक्ति लाग्दो ट्राफिक जामले कार्यक्रम स्थलसम्म पुग्न विलम्ब गराइरहेको थियो । तर सौभाग्य नै भन्नुपर्ला भाग्यलक्ष्मी निर्धारित समयमै कार्यक्रममा सरिक हुन पुगी । उसको पुरस्कृत कृति ‘विराट मन’बारे साहित्य क्षेत्रका दिग्गज व्यक्तित्वहरूबाट समीक्षा र समालोचना भइरहँदा ऊ भने एउटा गहिरो पूर्व दिप्तिमा डुबेकी थिई ।
उद्घोषकले पुरस्कार थाप्न र मन्तव्य व्यक्त गरिदिन ड्यासमा बोलाउँदासम्म पनि ऊ विगतको गर्तभित्र कतै हराइरहेकी थिई, सँगै बसेका समकालीन साहित्यकारले झक्झक्याउँदा मात्रै ऊ वर्तमानमा फर्किई र मुख मण्डललाई सामान्य बनाउने चेष्टा गर्दै पुरस्कार राशिको अंक् उल्लेख भएको बडेमानको चेक थापी र धन्यवादको भाषण दिन पोडियममा उक्ली । हातमा बोकेको बुके र मोबाइल पोडियममा राख्नु मात्रै के थियो त्यसमा भ्यारभ्यार गरेर भाइब्रेट भयो ।
‘आमा, म तिम्रो उपलब्धिलाई सुदूर मुलुक आइसल्याण्डबाट फेसबुकमा लाइभ हेरिरहेको छु । मलाई तिम्रो छोरा हुन पाएकोमा गौरव छ । तिम्रो जीवन संघर्षको म सधैंको सहयात्री हुँ आमा ।’ छोरा दीक्षान्तको म्यासेज हेरेर उसका आँखा रसाए । तर पनि सम्हालिएरै उसले मन्तव्य जारी राखी ।
फेरि मोबाइलले भाइब्रेट ग¥यो । के फेरि दीक्षान्तले म्यासेज गरेको थियो त ?
‘तिम्रा पूर्व श्रीमान् अर्थात् जगतनारायण बिते । मलामी घाटतर्फ हिँडिसकेका छन् । के तिमी आउँदिनौ, भाग्यलक्ष्मी ?’ पूर्वलोग्नेकी दिदी अर्थात् पूर्व ामाजूले गरेको मोबाइल म्यासेजले भाग्यलक्ष्मी अवाक् भई । एकछिन त उसलाई भनन रिंगटा लागेजस्तो भयो र ढल्छु कि जस्तो लागेर दुवै हातले पोडियमलाई समाई ।
‘सम्माननीय व्यक्तित्वहरू, जुन कथा संग्र्रहका लागि मैले यो प्रतिष्ठित पुरस्कार जितेँ, त्यसका सूत्रधार आज अनन्त यात्रामा हिँडेका छन् । यस क्षण यहाँ उभिएर आफ्नो भाषण जारी राख्नुभन्दा म उनको बिदाइमा सरिक हुनु श्रेयष्कर छ । मलाई माफ गर्नुहोला ।’ यति भनेर भाग्यलक्ष्मी सभाहलबाट बाहिरिई ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies