काठमाडौं, मस– नेपाल वैदेशिक रोजगार व्यवसायी संघका पूर्व अध्यक्ष बलबहादुर तामाङ नेपाली कांग्रेस प्रवेश गरेका छन् । बुधबार नेपाली कांग्रेस सभापति शेर बहादुर देउवाको निवासमा तामाङले नेपाली कांग्रेसको सदस्यता लिएका हुन ।
गत चैत १ गतेदेखि नेकपा एमालेको साधारण सदस्यता त्यागेका तामाङ वैदेशिक रोजगार क्षेत्रमा नेकपा पार्टीको बफादार र सधैं नीति, पद्दति र अनुशासनको घेरामा बस्ने भनि चिनिएका थिए ।
उनी नेकपा एमाले निकट उद्योगी व्यवसायीहरुको संगठन नेपाल उद्योग व्यवसायी महासंघका सचिवको जिम्मेवारीमा समेत रहेका थिए ।
एमाले निकट प्रगतिशील वैदेशिक रोजगार व्यवसायी मञ्च नेपालको पूर्व अध्यक्षसमेत रहेका उनी कम्युनिष्ट पार्टीहरुले सिद्धान्त र व्यवहार दुवै छोडेको भन्दै व्यवसायी तामाङले पुरानो लोकतान्त्रिक पार्टीको रूपमा रहेको नेपाली काग्रेसमा संगठित हुनु उचित ठानेर पार्टी प्रवेश गरेको बताए ।
उनले नेपालका कम्युनिस्ट पार्टीमा त्याग र समर्पण भएका कार्यकर्ताको कुनै भूमिका नरहेको मध्यान्ह राष्ट्रिय दैनिकलाई बताए । राजधानीमा पार्टीका सभापतिबाट सदस्यता ग्रहणगरेका तामाङले आफु ताप्लेजुङ जिल्लामा सक्रिय रहने पनि जानकारी दिए । नेकपा र एमालेमा रहँदा उनी पूर्व प्रधानमन्त्री माधव नेपाल र युवा नेता योगेश भट्टराई निकट मानिन्थे ।
उनले तत्कालिन अवस्थामा नेकपा छोड्दा फेसबुकमा लामो स्टाटस लेखेर पार्टी नेतृत्वमाथि नीति सिद्धान्त बिर्सेको लगायतका असन्तुष्टि व्यक्त गर्दै सम्पूर्ण जिम्मेवारी र संगठित सदस्यतासमेत त्यागेको घोषणा गरेका थिए ।
राजनीति भनेको समाज परिवर्तनको अस्त्र सम्झेर २०४३ बाट कम्युनिष्ट पार्टीमा लागेको र पार्टीको चुनाव चिन्ह ‘सूर्य’मा भोट हाल्न आमा, बुबा लगायत छिमेकीलाई अनुरोध गर्नेदेखि विद्यालयस्तरमा जनसांस्कृतिक कार्यक्रम तथा सबै बिद्यार्थीलाई अनेरास्ववियुको झण्डामा गोलबन्द हुन अह्वान गरेको विगत स्मरण गर्दै तामाङले नेकपा एमालेको सरकारले घोषणापत्र बमोजिम काम गर्नेछ, सडक, रेलमार्ग, विमानस्थल, विद्युत, स्वास्थ्यमा आमूल परिवर्तन गर्नेछ, रोजगारको पूरा ग्यारेन्टी गर्ने र त्यसले नेपाली सुखी हुने आशा राखेको भएपनि पार्टीको सरकारले त्यसतर्फ काम नै नगरेको बताएका छन् ।
उनले आफूले करिब ३४ वर्षअघि २०४३ सालमा पाएको प्रशिक्षण अहिले आएर गलत सावित भएको भन्दै अबको जीवनको अमूल्य समय गलत बाटोमा लाग्नु भन्दा नेपाल कम्युनिष्ट पार्टी एमालेको उद्योग तथा वाणिज्य विभागको सदस्य, नेकपा एमालेको जन वर्गीय संगठन नेपाल उद्योग व्यवसायी महासंघको सचिवबाट राजिनामा दिनु उचित ठानी नेकपा एमालेको पार्टी सदस्यता त्यागेको बताएका थिए ।
यसअघि व्यवसायीभित्र कट्टर एमालेको छवि बनाएका संघका पूर्व सदस्य म्याग्दीका प्रभावशाली जिल्लास्तरीय नेता बलभद्र ढकालले पनि पार्टीले कम्युनिष्टको सिद्धान्त त्यागेको भन्दै नेकपा छाडेर नेपाली कांग्रेसमा प्रवेश गरेका थिए ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies