काठमाडौं : केही समयअघि दिवंगत भएका बरिष्ठ गायक/संगीतकार प्रेमध्वज प्रधानप्रति श्रद्धासुमन अर्पण स्वरुपमा एशियन म्यूजिक प्रा.लि.ले प्रधानको गीतको कभर गायन प्रतियोगिता गरेको छ ।
दिवंगत गायक प्रधान र गायिका केन्जुमा सुब्बाको स्वरमा रहेको 'ती आँखामा' गीतको प्रतिस्पर्धामा स्रजल महर्जन र प्रिजा मिश्राको जोडी प्रथम भएको छ । यो प्रतियोगिताको फाइनलका लागि ११ जोडी गायक गायिका चयन भएका थिए । उनीहरु मध्येबाट निर्णायकमा अंकको आधारमा महर्जन र मिश्रको जोडी प्रथम भएको आयोजक संस्था एशियन म्युजिकका अध्यक्ष इश्वर गुरुङले बताएका छन् ।
बिजेता महर्जन र मिश्रले पुरस्कार स्वरुप युगल स्वरमा एउटा गीत रेकर्ड गर्न पाउने भएका छन् । उनीहरुको त्यो गीतको भिडियो पनि आयोजक संस्थाले निर्माण गर्ने भएको छ ।
यस्तै यो प्रतियोगितामा सुमित श्रेष्ठ र युनिशा शेर्पा देशारको जोडी द्वितीय भएको छ । द्वितीय जोडीले पुरस्कार स्वरुप युगल स्वरमा एउटा गीत आयोजक कम्पनीको तर्फबाट रेकर्ड गर्न पाउने भएका छन् । यो प्रतियोगिताको लागि देशभरबाट १७३ जोडीले आफ्नो स्वरमा गीत रेकर्ड गरेर भिडियो पठाएका थिए । जसमध्यबाट श्रजल र प्रिजा उत्कृष्ट भएका हुन् ।
६ वर्ष अघि रिलिज भएको यो गीतमा जुगल डँगोलको संगीत र डब्बु क्षत्रीको शब्द रहेको थियो । यो प्रतियोगिताका बिजेता र उत्कृष्ट ११ पर्न सफल प्रतिस्पर्धीलाई चाँडै काठमाडौंमा एक समारोह आयोजना गरेर प्रमाणपत्र प्रदान गरिने भएको छ । बिजेताहरुको स्वरमा गीत पनि चाँडै रेकर्ड गरिने भएको छ ।
यो कभर गायन प्रतियोगिताको निर्णायकमा यही गीतका गीतकार डब्बु क्षत्री, संगीतकार जुगल डँगोल र गायिका केन्जुमा सुब्बा रहेको थिए । यी तीन जनाको निर्णयक टीमले उत्कृष्ट गायक गायिका चयन गरेको हो ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies