चितवन : जमिअत उलमाए नेपालको नेतृत्वमा आयोजित दुईदिने मदरसा संघसँग सम्बन्धित अन्तरक्रिया कार्यक्रम चितवनको भरतपुर–१६ स्थित मदरसा जामिअतुल इमानमा सम्पन्न भएको छ ।
शुक्रबार राति सुरु भएको कार्यक्रम शनिबार बिहानदेखि दिउँसोसम्म निरन्तर छलफलसहित सम्पन्न भएको थियो । कार्यक्रममा जमिअत उलमाए नेपालका अध्यक्ष तथा राष्ट्रिय सभा सदस्य मौलाना मोहम्मद खालिद सिद्दीकी प्रमुख अतिथि रहेका थिए । त्यस्तै मौलाना मोहम्मद असगर अली मदनी, मौलाना मोहम्मद सफिकुर रहमान, मौलाना मोहम्मद मोइनुद्दिन कासमी र मुफ्ती बसीरलगायत विशिष्ट अतिथिहरूको सहभागिता रहेको थियो ।
कार्यक्रममा मदरसा व्यवस्थापन, दर्ता प्रक्रिया र संस्थागत एकतासम्बन्धी विषयमा विस्तृत छलफल भएको आयोजकले जनाएको छ । अध्यक्ष सिद्दीकीले दर्ता भएका मदरसाले मात्र सरकारी अनुदान पाउने भएकाले दर्ता अनिवार्य रहेको स्पष्ट पार्दै देशभरका सञ्चालक र प्रधानाध्यापकबीच एकता कायम गर्दै 'मदरसा संघ' स्थापना गर्नुपर्ने आवश्यकता औंल्याए ।
त्यसैगरी मौलाना असगर मदनीले मदरसा एकतामा आए मात्र सरकारसँग माग र कमजोरीबारे प्रभावकारी रूपमा आवाज उठाउन सकिने धारणा राखे ।
मदरसा जामिअतुल इमानका सञ्चालक मौलाना मोहम्मद हनीफले आफ्नो मदरसा कक्षा ८ सम्म सञ्चालनमा रहेको जानकारी दिँदै दर्ताप्रति अनावश्यक त्रास लिनुनपर्ने बताए । उनका अनुसार दर्ता भएपछि मदरसाले शैक्षिक अधिकार सुरक्षित गर्नका साथै सरकारी स्रोतमा पहुँच बनाउन सक्ने वातावरण बन्नेछ ।
कार्यक्रमले शिक्षा अधिकार सुनिश्चित गर्न मदरसाहरूको एकता र संस्थागत ढाँचा अपरिहार्य रहेको निष्कर्ष निकालेको छ । सो अवसरमा सर्वसम्मतिले जमिअत उलमाए नेपालका अध्यक्ष मौलाना खालिद सिद्दीकीलाई मदरसा संघको अध्यक्षमा चयन गरिएको छ ।
देशभरका विभिन्न जिल्लाबाट आएका करिब ३ सय मौलाना, स्थानीय युवाहरू र पत्रकारहरूको उपस्थिति रहेको कार्यक्रममा मदरसा प्रधानाध्यापकहरूलाई प्रशंसापत्रद्वारा सम्मान गरिएको थियो ।
