साउदी अरब : चर्चित लोकगायिका सुनिता दुलालले साउदी अरबको पूर्वी क्षेत्र कतिफमा आयोजित तिज विशेष सांगीतिक कार्यक्रममा आफ्ना लोकप्रिय तिज गीतहरू गाएर प्रवासमा रहेका नेपालीहरूलाई स्वदेशको सांस्कृतिक माहोलमा डुबाएकी छिन् ।
शुक्रबार गैरआवासीय नेपाली संघ, क्षेत्रीय समन्वय समिति पूर्वी क्षेत्रको आयोजनामा सम्पन्न कार्यक्रममा दुलालले “फुल बुट्टे सारी”, “तिजको रहर आयो बरी लै”, “नाचौंला गाइरहौंला”, “आउन तिजको लहर” लगायतका चर्चित गीतहरू प्रस्तुत गर्दा सयौँ दर्शक उत्साहपूर्वक नाचेका र गीतमा साथ दिएका देखिन्थे ।
कार्यक्रमको अध्यक्षता संघका अध्यक्ष धनकुमार लामाले गरेका थिए भने प्रमुख आतिथ्य नेपाली दूतावासका महामहिम राजदूत डा. नरेश ढकालले गरे । कार्यक्रममा एनआरएनए साउदीका अध्यक्ष उमेश भट्टराई, मध्यपूर्व संयोजक तथा नेपाल सरकारका पर्यटन दूत राजेन्द्र अर्याल जोन, निबर्तमान अध्यक्ष तथा आइसीसी सदस्य रबिना अर्याल, तेज थापा, पूर्व महिला उपाध्यक्ष यासमिन बेगम सैयदलगायत साउदीमा सक्रिय संघ–संस्थाका प्रतिनिधिहरूको उल्लेखनीय उपस्थिति थियो ।
अध्यक्ष लामाले सम्बोधन गर्दै, “तिज महिलाहरूको मात्र पर्व नभई सम्पूर्ण नेपालीको सांस्कृतिक पहिचान र एकताको प्रतीक हो । प्रवासमा यस्ता कार्यक्रमहरूले नेपालीपनलाई जोड्ने पुलको काम गर्छ,” भन्ने विश्वास व्यक्त गरे ।
त्यसैगरी महामहिम राजदूत डा. नरेश ढकालले राष्ट्रिय गान गाउने बेला पालना गर्नुपर्ने मर्यादा र शिष्टाचारबारे स्मरण गराउँदै, “गम्भीर र अनुशासित ढंगले मात्र राष्ट्रप्रति श्रद्धा प्रकट हुन्छ,” भनेका थिए । उनले प्रवासमा पत्रकार, सामाजिक अभियन्ता र संघ–संस्थाहरूको भूमिकाको प्रशंसा गर्दै नेपाली संस्कृतिलाई जीवित राख्न सबैलाई आग्रह गरे ।
गायिका सुनिता दुलालले आफ्नो दोस्रो साउदी भ्रमणप्रति उत्साह व्यक्त गर्दै दर्शकहरूको माया र साथप्रति आभार प्रकट गरिन् । उनले भनिन्, “तिज महिलाको आत्मसम्मान, खुशी र सांस्कृतिक गर्वसँग जोडिएको पर्व हो । प्रवासमै भए पनि तपाईंहरूले देखाएको उत्साह असाध्यै प्रेरणादायी छ ।”
कार्यक्रममा साउदीमै रहेका स्थानीय नेपाली कलाकार रोम लामा, अर्जुन छेत्री, फणिन्द्र कार्की लगायतले पनि आकर्षक सांस्कृतिक प्रस्तुति दिएका थिए । दर खाने, शुभकामना आदानप्रदान गर्ने तथा तिजको महत्व झल्काउने विविध कार्यक्रमले वातावरण झनै उत्साहमय बनेको थियो ।
कार्यक्रममा साउदी अरबका विभिन्न स्थानबाट आएका नेपाली समुदाय, व्यवसायी, सञ्चारकर्मी, संघ–संस्थाका प्रतिनिधि, नेपाली दाजुभाई तथा दिदि बहिनीहरुका साथ भारतिय नागरिकहरूको पनि सहभागिता रहेको थियो ।
.jpeg)
